Azərbaycan Milli Elmlər Akademiyasının (AMEA) Rəyasət Heyəti Aparatının İşlər İdarəsinin sabiq müdiri, keçmiş deputat Elton Məmmədov məhkəməyə verilməsi haqda xəbər yayılıb. Bu günlərdə E.Məmmədov müsahibəsində xəbəri təsdiqləyib və onu məhkəməyə verən şəxsin adını açıqlayıb.
E.Məmmədov bildirib ki, həmin şəxs “Tərtər işi”nə görə vəzifəsindən uzaqlaşdırılan Kamal Əliyevdir və onu da Ramiz Mehdiyev akademiyanın hüquq şöbəsinin müdir təyin edib: “Məndə olan məlumata görə, məni məhkəməyə Akademiyanın hüquq şöbəsinin müdiri Kamal Əliyev verib. Bu adam şəxsi münasibətləri Akademiya səviyyəsinə gətirib çıxarıb. Kamal Əliyev Tərtər işlərinə görə məhkəmə sistemindən uzaqlaşdırılan bir adamdır. Ramiz Mehdiyev isə onu Akademiyanın hüquq şöbəsinə müdir təyin edib...”
E.Məmmədovun irəli sürdüyü iddialarla ilə bağlı AMEA-ya müraciət etsək də, sorğumuza cavab verilmədi. Amma AMEA-dan nə zaman cavab gələrsə, onların mövqeyini də dərc edəcəyik.
Bu səbəbdən də məsələni ekspetlə müzakirə etdik.
“Ramiz Mehdiyev akademiyadan öz şəxsi müəssisəsi, öz şəxsi obyekti kimi istifadə edir...”
Gənc Alim, Doktorant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov “Bakı-Xəbər”ə şərhində bildirdi ki, akademiya ətrafında belə söhbətlərin dolaşması heç də müsbət hal deyil. “AMEA-nən prezidenti vəzifəsinə seçilən Ramiz Mehdiyevin akademiyaya yaraşmayan hərəkətləri təəssüf ki, davam etməkdədir. Mən Ramiz Mehdiyev akademiyanın prezidenti seçiləndə sizə də, başqa jurnalistlərə də açıqlamalar vermişəm və həmin dövrdə ümid edirdim ki, o adam nəhayət AMEA-da yaxşı işlər ortaya qoyacaq. Düşünürdüm ki, ilk növbədə özündən əvvəlki rəhbərin fəaliyyətini təftiş edəcək, onun dövründə baş verən qanunsuzluqlarla bağlı ölçü götürəcək, akademiyada alimlərin fəaliyyəti üçün münbit şərait yaradacaq, nəticədə də akademiya normal iş rejiminə keçə biləcək. Təəssüf ki, Ramiz Mehdiyevin akademiyanın prezidenti vəzifəsinə gəlişindən sonra dirçəlişə təkcə mənim yox, başqa ziyalıların da ümidləri vardı. Fikirləşirdik ki, o uzun illər dövlət idarəçiliyində işləyib, dövlət idarəçiliyində fəaliyyətinə görə cənab Prezident tərəfindən Azərbaycan Respublikasının dövlətin ən yüksək ordeni olan Heydər Əliyev ordeninə layiq görülüb, bu adam bundan sonrakı fəaliyyətində daha yaxşı işlər ortaya qoyacaq. Təəssüf ki, Ramiz Mehdiyev akademiyaya prezident gələndən sonra akademiya Akif Əlizadənin akademiyanı saldığı bataqlıqdan bir az da dərinə getdi. Hətta məlum toy əhvalatından sonra bildirim ki, Ramiz Mehdiyev akademiyadan öz şəxsi müəssisəsi, öz şəxsi obyekti kimi istifadə edir və dövlətin bu qurumunun imkanlarından belə öz şəxsi çirkin məqsədləri naminə yararlanır. Haqlı olaraq o zaman akademiyanın Rəyasət Heyətinin üzvlərini də ittiham etdim. Akademiya kollegial qurumdur, Rəyasət Heyətinin sədri Ramiz Mehdiyevdirsə, Rəyasət Heyətinin üzvləri var. Rəyasət Heyətinin üzvləri niyə dinmirlər? Çünki bu adamlar həmişə belə məqam gözləyirlər. Siz inanın ki, sabah birdən Ramiz Mehdiyev işdən azad edilsə həmin adamlar onun əleyhinə danışmağa başlayacaqlar. Bu adamlar Akif Əlizadənin zamanında olan adamlardır, ən azından vitse-prezidentlər onlardır. Onlar Akif Əlizadəyə əl çalırdılar, o vəzifədən gedəndən sonra hətta Ramiz Mehdiyev onu bir qədər tənqid etdi də, amma onlar Ramiz Mehdiyevə əl çaldılar və “düz deyir” dedilər”.
İ.Orucov deyir ki, A.Əlizadə ilə yanaşı o məsuliyyəti Rəyasət Heyətinin üzvləri də paylaşıb. İ.Orucovun sözlərinə görə, Rəyasət Heyətində təmsil olunan şəxslər akademik adına yaraşmayan davranışlar göstərirlər: “Çox təəssüf edirəm ki, onlar da baş verənlərə münasibət bildirmirlər. Mən də eşitmişəm ki, o, “Tərtər işi”nə görə məhkəmə sistemindən uzaqlaşdırılan Kamal Əliyev adlı bir şəxsi akademiyanın hüquq şöbəsinə müdir təyin edib. Mənim fəaliyyətimin çox böyük hissəsi akademiya ilə bağlı olub. Vaxtilə akademiyanın rəhbərliyində, Rəyasət Heyətində elə samballı insanlar təmsil olunurdu ki, o adamlar həqiqətən də mələk kimi insanlar idilər. Akademiyanın Rəyasət Heyətində Akif Əlizadəyə qədər elə adamlar çalışıblar ki, o adamlar kifayət qədər saf insanlar, çox yüksək mədəni-intellektual səviyyəyə malik, akademiyaya yaraşan insanlar idilər. Onlar hər zaman öz fəaliyyətləri ilə elmə xidmət etmişdilər. Amma çox təəssüf ki, sonrakılar akademiyanı belə bərbad vəziyyətə gətirib çıxardılar. Eşitdim ki, indi də akademiyada həmin o Kamal Əliyev Elton Məmmədovu məhkəməyə verib. Çox təəssüf edirəm ki, hələ də Ramiz Mehdiyevin çirkin işləri davam edir. Hələ ki, onun elmə yaraşmayan fəaliyyətini müşahidə edirik, acı mənzərə də olsa sanki bunu izləmək məcburiyyətindəyik. Çox təəssüf ki, belədir” - deyə İ.Orucov vurğuladı.
İradə SARIYEVA
