Məlum olduğu kimi, Türkiyə hərbçilərinin Azərbaycana göndərilməsinə dair Prezident Rəcəb Tayyib Ərdoğanın Türkiyə Böyük Millət Məclisinə ünvanladığı memorandum mütləq səs çoxluğu ilə təsdiqlənib. Parlamentdə müzakirəyə çıxarılan və türk əsgərlərinin rusiyalı hərbçilərlə birgə monitorinq mərkəzində iştirakını nəzərdə tutan sənədlə bağlı səsvermədə iştirak edən beş partiyadan dördü qərarın lehinə səs verib. Belə ki, hakim AKP və MHP ilə yanaşı müxalif CHP və İYİ Partiya da birmənalı şəkildə türk əsgərinin Azərbaycana gəlişini dəstəkləyib. İclasda AKP-ni təmsil edən millət vəkili İsmət Yılmaz çıxış edərək, sənədin Azərbaycan üçün əhəmiyyətini önə çəkib və partiyasını təmsil edən millət vəkillərini qərarın lehinə səs verməyə çağırıb. CHP-ni təmsil edən Engin Altay isə Azərbaycan üçün qardaşlarımız deyə müraciət edərək, “Azərbaycanda diş ağrısa, bizdə baş ağrıyar” ifadələrini işlədib və partiyasının sənədin lehinə səs verəcəyini söyləyib. Nəticədə 4 partiya həmrəylik göstərərək, türk əsgərinin Azərbaycana gəlişinə “yaşıl işıq” yandırıb.
Yalnız terrora açıq dəstək verən müxalif HDP qərarın əleyhinə səs verib. Partiyanın təmsilçisi bunu “sülh və danışıq tərəfdarları” olduqları ilə izah edib. Halbuki, türk əsgəri bölgəyə əslində elə sülhü təmin etmək üçün gəlir. Bununla da ermənipərəst mövqeyini heç zaman gizlətməyən bu partiya növbəti dəfə terrorun və separatizmin yanında olduğunu təsdiqləyib. HDP ermənilərə açıq dəstək vermək cəsarətini hardan alır?
“Bu cür partiyanın, nəinki parlamentdə təmsilçiliyi, ümumiyyətlə qeydiyyatı ləğv edilməlidir”
Politoloq Əhəd Məmmədli “Bakı-Xəbər”ə açıqlamasında bildirdi ki, əslində bu partiyanın mövqeyi bizə təəccüblü gəlməməlidir: “HDP bu məsələyə dəstək versəydi bizə təəccüblü gələrdi. Çünki bu partiyanın işi-gücü türk düşmənlərini dəstəkləməkdən ibarət olub. Onların nizamnamə və proqramında da açıq-aydın yazılır ki, belə mövqe sərgiləyə bilərlər. 2016-cı ilin Aprel döyüşləri zamanı da onlar bu cür davranmışdılar. HDP ümumiyyətlə Türkiyə-Azərbaycan yaxınlaşmasına qarşı çıxır. Əminəm ki, sabah Türkiyə başqa bir ölkə ilə müharibə belə etsə, HDP Ankaranın rəqibinə dəstək verəcək. Mənə elə gəlir ki, bu cür partiyanın, nəinki parlamentdə təmsilçiliyi, ümumiyyətlə qeydiyyatı ləğv edilməlidir. HDP PKK terror təşkilatının bazası əsasında qurulan, terroru dəstəkləyən partiyadır. Abdullah Öcalana olan simpatiyalarını açıq etiraf edirlər. Onların siyasi qolu funksiyasını həyata keçirirlər. Tərkiblərində Karo Paylan kimi erməni əsilli deputat var. Bu deputat açıq şəkildə qondarma “DQR”i dəstəkləyirdi, ora səfərlər edirdi. Daima Türkiyənin əleyinə danışır və saxta erməni iddialarını dəstəkləyir. Bütün bu rəzalət HDP-nin bayrağı altında baş verir. Həmin partiya yalnız Azərbaycan-Türkiyə münasibətlərinə xələl gətirmir, bütövlükdə Türkiyə dövlətçiliyi üçün təhdiddir. Biz 44 günlük savaşda PKK-çıların Ermənistan tərəfdən vuruşduğunu gördük. Həmin PKK ilə HDP-nin heç bir fərqi yoxdur. Bu səbəbdən də, onlardan hansısa yaxşı addımı gözləməyə də dəyməzdi. Bütün bunlar Türkiyəyə əsas verir ki, HDP ilə bağlı məsələni yenidən nəzərdən keçirsin”.
Müsahibimizin sözlərinə görə, HDP-nin bu cəhdləri Türkiyənin siyasətini dəyişmək gücündə deyil, yalnız könül bulandıra bilər.
Məhəmmədəli QƏRİBLİ
