Bir toplumun ki, dini rəhbəri separatçıdır, antisülh mövqeyi tutur və öz xalqını fəlakətə sürükləyir, o toplumun gələcəyi yoxdur. Bütün ermənilərin katolikosu II Qaregin uzun illərdir ki, bölgədə sülhün, əmin-amanlığın təmin edilməsinə maneə törətməklə məşğuldur. II Qareginin hər bir addımı, açıqlaması separatizmə, revanşizmə rəvac verir.
“Sputnik Armeniya” “Müqəddəs Eçmiədzin” kilsəsinin mətbuat bürosunun rəhbəri Vahram Melikyana istinadən yazır ki, II Qaregin Zəngəzura və Qarabağa səfər edəcək. Bildirilənə görə, bütün ermənilərin katolikosu “Artsax”dakı müxtəlif bölgələri ziyarət edəcək. Səfərin tarixi konkret olaraq açıqlanmır, bu barədə yaxın günlərdə məlumat veriləcəyi qeyd edilir. İlkin məlumatlara görə, II Qaregin gələn həftənin sonunda bölgəyə yola düşəcək. Bunun separatçı katolikosun müharibədən sonra Qarabağa ilk səfəri olduğu deyilir.
Azərbaycan ərazisinə qanunsuz səfərə hazırlaşan II Qareginin bu səfəri etməsinin səbəbi aydındır, onun məqsədi Qarabağdakı separatçı qüvvələrə dəstək verməkdir. Hazırda Zəngəzurda da vəziyyətə müdaxilə etmək istəyən katolikos heç cür bölgədə sülhün təmin edilməsini istəmədiyini ortaya qoyur.
Ekspertlər deyirlər ki, katolikosun Qarabağa qanunsuz səfərinin qarşısının alınması üçün konkret tədbirlər görülməlidir.
“Sual oluna bilər ki, axı Qareginin Qarabağda, Azərbaycanın ərazisində nə işi var...”
Siyasi ekspert Rövşən Rəsulov “Bakı-Xəbər”ə bildirdi ki, II Qareginin açıqlanan səfəri qanunsuzdur və onun qarşısı alınmalıdır: “Bütün ermənilərin katolikosu II Qareginin Qarabağa və Zəngəzura planlaşdırılan qanunsuz səfərlərinin qarşısı alınmalıdır”.
Onun sözlərinə görə, istər Ermənistanın ictimai-siyasi adamları, istərsə də erməni din adamları tərəfindən belə bir addımların atılması, ilk növbədə, 9-10 noyabr üçtərəfli bəyanatın icra olunmasına əngəllər yaradır və buna da hesablanıb. Eyni zamanda, o da məlumdur ki, münaqişə başlayan dövrdən hazırkı zamana qədər ermənilər Qarabağ məsələsini dini müstəviyə yönəltməyə cəhdlər göstəriblər: “Ümumiyyətlə, xristian klubunun üzvü olaraq daim bu cameədən dəstək gözləyən erməni cəmiyyəti, əslində, din pərdəsi altında öz mənfur, təxribatçı planlarını icra etmək məqsədindən daşınmayıb və zaman-zaman biz bu faktları müşahidə etməkdəyik. Sual oluna bilər ki, axı Qareginin Qarabağda, Azərbaycanın ərazisində nə işi var və onun Rusiya sülhməramlıları kontingentinin nəzarətində olan Laçın dəhlizindən buraxılması ehtimalına şərait yaradanlar bu qərarlarını nə ilə, qəbul olunmuş hansı müvafiq müddəalarla əsaslandıra bilərlər? Əlbəttə, bu, kirli məqsədli səfər cəhdidir, ona görə də həmin səfərin qarşısının alınması üçün rəsmi qurumlarımız qəti tədbirlərə əl atmalıdırlar. Əks halda, belə qanunsuzluqlar ənənəvi xarakterə keçid alaraq daha da çoxalacaq”.
Ekspert qeyd edib ki, bütövlükdə, erməni qriqorian kilsəsi münaqişənin qızışdırılması, günahsız insanlarımızın qanlarının axıdılması, terror və qətliamların törədilməsi üçün uzun illərdən bəri öz xeyir-duasını verib və biz bunu istər Birinci Qarabağ müharibəsi zamanı, istərsə də İkinci Qarabağ müharibəsində gördük: “Görünür, Qareginin səfər planlarından biri də sarsıdıcı məğlubiyyətə uğramış və demək olar ki, yox səviyyəsinə düşmüş erməni ordusuna süni ruh verməyə hesablanıb. Hətta belə bir məlumat da var ki, erməni katolikosu hazırda sərhədlərimizin müəyyənləşdirilməsi prosesi aparılan Zəngəzur bölgəsinə də getmək fikrindədir. Belə düşünürəm ki, Qaregin son vaxtlar bu bölgələrdə məhz özləri tərəfindən yaradılan gərginlikdən istifadə edərək müəyyən Qərb dairələrinə mesajlar yollamaq məqsədini daşıyır. Yəni demək istəyir ki, “görürsünüz, azərbaycanlılar həm Qarabağda, həm də Zəngəzurda “dünyanın ən qədim, ən birinci” xristianlarını əzir və buna qarşı tədbirlər görülməli, sanksiyalar irəli sürülməlidir. Axı sərhədlərin delimitasiyası aparılan bölgələrdə din xadiminin təxribat törətmək məqsədindən başqa nə işi ola bilər ki?”.
Rövşən Rəsulov sonda onu da qeyd edib ki, artıq belə arzuolunmaz halların yaşanılmaması üçün konkrert, qətiyyətli addımlara gedilməli, uzunmüddətli sülh prosesinin yaradılması istiqamətində şərtlər daha da dəqiqləşdirilməlidir: “Əks halda, belə məsələlər, nəticə etibarilə, Azərbaycanın səbrini yenidən tükəndirə bilər. Biz unutmamalıyıq ki, cənab Ali Baş Komandan İlham Əliyev dəmir yumruğun qüvvədə qaldığını və hər an düşmənin başına endiriləcəyini dəfələrlə bəyan edib. Ona görə də ya Qaregin olsun, ya da digər təxribatçı erməni cəmiyyətinin üzvləri – onlar bu cür səfərlərinə birdəfəlik yekun vurmalıdırlar, əlbəttə ki, öz təhlükəsizliklərini təmin etmək üçün. Çünki hər hansı hadisə baş verərsə, onun məsuliyyətini də özləri daşımalı olacaqlar”
İradə SARIYEVA
