Ermənistanda ciddi demoqrafik böhran yaşandığı gizlin deyil. Son 30 ildə bu ölkənin əhalisi sürətlə azalıb. Düşmən ölkədə mövcud olan sosial-iqtisadi, siyasi böhran nəticəsində əhalinin sürətlə başqa ölkələrə üz tutduğu faktdır.
Belə bir vəziyyətdə Ermənistan prezidenti Armen Sarkisyan Ermənistanın sürətlə boşalmasının qeydinə qalmaq əvəzinə, Qarabağın erməni əhalisinin sayının azalmasının “nigarançılığını” çəkir. A.Sarkisyan “Ermənistan demoqrafiya məsələlərində məğlub oldu. Dağlıq Qarabağda əhalinin sayı 20 min nəfər azalıb. Halbuki, bu əraziləri məskunlaşdırıb əhalinin sayını artırmaq lazımıydı” - deyə müsahibəsində bildirib.
“Ermənistan prezidenti bu saxta rəqəmi gündəmə gətirməklə xaricdəki havadarlarına bir mesaj ötürür ki...”
AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə bildirdi ki, Ermənistan prezidenti Qarabağın erməni əhalisinin demoqrafik vəziyyətinin pis olduğunu, onların sayının 20 min nəfər azaldığını deməklə yeni bir oyun ssenarisi qurulduğunu ortaya qoyur. M.Zülfüqarlının sözlərinə görə, əslində, Qarabağda yaşayan ermənilərin sayı həmişə az olub, sadəcə olaraq, Sovet dövründə və ondan sonrakı illərdə bu bölgədə erməni əhalisinin sayı bir neçə qat şişirdilərək sənədləşdirilib. Ermənilərin Çar Rusiyası dövründə Qarabağ əhalisinin kameral siyahıya alınması sənədini son 30 ildə saxtalaşdırdıqlarını deyən M.Zülfüqarlının sözlərinə görə, heç zaman Qarabağın erməni əhalisinin sayı doğru-dürüst təqdim edilməyib. “1918-ci ildə ermənilər bizim torpaqlarımızda özlərinə dövlət yaradıblar və BMT də həmin ərazini Ermənistan dövləti kimi tanıyır. Ermənistan bizim torpaqlarımızda qurulub. Armen Sarkisyanın və başqa erməni rəsmilərinin ağılları olsaydı, onlar Ermənistanın özünün acınacaqlı durumda olan demoqrafik vəziyyəti haqqında düşünərdilər. İkinci Qarabağ müharibəsində biabırçı məğlubiyyətlərindən sonra Paşinyan hökuməti sərsəmləməyə, uydurma bəyanatları ilə beynəlxalq aləmi çaşdırmağa çalışır. Ermənistan rəhbərliyi uzun illərdir xaricdəki himayədarlarının hesabına həmişə separatizmi, faşizmi dəstəkləyib. Ermənistan Sovet dövründən başlayaraq Qarabağın erməni əhalisinin sayını süni surətdə artırmağa başlayıb. Çar dövrünün kameral siyahılarında Qarabağın erməni əhalisinin sayı göstərilib, sonradan ermənilər bu siyahını da saxtalaşdırmağa cəhdlər ediblər. Sovet dövründə Ermənistanın müxtəlif şəhərlərində, eləcə də Rusiyada və digər yerlərdə yaşayan erməniləri Qarabağda qeydiyyata salmaqla buradakı ermənilərin sayını süni surətdə şişirdiblər. Onlar Qarabağda qeydiyyatda olan ermənilərin sayını ona görə süni surətdə artırırlar ki, sonrakı mərhələdə hansısa üstünlük əldə etsinlər. Amma bu, cılız yanaşmadır. Ermənilərin sayı azdır, ümumiyyətlə, ermənilər artıma meylli toplum deyil. Ermənistan rəhbərliyi daim saxta, yalan məlumatlar hazırlayaraq Qarabağda ermənilərin sayının çox olduğunu, müharibə zamanı isə azaldığını iddia edir. Amma vəziyyət dəyişib, hər şey ortaya çıxıb. Müharibədən sonra Ermənistanın öz əhalisinin sayı azalıb. Sarkisyan iddia edir ki, guya Qarabağda ermənilərin sayı müharibədən sonra 20 min nəfər azalıb. Ermənistan prezidenti bu saxta rəqəmi gündəmə gətirməklə xaricdəki havadarlarına bir mesaj ötürür ki, “Qarabağdakı ermənilərin sayı azalıb, bura xaricdən ermənilər göndərin, say düzəlsin”. Əslində, burada məqsəd odur ki, Qarabağda ermənilər üçün hər hansı bir status əldə edilməsinə nail olsunlar. Cənab Prezident də deyib ki, status cəhənnəmə getdi, ermənilərə heç bir status verilməyəcək, onlara status yoxdur. İndi Sarkisyan yenə də köhnə bayatılar danışıb xarici havadarlarından kömək gözləyir ki, həmin dövlətlər Qarabağın erməni əhalisinə hansısa bir status alsın. Bu mümkün olan iş deyil. Artıq dünya dəyişib, Azərbaycan da dəyişib, artıq dünyada güclü və nüfuzlu Azərbaycan dövləti var. Azərbaycanın dünyanın bütün məsələlərə real baxması üçün təsir imkanları var. Sarkisyan Qarabağın erməni əhalisinin sayının azaldığını ortaya atmaqla yenə də cılız oyunlar oynayır. Sarkisyan bu cılız oyunu oynamaqdansa, Qarabağın erməni əhalisinin sayını süni surətdə artırmağın yollarını axtarmaqdansa, gedib son 30 ildə boşalan, əhalisi köçüb müxtəlif xarici ölkələrə gedən Ermənistanın qeydinə qalsın. Müharibədə məğlub olduqdan sonra Ermənistanın özündə demoqrafik böhran lap pik həddinə çatıb”.
Qarabağın erməni əhalisinə heç bir status, muxtariyyət verilməyəcəyini qeyd edən M.Zülfüqarlı hesab edir ki, ermənilər ya Azərbaycan vətəndaşları kimi burada yaşayacaq, bizim vətəndaşımız kimi yaşamaq istəməsələr isə gedəcəklər. Həmin bölgədə Azərbaycan vətəndaşı olan ermənilərin digər vətəndaşlarımız kimi bələdiyyə və sair seçkilərdə iştirak edə biləcəyini deyən M.Zülfüqarlı hesab edir ki, onlar dövlətimizin vətəndaşları kimi Konstitusiyamıza uyğun bütün imkanlardan istifadə edə biləcəklər, amma onlara hər hansı bir status verilməsi mümkün deyil.
İradə SARIYEVA
