“Ermənistan mülki şəxslərə hücum etməklə Azərbaycanda həmçinin xaos və panika yaratmaq istəyirdi” Bu fikirləri İtaliyanın “La Republica” qəzetinə Prezident İlham Əliyev deyib.
Prezident, həmçinin, “Birinci atəşkəs Moskvada razılaşdırılmışdı, 24 saatdan az vaxt ərzində onlar Ermənistan ərazisindən ballistik raketlə Gəncəyə hücum etdilər. Bu sübut olunub. Rusiya, Fransa, Amerika Birləşmiş Ştatları və bir çox başqa ölkələr ballistik raketin haradan buraxıldığını aşkar edə bilərlər. Odur ki, onlar raketin Ermənistandan buraxıldığını bilirlər. Paşinyan bunu onlar etməyiblər dedikdə yalan danışırdı. Bu, 24 saatdan az müddətdə baş vermişdi və onlar gecə çox namərdcəsinə hücum etdilər, onlar bilərəkdən yaşayış yerinə hücum etdilər və bu iki hücum nəticəsində, demək olar ki, 30 günahsız insan, o cümlədən uşaqlar öldürülmüşdür. İkinci atəşkəs elan olunduqdan beş dəqiqə sonra onlar tərəfindən pozulmuşdu, üçüncü atəşkəsi isə onlar Bərdəyə hücum etməklə pozdular. Beləliklə, bunu edən biz deyilik. Biz nə etməli idik? Əlbəttə ki, biz cavab verdik və bunu etməyə davam edəcəyik. Onlara atəşkəs təcavüzlərini davam etdirmək, bizim azad etdiyimiz torpaqları geri alıb yenidən işğal etməyə cəhd etmək üçün lazım idi. Onlar mülki şəxslərə hücum etməklə Azərbaycanda həmçinin xaos və panika yaratmaq istəyirdilər. Lakin onlar Azərbaycan xalqının ruhunu düzgün hesablaya bilməmişdilər. Bəli, biz bu namərd hücumlardan əziyyət çəkdik. Bu vaxtadək 91 nəfər mülki şəxs öldürülüb, 400-dən çox adam yaralanıb. Lakin bu bizim iradəmizi sındırmadı. Əksinə, bu bizi daha da güclü etdi”- deyə müsahibəsində qeyd edib.
“Biz bu Vətən müharibəsi ilə Ermənistana elə bir zərbə vurduq ki, ermənilər uzun illər özlərinə gələ, ruh düşgünlüyündən xilas ola bilməyəcəklər”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli bildirdi ki, Azərbaycan xalqının milli ruhu o qədər yüksək səviyyədədir, onu düşmənin hər hansı bir təxribatı, terroru ilə sındırmaq, sarsıtmaq mümkün deyil. Bu gün hər bir vətəndaşımızın böyük ruh yüksəkliyinə malik olduğunu deyən F.Ələkbərli hesab edir ki, biz xalq olaraq ruhi-mənəvi cəhətdən çox güclüyük:
“Cənab Prezident tamamilə haqlıdır. Azərbaycan xalqı genetik olaraq cəsurdu, mərddi, düşmən təxribatları, terrorları qarşısında sınmayacaq qədər ruhi-mənəvi baxımdan çox güclüdür. Ermənistan ballistik raketlərlə Gəncəni, Mingəçeviri, Bərdəni və digər yaşayış məntəqələrimizi hədəfə almaqla və dinc əhalimizə qarşı qanlı terror aktları törətməklə hansısa bir nəticə əldə etmək, insanlarımızı təşvişə, qorxuya salmaq istəyirdi. Prezidentin də dediyi kimi, düşmən buna müvəffəq ola bilmədi, xalqımızın milli ruhunu, əzmini sındıra, ruh düşgünlüyü, panika yarada bilmədi. Prezident həqiqəti söyləyir, Ermənistan bizim milli ruhumuzu qətiyyən düzgün hesablaya bilmədi və nəticədə də düşmənin bütün cəhdləri uğursuzluğa düçar oldu. Ermənistan elə zənn edirdi ki, Azərbaycan xalqı 30 il əvvəlki kimi daxili və xarici qüvvələrin təsiri altında panikaya, təşvişə düşə bilər, amma belə olmadı. Bilirsiz ki, o vaxt Ermənistan torpaqlarımızı işğal edərkən içimizdəki bəzi xainlərin əli ilə insanlarımızı öz torpaqlarından çıxmağa məcbur etdilər. 28-30 il bundan əvvəl əhalimiz arasında panika yaranmışdısa, bu da həmin dövrdə həyata keçirilən güclü erməni təbliğatı nəticəsində baş vermişdi. Onda da Azərbaycan xalqı milli ruhunu qoruduğunu, iradəcə güclü olduğunu dünyaya subut etmişdi.
Amma gördüyümüz kimi, bu da müvəqqəti xarakter daşıdı və hazırda rayon, şəhər və kəndlərimizin xeyli hissəsi düşmən tapdağından azad edilib, digərləri isə azad edilməkdədir. Ermənistan elə bilirdi ki, Gəncəyə, Bərdəyə, Mingəçevirə raket atanda insanlarımız qorxuya düşəcək, təşviş keçirəcək və yaşayış yerlərini tərk edəcək. Cənab Prezident də doğru vurğulayıb ki, biz belə məsələlərdə öz gücümüzü, iradəmizi ortaya qoymağı, milli ruhumuzu yaşatmağı bacaran xalqıq. Ermənistanın əsas hədəflərindən biri terror törətməklə insanlar arasında bir qorxu, panika yaratmaq və bununla da üstünlüyü əldə saxlamaq idi. Ancaq terrorçu Ermənistan öz qanlı təxribatları ilə Azərbaycan xalqının iradəsinə, milli ruhuna qalıb gəlməyi bacarmadı, heç bundan sonra da bacarmayacaq. Çünki Azərbaycanda sarsılmaz xalq-dövlət-ordu birliyi mövcuddur, bu, sağlam təməllər üzərində qurulub. Müzəffər Azərbaycan ordusu torpaqlarımızı bir-birinin ardınca düşməndən azad edir. Xalqımızın dəstəyi, inamı və sevgisi ilə ordumuz torpaqlarımızın qalan hissəsini də böyük milli ruhla, güclü əzm və iradə ilə işğaldan azad edəcək. Bizim inamımız bütövdür. Azərbaycan xalqının nə böyüyü, nə uşağı ölümdən qorxur, düşmənin heç bir təxribatından sınmır. Türk övladı at belində doğulub, at belində qəhrəmanlıq göstərib, at belində ya şəhid, ya da qazi olub. Tarixən biz milli ruhu güclü xalqıq”.
F.Ələkbərli qeyd etdi ki, düzdü, son əsrlər bizim milli ruhumuzu sındırmaq üçün düşmənlərimiz saysız təxribatlar həyata keçirsələr də, milli ruhumuzu sındırmağa nail ola bilmədilər. İndən sonra da bunu bacarmayacaqlarını deyən F.Ələkbərlinin sözlərinə görə, son iki əsrin az qala bir hissəsini müstəmləkəçilik həyatı yaşayan xalqımızın bu amillə milli ruhu sınmayıbsa, Ermənistanın topu-tüfəngi, ballistik raketi qarşısında da heç zaman sına bilməz. “Ermənistanın istənilən terroru bizim milli ruhumuzu, iradəmizi sındırmaq gücündə deyil. Dövlət başçısının da vurğuladığı kimi, bu kimi hadisələr nəinki bizim bir addım geri çəkilməyimizə səbəb oldu, əksinə, düşmənin üzərinə daha böyük əzmlə getməyimizə səbəb olub, torpaqlarımızı işğaldan azad etmək istəyimizi birə beş artırır. Erməni terroru nəticəsində həlak olan insanlarımız var, onların arasında uşaqlarımız da var. Bu insanlar Ermənistanın törətdiyi müharibə cinayətlərinin qurbanlarıdır. Erməni təxribatı nəticəsində insanlarımız şəhid olur, analar övladlarını itirirlər, amma bu bir xalq olaraq bizi düşmənlə mübarizə yolundan çəkindirə bilməz. Ölkə başçısımızın da dəfələrlə qeyd etdiyi kimi, Azərbaycan xalqının mübarizəsi haqlı mübarizədir və xalqımız bu haqq yolunda axıracan gedəcək. İnişallah, öz qələbə bayrağımızı yaxın günlərdə Şuşamıza, Xankəndimizə, Laçınımıza, Kəlbəcərimizə və digər doğma torpaqlarımıza sancacağıq. Ümumiyyətlə, biz bu Vətən müharibəsi ilə Ermənistana elə bir zərbə vurduq ki, ermənilər uzun illər özlərinə gələ, ruh düşgünlüyündən xilas ola bilməyəcəklər. Ermənistan Azərbaycanın Vətən müharibəsində xalqımızın, ordumuzun ortaya qoyduğu iradəni, birliyi, böyük ruh yüksəkliyini əbədiyyətə qədər unutmayacaq. Çünki həqiqətən də Azərbaycan xalqı, Azərbaycan dövləti, Azərbaycan əsgəri həm ön, həm də arxa cəbhədə bir qəhrəmanlıq dastanı yazır”-deyə F.Ələkbərli vurğuladı.
İradə SARIYEVA
