Məlum olduğu kimi, sentyabrın 7-də Milli Məclis tərəfindən “Siyasi partiyalar haqqında” yeni qanun layihəsi ictimaiyyətə təqdim edilib.
Layihəyə əsasən, qanunun qəbulundan sonra üzvlərinin sayını 90 gün ərzində 10 min nəfərə çatdıra bilməyən dövlət qeydiyyatına alınmış partiyaların ləğvi barədə apellyasiya məhkəməsində iddia qaldırılacaq.
Bəllidir ki, Azərbaycanda qeydiyyatdan keçən partiyaların böyük əksəriyyətinin heç 10 min nəfər üzvü yoxdur. Əksər partiyalar isə bir papka və bir sədrdən ibarətdir. Partiyaların böyük əksəriyyəti seçkilərdə nə fərdi, nə də blok halında iştirak edir. Hətta bir çox tanınmış, parlamentdə təmsilçisi olan partiyalardan bəziləri 10 min üzvlərinin olmadığını açıq etiraf edirlər. Üzv sayı 10 mindən aşağı olan partiyalardan biri də Respublikaçı Alternativ Partiyasıdır. REAL-ın icra katibi Natiq Cəfərli sözügedən məsələ ilə bağlı bildirib ki, onlar hər ay, 100-150, yay aylarında isə bir qədər aşağı sayda yeni üzvlər qəbul edir: “Biz partiyanın üzv sayını artırmaqla məşğul olmuruq. Üzv sayının partiyanın işinə heç bir aidiyyatı yoxdur. Ötən dekabrda sayımız 4 mindən artıq idisə, yəqin ki, hal-hazırda 5 minə yaxınlaşıb. Amma bu o demək deyil ki, biz qohum-əqrəbamızı gətirib, partiyamıza üzv edək. Bu, saxtakalığın bir növüdür. Partiyaları saxtakarlıqla say artırılmasından çəkindirmək lazımdır”.
“Cırtdan partiyalar” ləğv edilməməyin yolunu birləşərək, daha böyük partiya təsis etməkdə görə bilərlərmi? Nədənsə, bu yöndə təkliflərə rast gəlmirik. Standartlara cavab verməyən partiyalar ləğv edilməkdənsə, çıxış yolunu təmərgüzləşmədə görə bilərlərmi?
Milli Dirçəliş Hərəkatı Partiyasının sədri Fərəc Quliyev “Bakı -Xəbər”ə açıqlamasında bildirdi ki, ölkədəki bütün partiyaların kiçik ölçüdə olduğunu demək olmaz: “Partiyaların bir araya gəlməsi bütün hallarda vacibdir. Hətta sayla bağlı qanunda müddəa ortaya çıxmasaydı belə. Çünki ümumi proqram, məram varsa, ( bu da partiyaların əksəriyyətində eynidir – F.Q) Onların bir yerdə fəaliyyəti daha məqsədəuyğun olar. Belə gedərsə, ya partiyalar ləğv edilməlidir, ya da digərləri ilə bir araya gəlməlidir. Razılaşıram ki, əksər partiyaların tələb edilən sayda üzvləri yoxdur. Bizim özümüzdə departament institutu vardır. Qərbi Azərbaycan, Qarabağ, Güney Azərbaycan, Dərbənd, Borçalı adlı departamentlərimiz fəaliyyət göstərir. Azərbaycanın 70-ə qədər rayonunda təşkilatımız var. Mən bu gün partiyalardan birinin sədri ilə bu yöndə müzakirə apardım. Hələlik ad çəkmək istəmirəm. Həmin partiya da bizimlə birlikdə fəaliyyət göstərmək istəyir. Hələ ki, qanun qəbul edilməyib. Əgər bu cür tələblər olarsa, partiyaların gələcək fəaliyyətinə ciddi təsir edəcək. Partiyaların həcmindən asılı olmayaraq , onlar heç bir müqavilə olmadan da ortaq davranışlar nümayiş etdirə bilərlər. Bu, olduqca vacib şərtdir. Onu da qəbul edirəm ki, bəziləri gündəmdə qalmaq üçün partiya yaratmağı dəb kimi ortaya qoyublar. Bəzilərinə bu fikirim toxuna da bilər. Şərtlərə baxaq, bəlkə rəqəmi kiçildilər. Belə olacaqsa, inanmıram ki, partiyaların çoxu birləşməyə getsin. Böyük rəqəm saxlanılarsa, ləğv edilməkdənsə, məcburiyyət şəkilində birləşmələr ola bilər. Partiyaların fəaliyyəti üçün daha münbit şəraitin yaradılması barədə düşünmək lazımdır”.
Məhəmmədəli QƏRİBLİ
