Müasir Ermənistanda türk və Azərbaycan dillərinin öyrənilməsinə kütləvi maraq formalaşıb. Nəinki universitetlərin Azərbaycanşünaslıq bölmələrində və dil öyrətmə kurslarında, eləcə də orta məktəblərdə bizim dilə ciddi tələbat yaranıb.
Ermənilər Azərbaycan dilini öyrənmək istəyirlər. Son yayılan məlumatlara görə, erməni şagirdlər daha çox Azərbaycan və türk dillərini seçməyə başlayıblar. “Ermənistanda orta məktəb şagirdləri fakültətiv fənn kimi daha çox Azərbaycan və türk dillərini seçirlər”.
Bu barədə Ermənistanın təhsil, elm, mədəniyyət və idman naziri Vahram Dumanyan bildirib.
O xatırladıb ki, qurum könüllülük əsasında bu dilləri öyrənməyi təklif edib, əsas dillər isə gürcü və fars dilləridir.
Qeyd edilənə görə, Ermənistanın bütün məktəblərində 2-ci sinifdən rus dili, eləcə də istənilən digər xarici dil (ingilis, fransız və ya alman) tədris olunur. Artıq respublikanın məktəbləri tədris üçün üçüncü xarici dili seçə biləcəklər. Əsas diqqət region ölkələrinin - İran, Azərbaycan, Gürcüstan və Türkiyənin dillərinə verilir.
“Bu dillərə üstünlük verməklə belə rəy yaratmaq istəyirlər ki, guya ermənilər “sivil” xalqdır...”
Ermənistanda yürüdülən bu siyasəti şərh edən AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, bu bir erməni hiyləsidir. Çoxdandır ki, Ermənistanın özünü dünyaya tolerant, multikultural dəyərlərə sahib ölkə kimi təqdim etmək istədiyini vurğulayan Q.Hacıyev qeyd etdi ki, nə qədər çalışsalar da heç kəs onları bu cür qəbul etmir. “Xeyli vaxt idi ki, Ermənistanda Azərbaycan və türk dillərinin öyrənilməsi məsələsi müzakirə edilir. Bu yaxınlarda, universitetlərlə yanaşı orta məktəblərdə də, liseylərdə də Azərbaycan və türk dillərinin tədrisi barədə təkliflər irəli sürülür, bunlar nəzərə alınmağa başlayır. Ermənistanda orta məktəb şagirdlərinə Azərbaycan dilini öyrətmək məsələsinin arxasında çox məkrli məqsədlər dayandığı gizli deyil. Bu xüsusi hiyləgər yanaşmadır. Bilirsiz ki, bəzi universitetlərdə xüsusi kurs kimi türk və Azərbaycan dilləri öyrədilir. Sanki indiki vəziyyətdə bu onları qane etmir və bir az da irəliyə gedirlər, bir az da fəallaşırlar. Burada iki məqsəd var. Birinci məqsəd odur ki, ermənilər yenə də hiyləgərliyə əl atır və region dövlətləri, xalqları ilə əlaqə saxlamaq üçün onların dillərini öyrənirlər. Bu, ermənilərə xas xüsusiyyətdir ki, başqa xalqların dilini öyrənirlər və sonra da bu dillər vasitəsilə öz məkrli niyyətlərini həyata keçirirlər. Bu dillərə üstünlük verməklə belə rəy yaratmaq istəyirlər ki, guya ermənilər “sivil” xalqdır, regionda gedən prosesləri izləyirlər, yaxşı əlaqələr qurmaq istəyirlər, hətta qonşuların dillərini öyrənirlər. Birinci məqsədləri (uşaqlarına da, böyüklərinə də onların özlərinin həmişə dediyi kimi,) düşmənin dilini öyrənməkdir. Qonşu xalqların hamısını özlərinə düşmən sayırlar və bu səbəbdən də onların dilini öyrənirlər. Əsas məqsədləri budur. Bu yaxınlarda da demişdim, ermənilər orta məktəblərdə ibtidai siniflərin dərsliyinə belə bir şəkil salıblar: bir erməni qoçusu türk paşasının tapança ilə başına güllə sıxır. Belə bir ideologiya ilə uşaqlarına tərbiyə verən ermənilərin şifahi olaraq türklər, azərbaycanlılar haqda nələr danışdıqlarını da çox yaxşı bilirik. Onların gecə-gündüz təbliğ etdikləri türkə nifrətdir. Təsəvvür edin ki, Rusiya-Ermənistan Universitetində yeni kafedra açıblar. Bu kafedranın proqramına ilk mövzu kimi on bəndlik bir istiqamət salıblar, bunun da birinci bəndi “Dağlıq Qarabağ münaqişəsinin” həlli məsələsidir. Görün, bunlar nə öyrədirlər və nə dərəcədə revanşizmlə məşğul olurlar. Ara qarışdırırlar. Qarabağ münaqişəsi başa çatıb, dünya da qəbul edir ki, münaqişə həll olunub, amma bunlar hələ də qarışdırıcılıq edirlər. Sülh müqaviləsinin qapıda dayandığı bir vaxtda, dünyanın əksər ölkələri Ermənistanla Azərbaycan arasında sülh müqaviləsinin imzalanmasını istədiyi halda bunlar “Dağlıq Qarabağ problemi”ndən danışırlar. Bu ölkə Türkiyəyə, Azərbaycana görün nə qədər ziyan vurub”.
Ermənistanda qonşu xalqlara düşmən gözü ilə baxıldığını qeyd edən Q.Hacıyev qeyd etdi ki, ermənilərin gürcü, fars, türk və Azərbaycan dillərini məktəblilərə öyrətməsində müsbət niyyət yoxdur. 30-40 ildir ki, emənilərin nə ilə məşğul olduğunu dərindən izlədiklərini deyən Q.Hacıyevin sözlərinə görə, Ermənistan dövləti separatizmlə, terrorizmlə, vandalizmlə məşğul olur. Bunları gördüyümüz halda susa bilmərik, deyir Q.Hacıyev. Bu mənada o hesab edir ki, bu dillərin öyrənilməsi xaricdəki diaspor təşlilatının da sifarişi ola bilər.
İradə SARIYEVA
