Bakıdan Polad Bülbüloğlu, Kamal Abdulla, Fərhad Bədəlbəyli, Bayram Səfərov, Gündüz Əbdulov, Rövşən Ağayev, Vüsalə Fətəliyeva, Əkbər Hacıyev, Təvəkkül Əliyev, Rövşən Bayramov və başqaları Prezident İlham Əliyevə müraciət ediblər:
“Azərbaycanın Şanlı Qələbə qazanaraq öz ərazi bütövlüyünü tam təmin etməsi çoxəsrlik dövlətçilik tariximizin ən parlaq Zəfəridir. Möhtəşəm Qələbə rəhbərliyinizlə 44 gün müddətində Müzəffər Ordumuzun şücaəti ilə əldə olundu, dünyada Azərbaycan məğrur, qalib ölkə kimi tanındı, 28 illik həsrətə son qoyuldu, erməni vandalizmindən dağılan, yandırılan şəhərlər, kəndlər, qəsəbələr yeni həyata başladı. Şuşanı Azərbaycan Mədəniyyətinin Paytaxtı elan etməyiniz tarixi Qələbədən sonra Şuşa şəhərinə verdiyiniz böyük dəyərdir. Azərbaycan mədəniyyəti tarixində Şuşada muğamın, musiqinin, ədəbiyyatın, xalçaçılığın, dekorativ sənətin, rəssamlığın, teatr sənətinin inkişafının müstəsna əhəmiyyəti olmuşdur. Bir zamanlar “Azərbaycanın musiqi beşiyi” və “Şərqin konservatoriyası” adlandırılan, bir sıra görkəmli xadimlərin Vətəni olan Şuşa – mədəniyyət, incəsənət tarixidir.
... Şuşanın azad edilməsi gününün - 8 noyabr tarixinin Böyük Zəfər günü kimi qeyd edilməsinə dair Sərəncam verməyiniz, Şuşanın Azərbaycan Mədəniyyətinin Paytaxtı elan etməyiniz qədim tarixi olan Şuşaya və Azərbaycan mədəniyyətinə verdiyiniz böyük qiymətdir. Poeziya, musiqi beşiyi sayılan tarixi mədəniyyət şəhərində işğaldan əvvəl keçirilən Vaqif poeziya bayramlarının, Xarı Bülbül musiqi festivallarının ənənəsini 30 ildən sonra yenidən yaşatmaq üçün verdiyiniz tapşırıqlar şuşalılara, həm də Azərbaycan mədəniyyətinin sənətkarlarına, xalqımıza misilsiz sevinc gətirdi. O günlərin yaddaşında olan və heç vaxt unudulmayan bayramlarda ulu öndər Heydər Əliyev, akademik Zərifə xanım və gənc yaşınızda Siz də iştirak edirdiniz. Həmin günlərin xatirəsində bərpa edilən xatirələrin, M.P.Vaqifin məqbərəsinin, X.B.Natəvanın abidəsinin açılışları, Sovetlər məkanından gələn tanınmış mədəniyyət xadimləri ilə görüşlər, məşhur şair və musiqiçilərin iştirakı ilə konsert proqramları möhtəşəm bayram günləri idi. Bu ənənəvi günləri qaytarmaq üçün verdiyiniz tapşırıqlar hər birimizə böyük fəxarət hissi yaşatdı. Cabbar Qaryağdıoğlunun, Seyid Şuşinskinin, Xanın, Bülbülün, Niyazinin, Rəşid Behbudovun, Əşrəf Abbasovun, Süleyman Ələsgərovun, Vasif Adıgözəlovun, Lətif Kərimovun, Toğrul Nərimanbəyovun, Mir Mövsüm Nəvvabın, Xurşid Banu Natəvanın, Qasım bəy Zakirin, Əbdürrəhim bəy Haqverdiyevin, Nəcəf bəy Vəzirovun, Yusif Vəzir Çəmənzəminlinin, Əhməd bəy Ağaoğlunun, Mehmandarovların, Bədəlbəylilərin, Əmirovların və bir çox başqa insanların vətəni Şuşa azad günlərini yaşayır və orada bərpa, təmir işlərinə başlanılıb.
...Əziz Şuşanın Mədəniyyət Paytaxtı elan olunmasına görə bütün Şuşa ziyalıları adından Sizə dərin minnətdarlığımızı bildiririk. Arzumuz Sizinlə, Birinci vitse-prezident Mehriban xanım Əliyeva və ailənizin digər üzvləri ilə birlikdə Şuşada keçirilən poeziya və musiqi bayramlarında iştirak etməkdir. Azərbaycan Mədəniyyətinin Paytaxtı Şuşanın daha gözəl, memarlığın bütün zərifliyini, ahəngdarlığını, tarixiliyini özündə əks etdirəcək füsunkar şəhər olacağına inanaraq Sizə hər bir qərarınızda uğurlar, aydın yollar arzulayırıq.
Allah Sizi qorusun!”
Baki-xeber.com
