Bildiyimiz kimi, Ermənistanda bu ölkənin Baş naziri Nikol Paşinyanın istefası tələbi genişlənir. Ermənistan vətəndaşları tələb edirlər ki, Paşinyanın rəhbərlik etdiyi hökumət istefa versin. Ermənistanda hakimiyyət dəyişikliyini tələb edən qüvvələrin sırası get-gedə genişlənir. Paşinyan höküməti isə onun hakimiyyətinə qarşı günü-gündən böyüyən etiraz dalğasının qarışısının alınması üçün müxtəlif üsullara əl atır.
“Sputnik-Armeniya” portalının yaydığı məlumata görə, Ermənistanda hakimiyyət dəyişikliyi tələb edənlər 600 dollar cərimələnir. Sözügedən portal hətta artıq bu tələbi irəli sürənlər arasında 300 nəfərin cərimələndiyini yazır. Bu mətbu orqanın yazdığına görə, Ermənistan polisi söz azadlığının məhdudlaşdırılması ilə bağlı tətbiq olunan qadağanı pozduğuna görə 300-ə yaxın cərimə yazıb.
Portalın məlumatına görə, “söz azadlığının məhdudlaşdırılması” dedikdə hərbi vəziyyət dövründə hakimiyyətin dəyişdirilməsi, ordunun köməyilə hərbi çevriliş və s. kimi çağırışlar nəzərdə tutulur: “İctimai Şuranın sabiq başçısı Vazgen Manukyan bu günlərdə Paşinyanın hakimiyyətdən getməsi barədə səsləndirdiyi fikrə görə hansı cəzanı alıb” sualına isə hələ də rəsmi dairələr cavab verməyib”.
“...onun hakimiyyəti uzun sürməyəcək”
Ermənistanda hakimiyyət dəyişikliyi tələb edənlərin 600 dolar məbləğində cərimələnməsi faktını şərh edən “Novoye vremya” qəzetinin baş redaktoru Şakir Ağayev bizimlə söhbətində bildirdi ki, Ermənistanda, ümumiyyətlə, heç zaman söz, fikir və etiqad azadlığı olmayıb. Ekspertin fikrincə, bu hadisə də onu göstərir ki, bu ölkədə azad söz demək istəyən adamlara qarşı ağır təzyiq formaları mövcuddur. Ermənistan vətəndaşlarının Paşinyan hökumətindən cana doyduğunu deyən Ş.Ağayevin bildirdiyinə görə, Paşinyan iqtidarı bu antidemokratik üsuldan istifadə etməklə vətəndaşların gözünü qorxudur. “Ermənistan hökumətinin atdığı bu addım anormallıqdır. Bu, Paşinyan hökumətinin bütün mahiyyətini ortaya qoyur. Ermənistan həmişə dünyaya göstərmək istəyirdi ki, guya bunlarda “demokratiya, söz azadlığı, demokratik seçkilər var”. Paşinyanın göstərişi ilə hakimiyyət dəyişikliyi tələb edən insanlara qarşı 600 dollar cərimə kəsilməsi bir daha onu göstərir ki, bu ölkənin mahiyyəti, mövcudluğu, “demokratiya və söz azadlıqları” da yalanlardan, saxtakarlıqdan ibarətdir. Ermənistan yalan üzərində dövlətçilik qurub, ideologiyaları da yalan üzərindədir, eləcə də “söz azadlıqları və demokratiyaları” da yalan üstündə qurulan bir oyundur. Ermənistan iflic vəziyyətdədir, ordusu darmadağındır, əhalisi dilənçi kökündədir. Paşinyan öz məğlubiyyətini boynuna almaq və tör-töküntü silahlı birləşmələrini bizim torpaqlardan çəkmək, erməni xalqını dirçəltmək üçün cəhdlər göstərmək əvəzinə, hələ də hakimiyyətdən yapışıb çabalayır. O, hər cür təhqirlərə, hədələrə dözüb hakimiyyətinin ömrünü uzatmaq istəyir. Paşinyan bir şeyi unudur ki, artıq məğlub olub, onun hakimiyyəti tükdən asılı vəziyyətdədir, xalq ondan imtina edir. Paşinyan onun istefasını tələb edən insanların üzərinə 600 deyil, 1000 dollar cərimə qoysa da, əhaliyə zor tətbiq etdirsə də, onun hakimiyyəti uzun sürməyəcək. Paşinyanın hakimiyyəti müvəqqətidir və o, hakimiyyətinin ömrünü uzatmaq üçün müharibəni uzadır, sülh danışıqlarına gəlmir, işğalçı silahlı birləşmələrini bizim torpaqlardan çıxarmır. Çünki müharibə nə qədər uzansa, o, hakimiyyətdə qalmaq üçün bir o qədər müqavimət göstərə biləcək”.
Ş.Ağayev hesab edir ki, Paşinyan hökuməti hakimiyyət dəyişikliyi tələb edən insanlara hansı şəkildə müqavimət göstərməsindən, onlara qarşı maliyyə cərmələri tətbiq etməsindən asılı olmayaraq, öz hakimiyyətini qoruya bilməyəcək. “Hesab edirəm ki, Paşinyan hökumətinin “söz azadlığının məhdudlaşdırılması ilə bağlı tətbiq olunan qadağanı” pozduğuna görə insanları cərimələməsi antidemokratik bir davranışdır. Onsuz da Ermənistanda heç zaman söz azadlığı olmayıb, bu gün də yoxdur. Paşinyan Ermənistan vətəndaşlarına qarşı bu addımı atmaqla özünün istefasını tezləşdirir. İnanıram ki, Ermənistan vətəndaşları Paşinyanın ən ağır cəza almasına nail olacaqlar. Paşinyan bu hərəkətlərinə görə ağır şəkildə cəzalandırılacaq. İşğalçı silahlı birləşmələrini Azərbaycan torpaqlarından çıxarmaq istəməyən, erməni xalqını zorla müharibəyə aparan Paşinyan bütün bu cinayətlərə görə cavab verəcək və o, öz hakimiyyətinin son günlərini yaşayır” - deyə Ş.Ağayev qeyd etdi.
İradə SARIYEVA
