Rusiya Federasiyasının prezidenti Vladimir Putin Azərbaycan Prezidenti İlham Əliyevə təbrik məktubu ünvanlayıb. Təbrik məktubunda deyilir:
“Hörmətli İlham Heydər oğlu. Milli bayramınız - Respublika Günü münasibətilə ən səmimi təbriklərimi qəbul edin.
Azərbaycan sosial-iqtisadi, elmi-texniki və digər sahələrdə nəzərəçarpan uğurlara nail olub. Sizin ölkəniz dünya arenasında yüksək nüfuz qazanıb, beynəlxalq gündəlikdəki çoxsaylı mühüm məsələlərin həllində fəal rol oynayır.
Biz Azərbaycanla mehriban dostluq və qarşılıqlı hörmət ənənələrinə əsaslanan münasibətləri yüksək qiymətləndiririk. Əminəm ki, biz birgə səylərimizlə bundan sonra da xalqlarımızın rifahı, regional təhlükəsizliyin və sabitliyin təmin edilməsi naminə bütün sahələrdə strateji tərəfdaşlığı və səmərəli əməkdaşlığı hərtərəfli möhkəmləndirəcəyik. Hörmətli İlham Heydər oğlu, Sizə səmimi qəlbdən möhkəm cansağlığı və uğurlar, bütün həmvətənlərinizə firavanlıq və əminamanlıq diləyirəm”.
Qeyd edək ki, bir neçə gün əvvəl Amerika Birləşmiş Ştatlarının prezidenti Cozef R.Bayden də Prezident İlham Əliyevi təbrik edib. Amerika xalqı adından Prezidenti və Azərbaycan xalqını 28 May – Respublika Günü münasibətilə səmimi salamlayan ABŞ prezidenti diqqəti ölkəmizin uğurlarına yönəldib. Ancaq Baydenin məktubunda diqqət çəkən bir məqam da vardı: “Münaqişə və koronavirus pandemiyası ilə yadda qalan bir ildən sonra Azərbaycanın bu çətinliklərdən insan hüquqlarına və əsas azadlıqlarına hörmət etməklə və qonşuları ilə sülh içində yaşamaqla daha da firavan bir dövlət kimi çıxmasına ümid edirəm”.
Göründüyü kimi, Bayden Azərbaycanı pandemiya ilə bağlı mübarizədə insan haqlarının qorunmasına çağırır. Bir daha aydın olur ki, Bayden hər fürsətdə Azərbaycanı qaralamağa çalışan bəzi qərəzli beynəlxalq təşkilatların və lobbilərin təsiri altındadır. Çünki bu fikri onlar da dəfələrlə inkişaf etdirirdi ki, güya Azərbaycan pandemiya ilə mübarizə adı ilə insan azadlıqlarını məhdudlaşdırır. Məktubda, eyni zamanda, Qarabağ münaqişəsinin mövcudluğuna sətraltı eyham vurulur. Mahiyyət etibarı ilə eynilik təşkil edən, məzmun baxımından isə bir-birindən fərqlənən bu iki məktubla bağlı ekspertlər nə düşünür?
Politoloq Yeganə Hacıyeva “Bakı-Xəbər”ə bildirdi ki, ölkələrin əlamətdar günlərində belə məktublar protokol qaydasına uyğun olaraq göndərilir: “Biz sizinlə ABŞ-ın bundan əvvəlki prezidentinin müxtəlif əlamətdar günlərdə ünvanladığı təbrik məktubu ətrafında müzakirələr aparmışıq. Çox maraqlıdır ki, bizim diqqətimizi bu xüsusda daha çox ABŞ prezidentlərinin təbrik məktubları cəlb edir. Çünki hər bir təbrik məktubunda bir neçə sətiraltı ifadə olur. Bu da əlavə təhlillərə, müzakirələrə yol açır. Çünki həmin ifadələr dünyanın super ölkəsi olan ABŞ-ın rəhbərinin dilindən səslənir. Builki məktubda da belə detallara rast gəlindi. Bayden koronovirusla bağlı mübarizədə dolayısı ilə bizə irad tutur, həm də Qarabağ münaqişəsinin həllində yardım göstərəcəkləri vədini verir. Hər iki fikir məktubun məzmununa uyğun deyil. Çünki Azərbaycan pandemiya ilə mübarizədə örnək sayılacaq mövqe ortaya qoyub. Qarabağ münaqişəsinin artıq mövcud olmadığını isə Prezident İlham Əliyev dəfələrlə bəyan edib. Biz Rusiya prezidentinin məktubunda belə sətiraltı ifadələrə rast gəlmirik. Yəqin ki, bu da Rusiyanın Qarabağdakı hazırkı status və rolundan məmnun olmağından irəli gəlir”.
Məhəmmədəli QƏRİBLİ
