Müharibədəki məğlubiyyətdən sonra ağır sosial-iqtisadi problemlər məngənəsində boğulan Ermənistan sonu görünməyən tənəzzül dövrünü yaşayır. Siyasi ziddiyyətlər paralel şəkildə digər sferalardakı mövcud problemləri dərinləşdirib. Ermənistanda iqtisadiyyat, faktiki olaraq, iflic olub, əhalinin səfaləti isə artıb.
Ermənistan böhran içində olduğunu elə həmin ölkənin prezidenti Armen Sarkisyan da etiraf edir. Bunun ən pisi həm də emosional-psixoloji böhrandır: “Çünki təkcə Ermənistan dövlətçiliyinin deyil, erməni insanının imicinə böyük zərbə vurulub. Ağır məğlubiyyət yükünü təkcə Ermənistanın bugünkü nəsli deyil, gələcək nəsil də daşıyacaq. Ermənistan diz üstə çöküb və ayağa durmalıdır. Ancaq necə? Hökumət istefaya getməlidir. Belə təlatümdən sonra istənilən hökumət mandat almalıdır. İndiki hökumət seçiləndə Ermənistan tam fərqli bir dövlət idi, indi isə ermənilər başqa bir dövlətdə yaşayırlar. Ermənistan ağır sosial-iqtisadi böhran içindədir. Səhiyyə, koronavirus, müharibədə itkilər, onların ailələri. Onlara pensiyalar lazımdır, psixoloji yardım göstərilməlidir. Cəbhədən qayıdan yaralılar, hərbçilərlə kim məşğul olacaq? Onlar haradan iş tapacaqlar? Biz təkcə dövlətin deyil, millətin böhranını yaşayırıq – səhiyyə, maliyyə, iqtisadi, psixoloji, humanitar və bütün sahələrdə böhrandır”.
Ermənistan prezidenti bildirir ki, cəbhədən qayıdan yaralılar, hərbçilər, şəhid ailələrinə dövlət tərəfindən sosial təminat verilməsi çətin olacaq.
“Ermənistan tərəfi hazırda iflas ərəfəsindədir, məğlub olan ölkə yaralı hərbçilərə, vəfat edən hərbçilərin ailələrinə dəstək ola bilmir”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə açıqlamasında qeyd etdi ki, müharibə xərc deməkdir: “Ermənistan tərəfi hazırda iflas ərəfəsindədir. Məğlub olan ölkə yaralı hərbçilərə, vəfat edən hərbçilərin ailələrinə dəstək ola bilmir. Öz əsgərlərinə kömək edə bilməyən dövlət öz sonunun gəldiyini etiraf etməlidir. Dünyada belə bir təcrübə var. Çətin vəziyyətdə olan əhaliyə kömək edə bilməyən dövlət iflas və tükəndiyini etiraf edib, başqa bir ölkənin rəsmən himayəsinə keçməlidir”.
QAT sədri onu da əlavə etdi ki, Ermənistan Azərbaycanın gücü qarşısında məğlubiyyəti etiraf etmək məcburiyyətindədir. Ermənistan artıq yaxşı başa düşüb ki, onların 30 il boyunca formalaşdırdığı ideya iflasa uğrayıb. Onların ümid etdiyi hər şey artıq tarixdə qaldı. Düşmən uduzduğunu etiraf edir. Azərbaycan haqq-ədaləti bərpa etdi.
Günel CƏLİLOVA
