Ermənistan parlamentinin “Çiçəklənən Ermənistan” fraksiyasından olan deputatı Qevork Petrosyan Qarabağda uğursuzluqlarını etiraf etmək məcburiyyətində qalıb. Petrosyan bu barədə öz “Facebook” səhifəsində yazıb.
O qeyd edib ki, oğlu da hərbi əməliyyatlarda iştirak edir və 20 gündür ondan heç bir xəbər yoxdur: “Paşinyan populist çıxışlarını dayandırmalıdır. Müharibə başlayanda şou göstərdi, qadınlardan ibarət batalyonlar yaratdı, bütün məmurların döyüşə gedəcəyini söylədi. Bəs onlar haradadır, niyə cəbhəyə getmədilər?”. Erməni deputat N.Paşinyanın ordu üçün mülki şəxslərdən hərbi forma istəməyinə də öz münasibətini bildirib: “Nikol deyir ki, kimin hərbi forması varsa, qoy onu götürüb cəbhəyə getsin. Bu nə münasibətdir?! Forma yoxdur! Silah yoxdur! Qida yoxdur! Bəs büdcə haradadır?! Bəsdir, oyanın! Sonra çox gec olacaq!”.
Qeyd edək ki, artıq erməni deputatlar, rəsmilər Ermənstan ordusunda problemlər yaşandığını və Paşinyanın bunun səbəbkarı olduğunu başa düşürlər.
“Hərbi geyim, qida, dərman təminatının yetərincə olmaması Ermənistan hakimiyyətində təmsil olunanların, o cümlədən, əhalinin də haqlı narazılığına səbəb olur”
Millət vəkili Aydın Mirzəzadə “Bakı-Xəbər”ə açıqlamasında qeyd etdi ki, erməni siyasi mətbəxində problemlər çoxdan baş qaldırıb: “Hazırda Ermənistan bərbad durumdadır. Xüsusən də işğalçı ölkənin maddi imkanları elə də böyük deyil. Azərbaycan Ordusunun işğal altında olan torpaqları geri alması uğrunda apardığı mübarizə Ermənistan silahlı qüvvələrini və iqtisadiyyatını çıxılmaz vəziyyətə salıb. Hətta Ermənistanın maliyyə naziri də etiraf edib ki, birgünlük müharibə onlara 30 milyon dollara başa gəlir. Nəzərə almaq lazımdır ki, Ermənistan büdcəsi 3,4 milyarddır. Bu hal Ermənistan iqtisadiyyatını çətin vəziyyətə salır və salacaq”.
Həmsöhbətimiz onu da əlavə etdi ki, Ermənistan ordusunda da narazılıq yaşanır. Hərbi geyim, qida, dərman təminatının yetərincə olmaması Ermənistan hakimiyyətində təmsil olunanların, o cümlədən, əhalinin də haqlı narazılığına səbəb olur. Yaxın müddət ərzində Ermənistan əhalisi, erməni anaları hökumətə etiraz edəcək. Bu gözlənir. Ermənistan işğalçılıq siyasətinin acı nəticələrini bu gün dadmaqdadır.
Günel CƏLİLOVA
