Qarabağ separatçılarının lideri Araik Arutyunyan xüsusi bəyanatla çıxış edib. A.Arutyunyan işğalçı "administrasiya" əməkdaşlarının Qarabağdan və Xankəndidən qaçdıqlarını bəyan edib: "Qarabağı tərk edən bütün ali və aşağı rütbəli dövlət qulluqçuları işdən azad olunacaq və məsuliyyətə cəlb ediləcəklər”.
A.Arutyunyan əmin edib ki, Qarabağı tərk etmiş "dövlət xidmətçilərinin" biabırçı davranış faktları ilə əlaqədar ictimai platformalarda gedən müzakirələr nəzərə alınmaqla, hamı barəsində işdən çıxarılma haqqında qərar, eləcə də vəziyyətə müvafiq qanunla nəzərdə tutulmuş digər sanksiyalar tətbiq olunacaq.
Araik Arutyunyan Qarabağdan qaçan məmurların adlarını və elan edib: "köməkçi Rudik Martirosyan, baş prokurorun müavinləri Erik Verdiyan və Sasun Qabrielyan, dövlət statistika şurasının üzvü Armen Soqomonyan, respublika mərkəzi seçki komissiyasının üzvü Yeqiş Arzumanyan, əmək, sosial və mənzil məsələləri nazirinin birinci müavini David Ovanesyan, şəhərsalma nazirinin müavini Erik Qriqoryan, təhsil, elm və mədəniyyət nazirliyinin aparat rəhbəri Qarik Ayrapetyan, dövlət gəlirləri komitəsinin aparat rəhbəri Artak Arustamyan, prezident aparatının hökumət işləri üzrə idarəsinin rəis köməkçisi".
Bu faktın özü bir daha sübut edir ki, Qarabağdakı xunta rejimi sonunun çatdığını bilir. Separatçı “məmurların” bu hərəkəti nəyə dəlalət edir?
Politoloq Rəşad Bayramov qəzetimizə açıqlamasında bildirdi ki, bu, ermənilərin Qarabağda sonlarının çatdığına daha bir əyani sübutdur: “Müharibə başlayanda çox arxayın bəyanatlar verən separatçılar hazırda gizlənməyə siçan yuvası axtarır. Onlar reallığa uyğun davranırlar. Prezidentimiz də dedi ki, Azərbaycan Ordusu Şuşaya bir nəfəs qədər yaxındır. Bu mötəbər məlumatdan bu nəticə çıxır ki, Qarabağdakı müharibənin taleyi tam həll olunmaq üzrədir. Çünki Şuşa olduqca strateji şəhərdi. Ordumuz ora tam nəzarəti ələ keçirəndən sonra ermənilərin təslim olmaqdan başqa bir çıxış yolu qalmır. Çünki Xankəndini Ermənistanla birləşdirən yol məhz Şuşadan keçir. Bunu görən xunta rəhbərliyinin yalnız canlarını qurtarmaq şansı qalır. Onlar bilirlər ki, ya ölməlidirlər, ya da əsir düşməlidirlər. Təbiidir ki, bizim əlimizə keçəcəkləri təqdirdə onların məsuliyyəti də ağır olacaq. Azərbaycan ərazisində separatçı fəaliyyət göstərmək xüsusilə ağır cinayət sayılır. Siyahıya fikir verin, demək olar ki, Araik Arutunyanın bütün “komandası” qaçmaq yolunu tutub. Bu artıq xunta rejiminin Qarabağda qalacaqlarına inamlarının olmadığını şərtləndirir. Bununla onlar hakimiyyətlərinin saxtalığını bir daha sübut etmiş oldular. Əminəm ki, Qarabağda cinayət törətmiş bütün canilər və “vəzifəli” şəxslər öz layiqli cəzalarını alacaqlar. Hərbi əməliyyatların gedişində biz hər gün bu kateqoriyadan olan adamların öldürüldüyünü görürük. Onların arasında, hətta Xocalı soyqırımını törədənlər də az deyil. Qondarma qurumun rəhbərliyi bununla həm də sübut edir ki, Paşinyan onları ölümə sürükləyir. Separatçıların rəhbərinin bu məlumatı ictimailəşdirməsi də təsadüfi deyil. Bununla Paşinyana mesaj verilir ki, müharibəni bitirsin. Demək istəyirlər ki, Qarabağda hətta yüksək “vəzifəli” adam da qalmayıb. Yəqin ki, yaxın günlərdə biz Arayik Arutyunyanın özünün də qaçacağının şahidi olacağıq”.
Artıq sonlarının yetişdiyini anlayan xunta üzvləri fərariliyi ölməkdən üstün tuturlarsa, deməli, biz qələbəyə çox yaxınıq.
Məhəmmədəli QƏRİBLİ
