ABŞ Dövlət Departamenti mayın 27-də “Azərbaycanın bir neçə erməni əsgərini saxlamasından sonra Ermənistan və Azərbaycan arasında yenidən baş qaldırmış zorakılıqla” bağlı narahatlıq ifadə edib.
Dövlət Departamentinin sözçüsü Ned Praysın açıqladığı bəyanatda inanılmaz qərəzli yanaşma sərgilənib. Məsələ ondadır ki, bəyanatda açıq şəkildə erməni terrorçuların tərəfi tutulur: “Biz hər iki tərəfi təcili qaydada və dinc yolla bu insidenti həll etməyə çağırırıq. Biz, eyni zamanda, Azərbaycanı bütün müharibə əsirlərini və başqa saxlananları dərhal azad etməyə çağırmaqda davam edirik və Azərbaycana bütün saxlananlarla insani rəftar göstərməsi barədə beynəlxalq humanitar qanun üzrə öhdəliyinin olduğunu xatırladırıq. Birləşmiş Ştatlar Ermənistan və Azərbaycan arasında beynəlxalq sərhədin demarkasiya olunmamış hissəsində hər hansı hərəkətləri təxribati və qeyri-zəruri hesab edir. Biz sərhədin güc tətbiq etməklə demarkasiyasını rədd edir və hər iki tərəfi ilkin mövqelərinə qayıtmağa və demarkasiya olunmamış sərhəddə hərbi istehkamların qurulmasına və ərazilərin minalanmasına son qoymağa çağırırıq. Biz konkret olaraq Azərbaycanı öz qüvvələrini mayın 11-dək mövcud olmuş mövqelərə relokasiya etməyə çağırırıq. Biz Ermənistanı da öz qüvvələrini 11 mayadək mövcud olmuş mövqelərə çəkməyə çağırır və bu yöndə verilən niyyət bəyanatlarını alqışlayırıq”.
Görünən odur ki, sərhədlərin delimitasiyası və demarkasiyası məsələlərində ABŞ rəsmiləri açıq şəkildə tərəfkeşlik edərək qərəzli mövqe sərgiləyirlər.
“Məlum oldu ki, bu iki dövlət vasitəçi olmaq funksiyasını həyata keçirə bilməyiblər”
Məsələyə münasibət bildirən millət vəkili, politoloq Elman Nəsirovun sözlərinə görə, Birləşmiş Ştatların bu cür qeyri-obyektiv mövqe sərgiləməsi qəbuledilməzdir: “Məlum olduğu kimi, Ermənistan sərhədlərin delimitasiyası məsələsini əsassız olaraq beynəlxalq gündəliyin məsələsinə çevirmək istəyir. Təəssüflər olsun ki, ABŞ-dakı müəyyən dairələr erməni lobbisinin təsiri altına düşərək spontan mövqe sərgiləyirlər. Halbuki, Ermənistan 30 il ərzində ərazilərimizi işğal altında saxlamaqla yanaşı, sərhədlərini qanunsuz olaraq Azərbaycan hesabına genişləndirib. Ancaq təəssüflər olsun ki, ABŞ bir dəfə də olsun buna etiraz etmədi. Azərbaycan 44 günlük uğurlu Vətən müharibəsi sayəsində sərhədlərini bərpa etdikdən sonra, nədənsə, bəzi dövlətlər narahatdırlar. Ermənistanın sərhədlərlə bağlı yaydığı dezinformasiyanın təsirinə düşərək maksimalist mövqedən çıxış edirlər. Paşinyan bəyan edib ki, sərhəd məsələsi ilə bağlı beynəlxalq müşahidəçilər gəlməlidir. Bunlar ABŞ, Fransa təmsilçiləri ola bilər. Halbuki, bu iki dövlətin həm müharibə, həm də ondan sonrakı dövrdə davranışı və bəyanatları bir sıra məsələləri üzə çıxardı. Məlum oldu ki, bu iki dövlət vasitəçi olmaq funksiyasını həyata keçirə bilməyiblər. Fransa başda Makron olmaqla, birmənalı şəkildə, Ermənistanın tərəfində olub. Təəssüflər olsun ki, biz eyni yanaşmanı Birləşmiş Ştatların timsalında da görürük. Dövlət Departamenti məsələnin mahiyyətinə varmadan birbaşa Ermənistanın tərəfini tutan mövqe sərgiləyir. Azərbaycanda 1 nəfər də olsun erməni əsir yoxdur. Bütün hərbi əsirlər 10 noyabrdan sonra qaytarıldı. 10 noyabrdan sonra saxlananlar hərbi əsir deyil. O cümlədən, mayın 27-də Azərbaycan sərhədini keçərək təxribat törətməyə cəhd edənlər də sadalanan kateqoriyaya aid deyil”.
Millət vəkili onu da qeyd etdi ki, ABŞ kimi böyük dövlət erməni lobbisinin təsiri altına düşməməlidir.
Vidadi ORDAHALLI
