Ermənilər tərəfindən girov götürülən azərbaycanlılar Dilqəm Əsgərov və Şahbaz Quliyev Şuşa həbsxanasından köçürülüblər. Bu barədə mediaya D.Əsgərovun oğlu Kürdoğlu Əsgərov deyib.
O bildirib ki, bu barədə oktyabrın 4-də ona Beynəlxalq Qırmızı Xaç Komitəsinin əməkdaşları məlumat veriblər: "Komitədən zəng vurub bildirdilər ki, atamı və Şahbaz Quliyevi Şuşa həbsxanasından Ermənistana aparıblar. Komitə əməkdaşları dedilər ki, onları Ermənistanın konkret hansı ərazisinə apardıqları haqda məlumatları yoxdur. Hazırda onların yeri dəqiqləşdirilir. Saxlandıqları yer müəyyən ediləndən sonra komitə əməkdaşları onlara baş çəkəcək və sonra bizə məlumat verəcəklər. Sadəcə, bildirdilər ki, girovların bundan sonrakı durumları ilə bağlı bizi xəbərdar edəcəklər".
Maraqlıdır, ermənilər D.Əsgərovla Ş.Quliyevi Şuşa həbsxanasından niyə köçürüblər?
“…Şuşa həbsxanasından təcili çıxarıblar”
Qarabağ Azadlıq Təşkilatının (QAT) sədri Akif Nağı bildirdi ki, ermənilər D.Əsgərov və Ş.Quliyevin Azərbaycana qaytarılması ilə bağlı beynəlxalq təşkilatların müraciətini və təklifini dəfələrlə heçə sayıblar: “Ermənilər əsirlikdə olan Azərbaycan vətəndaşları ilə bağlı şou düzəldirlər”.
Həmsöhbətimiz hesab edir ki, ermənilərin Dilqəm Əsgərovla Şahbaz Quliyevi Şuşa həbsxanasından köçürmələrinin səbəbləri var. Onlar bizim vətəndaşlardan məkrli şəkildə istifadə etmək istəyirlər: “Çox güman ki, işğalçı ölkə onlardan siyasi məqsədlə istifadə edəcək. Əsirlikdə olan hər bir Azərbaycan vətəndaşı bizim üçün dəyərlidir. Onların geri alınması üçün hökumət tərəfindən lazımi işlər görülür. Qeyd etdiyim kimi, ermənilər öz hiyləgər əməllərinə sadiq qaldıqları üçün Dilqəmlə Şahbazı Şuşa həbsxanasından köçürüblər. Məlumdur ki, Azərbaycan Ordusu hər gün işğal altında olan torpaqlarımızı azad edir. Ermənilər hərbi əsirlərdən siyasi məqsədlə istifadə etmək istədikləri üçün onları Şuşa həbsxanasından təcili çıxarıblar”.
Günel CƏLİLOVA
