Qabil Hüseynli: “Putinin vasitəçiliyi ilə keçəcək görüşdə bütün bu məsələlərə aydınlıq gələcək”
Məlum olduğu kimi, Azərbaycan və Ermənistanda yaradılmış sərhəd delimitasiyası üzrə Komissiya ilk görüşünü keçirsə də, Moskvada keçirilməsi razılaşdırılan ikinci görüşdən bir xəbər yoxdur. Bu il mayın 23-də, yəni Brüsseldə Aİ Şurasının sədri Charles Michel ilə üçtərəfli görüşdən bir gün sonra Azərbaycan Prezidenti İlham Əliyev və Ermənistan Baş naziri Nikol Paşinyan sərhəd delimitasiyası üzrə komissiyaların yaradıldığı barədə sərəncam imzalayıblar.
Azərbaycan və Ermənistan baş nazir müavinləri Şahin Mustafayev və Mher Qriqoryan elə həmin may ayında Ermənistan-Azərbaycan sərhədində görüşüblər. Azərbaycan Xarici İşlər Nazirliyinin məlumatına görə, görüşdə tərəflər delimitasiya və digər məsələlər üzrə Komissiya çərçivəsində işləməyə hazır olduqlarını təsdiq ediblər. XİN bildirib ki, ilk görüşdə komissiyanın birgə fəaliyyətinin təşkilati və prosedur məsələləri müzakirə edilib.
Azərbaycan-Ermənistan sərhəd komissiyasının 2-ci iclası niyə baş tutmur?
Politoloq Qabil Hüseynli “Bakı-Xəbər”ə açıqlamasında bildirdi ki, bu formatda növbəti görüşün işə düşməsi üçün bir sıra addımlar atılmalıdır: “Sərhədlərin dəqiqləşməsi ilə yanaşı, kommunikasiyaların açılması məsələsi də vacibdir. Birinci görüş keçirilən zaman bu məsələlərin hər ikisi gündəmdə idi. Xüsusilə də Zəngəzur dəhlizi ilə bağlı məsələ kifayət qədər aktual idi. Ermənilər həmin məsələni, demək olar ki, qəbul etmişdilər. Sonradan müxtəlif təzyiqlər oldu. Xüsusilə də İranın təzyiqi ilə proseslər ləngidildi. Prosesin tormozlanması Ermənistan tərəfdən oldu. Onlar həm siyasi danışıqlardan çəkildi, həm də əldə edilən razılaşmalardan boyun qaçırmağa başladı. Əsas məsələ kommunikasiyaların açılması ilə bağlı olub. Bu yöndə bir neçə məhsuldar görüş də keçirilmişdi. Qarşıda həm Brüssel, həm də Putinin vasitəçiliyi ilə ya Soçi, ya da Moskvada görüş gözlənilir. Bundan sonra ümidvaram ki, bütün bu proseslər sürətlənəcək. Həm də sülh sazişinin hazırlanmasına dair işçi qrupun tərkibinin təsdiqlənməsi də baş tuta bilər. Putinin vasitəçiliyi ilə keçəcək görüşdə bütün bu məsələlərə aydınlıq gələcək. Ancaq biz bilirik ki, Ermənistan bir forpost ölkə olaraq bütün addımlarını Rusiyanın tövsiyə və tezisləri əsasında atır. Avropa Birliyinin münaqişə dövründə belə prosesə birbaşa təsir mexanizmləri yox idi. Post-müharibə dönəmində isə bunun mümkünlüyü inandırıcı deyil. Amma təşəbbüs göstərir. Bunlar da sözdən o tərəfə getmir. Rusiya istəyir ki, başı Ukraynaya qarışdığı dönəmdə burada sülh olsun, ancaq proseslərdə irəliləyiş olmasın. Rusiya Avropa Birliyini öz təsir zonasına daxil etmək istəmir. İstənilən halda, Rusiya həm AB, həm də ABŞ-dan öndədir. Çünki həmin ölkə həm də üçtərəfli razılaşmaya imza atan tərəflərdən biridir”.
Məhəmmədəli QƏRİBLİ
