Məlum olduğu kimi, ötən həftə ərzində Ukrayna ordusu uğurlu əks-hücum əməliyyatları keçirərək bir sıra vacib əraziləri azad edib. Belə ki, Ukrayna kilid rolu oynayan İzyum şəhərini geri aldığını açıqlayıb. Rusiya ordusunun İzyum şəhərindən çıxarılması Qərb mətbuatında “Rusiya ordusunun mart ayında paytaxt Kiyevdən çıxarılmasından sonra rus qüvvələrinin ən böyük məğlubiyyəti” kimi şərh edilib.
Məlumata görə, minlərlə rus əsgəri geri çəkilərkən döyüş sursatı və texnikanı tərk edib. Ən son məlumata görə, Ukrayna ordusu 3000 kv.km ərazisini işğaldan azad edib.
Hələ sərhəd təxribatlarına əl ətmadan bir neçə gün əvvəl Ukrayna ordusunun əldə etdiyi uğurlardan erməni deputatlar daha çox narahat olduqlarını biruzə verən məlumatlar ortaya qoydular. Bunu onunla əsaslandırmağa çalışırdılar ki, əməliyyatlar Qarabağa təsir edəcək. “Ermənistan” parlament fraksiyasından deputat Andranik Tevanyanın bununla bağlı narahatlığı diqqəti cəlb etmişdi: “Ukrayna qambiti. Ukraynadakı hərbi əməliyyatlar birbaşa Ermənistan və Qarabağa təsir edəcək. Azərbaycan və Türkiyə Ukrayna hadisələrini diqqətlə izləyir və hazırlaşır. Hücuma hazırlaşırlar. Hansı istiqamətdə deməyə ehtiyac var? Bəs Ermənistanda nə edirlər? Ermənistanda daha çox faciəvi qeyri-ciddilik, cinayətkar hərəkətsizlik və qeyri-adekvatlıq hökm sürür”.
Cəbhədə baş verən toqquşmadan sonra Ermənistsn təbliğatı bu tezisi gündəmə gətirməyə başladı. İddia edirlər ki, güya Azərbaycan Ukraynada Rusiyanın məğlubiyyətindən ruhlanaraq Ermənistana doğru hücuma keçib. Özlərinin başladıqları növbəti təxribatı Azərbaycana böhtan atmaqla kompensasiya etməyə çalışırlar.
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bununla Ermənistan bir neçə məqsəd güdür: “Birincisi, öz təxribatını Azərbaycanın üzərinə atmaqla məsuliyyətdən yayınır. Paşinyan son açıqlamasında bildirib ki, Azərbaycan onlardan Qarabağı ozünün ərazisi kimi tanımağı tələb edir. Buradan məsələ tam aydın olur. Deməli, Ermənistanın sülh müqaviləsini imzalamaq fikiri yoxdur. Sadəcə, bu mövzuda blef edir. Həmin müqavilənin əsas şərtlərindən biri tərəflərin qarşılıqlı olaraq bir-birinin ərazi bütövlüyünü tanımasıdır. Ermənistan Avropa İttifaqının vasitəçiliyi ilə keçirilən son görüşdə bir ay müddətində sülh sənədinin ilkin variantını ortaya qoyacağına dair söz vermişdi. Vaxtın yaxınlaşdığını hiss edir və bundan yayınmağın yeganə variantını təxribat törətməkdə görür. Başqa bir məqsədi isə Rusiyanı prosesə bizim əleyhimizə qoşmaqdır. Dəfələrlə belə cəhdləri edib. Təxribatı Qarabağda deyil, dövlət sərhəddində törətməklə güya Azərbaycanın onun ərazisinə hücum etdiyi görüntüsünü yaratmağa çalışır. Azərbaycanın Ukrayna ilə bağlı mövqeyi bəllidir. Biz münaqişənin sülh yolu ilə həll edilməsini istəyirik. Fəaliyyətimizi hansısa tərəfin uğuru və ya məğlubiyyəti üzərində qurmuruq. Ermənistan öz düşündüyü və həyata keçirmək istədiyi planı bizim adımızla bağlamaq istəyir. Hazırkı Ermənistan hakimiyyəti açıq şəkildə anti-Rusiya mövqeyini bölüşür. Məntiqlə Rusiyanın məğlubiyyəti onları daha çox sevindirməlidir, nəinki bizi. Ola bilər ki, onlar bu vəziyyətdən daha çox yararlanmaq istəyir. Azərbaycan düşmənin təxribatına cavab verir. Bizim Rusiya ilə münasibətlərimiz strateji müttəfiqlik səviyyəsindədir. Bu baxımdan, Ermənistanın növbəti informasiya təxribatı özünə tərəfdar toplaya bilməyəcək. Ermənistan bilməlidir ki, yeganə çıxış yolu bizim ərazi bütövlüyümüzü tanımaqdan keçir. Əks təqdirdə, etdiyi bütün təxribatların belə layiqli cavabını alacaq”.
Məhəmmədəli QƏRİBLİ
