Ermənistan silahlı qüvvələrinin son genişmiqyaslı təxribatları bu ölkənin sülh prosesində hələ də maraqlı olmadığını göstərir. Azərbaycan qarşısında hərbi güc baxımından çox aciz olsa da Ermənistan hələ də barışıq əldə olunması ilə bağlı rəsmi Bakının təşəbbüslərinə adekvat cavab vermir. Əksinə, vəziyyətin daha da gərginləşməsinə xidmət edən addəmlar atır.
Elə bu fonda sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib. Ermənistan silahlı qüvvələrinin diversiya qrupları sutkanın qaranlıq vaxtında Azərbaycan Ordusunun bölmələrinin mövqeləri arasındakı ərazilərinin və təminat yollarının minalanmasını həyata keçirib. Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verib. Qarşı tərəfin Basarkeçər, İstisu, Qarakilsə və Gorus yaşayış məntəqələri istiqamətində yerləşən bölmələri tərəfindən Azərbaycan ordusunun Daşkəsən, Kəlbəcər və Laçın rayonları ərazisindəki bəzi mövqeləri, sığınacaqlar və dayaq məntəqələri müxtəlif çaplı silahlar, o cümlədən minaatanlardan intensiv atəşə tutulub. Nəticədə şəxsi heyət arasında itkilər var, hərbi infrastruktura ziyan dəyib. Azərbaycan Müdafiə Nazirliyinin məlumatəna əsasən, ümumiyyətlə, son bir ay ərzində Ermənistan silahlı qüvvələrinin dövlət sərhədinin Laçın, Gədəbəy, Daşkəsən və Kəlbəcər rayonları istiqamətində təxribatları, Azərbaycan ordusunun həmin rayonların ərazisindəki mövqelərinin müxtəlif çaplı silahlardan atəşə tutulması halları intensiv və sistematik xarakter daşıyırdı. Eyni zamanda, Ermənistan tərəfindən Azərbaycan sərhədləri boyunca hücum təyinatlı silahları, ağır artilleriya vasitələrini və şəxsi heyəti cəmləşdirməsi müşahidə olunmaqda idi. Bütün bu faktlar Ermənistan genişmiqyaslı hərbi təxribata hazırlaşdığına dəlalət edirdi. Ermənistan bu kimi əməlləri ilə, həmçinin Azərbaycanın işğaldan azad edilmiş sərhədyanı rayonlarda həyata keçirdiyi irimiqyaslı mülki infrastruktur layihələrinin icrasını ləngitmək və Azərbaycan sərhədləri yaxınlığında gərginlik mühitini saxlamaq məqsədini güdür. Ermənistanın təxribatlarına cavab olaraq ordumuzun əks tədbirləri lokal xarakter daşıyır və atəş nöqtəsi olan legitim hərbi hədəflərə qarşı yönəlib. Cavab tədbirləri kiçikmiqyaslı və hədəflənmiş xarakter daşıyaraq Azərbaycan sərhədlərinin təhlükəsizliyini təmin etmək və Ermənistanın təxribatlarına son qoymaq məqsədi daşıyır. Həmişəki kimi isə erməni tərəfi baş verənlərə görə Azərbaycanın günahkar olduğunu iddia etməyə başlayıb. Ermənistan Müdafiə Nazirliyi iddia edib ki, Azərbaycan ordusu Ermənistan ərazisindəki Qoris, Sotk və Cermuk istiqamətində hücuma keçib. Halbuki bu, tanmamilə cəfəngiyyatdır. Erməni “Teleqram” kanalları isə Azərbaycan ordusunun 3 istiqamətdən Ermənistan hərbi birliklərinə zərbələr endirdiyini yazır. Bildirilir ki, endirilən zərbələr nəticəsində Ermənistan hərbi hissələrindən birinin külü göyə sovrulub.
Baş verənlərdən dərhal sonra Ermənistanın baş naziri Nikol Paşinyan Rusiya prezidenti Vladimir Putinə, Fransa prezidenti Emmanuel Makrona zəng edərək Azərbaycandan şikayətlənib. Bunun ardınca Nikol Paşinyan Ermənistan Təhlükəsizlik Şurasının iclasını keçirib. İclasda Təhlükəsizlik Şurasının üzvlərindən əlavə, prezident Vaaqn Xaçaturyan və parlamentin spikeri Alen Simonyan iştirak edib. Hökumətin mətbuat xidmətindən verilən məlumata görə, iclas zamanı “Azərbaycanın Ermənistanın suveren ərazisinə qarşı gecə yarısı başlayan təcavüzkar hərəkətlərinə qarşı mübarizə” istiqamətində gələcək addımlar müzakirə olunub. Daha sonra məlumatda qeyd edilir: “Ermənistan Respublikasının suveren ərazisinə təcavüzlə əlaqədar Dostluq, Əməkdaşlıq və Qarşılıqlı Yardım Müqaviləsinin müddəalarının həyata keçirilməsi üçün Rusiya Federasiyasına, habelə Kollektiv Təhlükəsizlik Müqaviləsi Təşkilatına, BMT Təhlükəsizlik Şurasına rəsmi müraciət etmək qərara alınıb”. Amma təbii ki, Ermənistan bu dəfə də istədiyini ala bilməyəcək. Çünki haqsızıdır. Vətən müharibəsindən qalib çıxan Azərbaycan ordusu isə ötən iki ilə yaxın müddət ərzində də Ermənistan tərəfindən ölkəmizin ərazi bütövlüyü və suverenliyinə olan təhlükələrin qarşısını almaq üçün zəruri tədbirlər görüb, həyata keçirilmiş ardıcıl təxribatların qarşısını alıb. İndi sual budur ki, belə təxribatlar nə zaman kimi davam edəcək? Növbəti belə hallar yenidən genişmiqyaslı müharibənin alovlanmasına gətirib çıxara bilməzmi? Bütün bu ehtimalların üzərindən birdəfəlik xətt çəkilməsi üçün yeganə bir çıxış yolu Ermənistanın bütün hərbçiləri Azərbaycan ərazisindən çıxarması, Azərbaycan sərhədinin yaxınlığında təhlükəsiz “bufer zona” yaradılmasıdır. Əks təqdirdə, Ermənistanın təxribatları davam edəcək. Paralel olaraq, Ermənistan sülhə məcbur edilməlidir. Ermənistan rəhbərliyinin hər dəfə təxribatlar törətdikdən sonra himayədarlarının üstünə qaçıb, riyakarcasına hay-küy salmaqla revanşizmin baş qaldırması üçün vaxt tanınmasına çalışmasına son qoyulmalıdır. Ermənistandan sonuncu hərbi texnikasını və əsgərini Rusiya sülhməramlılarının nəzarətində olan Azərbaycan ərazilərindən çıxarılması tələb olunmalıdır. Əks halda əməli sülhə nail olması mümkünsüz olacaq. İndikikdə isə baş verənlərə görə məsuliyyəti yalnız Ermənistanın hərbi-siyasi rəhbərliyi daşıyır.
Ramil QULİYEV
