Prezident İlham Əliyev Türkdilli Dövlətlərin Əməkdaşlıq Şurasının Baş katibi Bağdad Amreyevin başçılıq eydiyi nümayəndə heyətini qəbul edərkən deyib ki, münaqişənin hərbi həlli siyasi müstəviyə keçməlidir və biz buna hazırıq:
“Mən dəfələrlə demişəm və bu mənim mövqeyimdir, əgər Ermənistan, misal üçün, bu gün atəşi dayandırsa və danışıqlar masası arxasında konstruktiv mövqe nümayiş etdirsə, qalan torpaqlarımızdan qoşunların çıxarılması ilə bağlı üzərinə konkret öhdəlik götürsə, biz dayanmağa hazırıq”.
İlham Əliyev Paşinyanın Putinə yazdığı məktubdan da bəhs edib:
"Ermənistan baş naziri Rusiya prezidentinə məktub göndərir və hərbi yardım istəyir. Bu tamamilə qəbuledilməzdir. Buna heç bir əsas yoxdur. Biz öz torpağımızda düşməni əzirik, vururuq və torpaqlarımızdan çıxarırıq. Biz Ermənistana hər hansı bir təcavüz etməmişik. Bu, birincisi. İkincisi, Rusiya Minsk Qrupunun həmsədr ölkəsidir, bütün həmsədrlər kimi neytral mövqedə olmalıdır və həmsədrlərin əslində ATƏT tərəfindən onlara verilmiş mandatı bunu tələb edir. Paşinyanın bu məktubu göndərməsi onun əslində etirafıdır. Etiraf edib ki, Ermənistan məğlub olub. Hesab edirəm ki, bu etiraf Ermənistan cəmiyyətində də ciddi təhlil olunmalıdır və Ermənistan rəhbərliyinə ciddi təzyiq edilməlidir ki, bu müharibə dayandırılsın, işğalçılar bizim torpaqlarımızdan çıxsın və bölgədə sülh təmin edilsin".
Göründüyü kimi, ölkə başçısı erməni xalqına lazım olan tövsiyəni verib. Məktubla bağlı İlham Əliyevin qeyd etdiyi məqamlardan erməni cəmiyyəti hansı nəticəni çıxarmalıdır?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan baş naziri Nikol Paşinyan Rusiya prezidenti Vladimir Putinə məktub yazaraq Ermənistan ərazisinin təhlükəsizliyinin təmin olunmasına kömək barədə yardım istəyir və bu məqsədlə də məsləhətləşmələr aparılması xahişini edir: “Paşinyanın Rusiya prezidenti Putinə yazdığı məktubun bir adı var - məğlub baş nazirin sərsəm xülyalarla dolu əlacsız yalvarışı.
İki hissədən ibarət olan məktub erməni və Rusiya dövlətlərinin “uzaq əsrlərə” dayanan dostluq əlaqəsi, Rusiya dövlətinin müharibə tarixindəki nailiyyətlərdə erməni xalqının xidmətləri, Birinci və İkinci Dünya müharibələrində erməni hərbçilərinin Rusiyanın maraqlarına “təmənnasız xidməti” və s. kimi sərsəm erməni təbliğatının elementləri ilə zəngindir.
Məktub həm də ermənilərin uydurduğu I Pyotrun erməni xalqının müdafiəsi haqqında Rusiya dövlətinə “saxta vəsiyyətindən” tutmuş, 29 avqust 1997-ci ildə Ermənistan və Rusiya arasında dostluq, əməkdaşlıq və qarşılıqlı yardım müqaviləsinin xatırlanması haqqında sərsəm qeydlərlə doludur.
Ardınca isə erməni baş naziri dünyada fövqəlgüc kimi tanınan ölkənin - Rusiyanın dünyada ən məlumatlı şəxslərdən biri olan prezidentinə onların sərhədində yerləşən bir bölgə ilə bağlı erməni təbliğatının Avropadakı dezinformasiya elementləri ilə dolu bir psevdoreallığı izah etməyə çalışır. Məktubda “Dağlıq Qarabağdakı müharibəni Türkiyənin regionda öz nüfuzunu möhkəmləndirmək üçün başlaması, türklərin gətirdiyi müzdluların döyüşdüyü” və s. kimi sərsəmləmələr də yer alır.
Paşinyan Ermənistanın Azərbaycan Ordusu qarşısında tab gətirmədiyini xüsusi qeyd edir, Rusiyanın müdafiləsi olmayacağı halda Azərbaycanın Dağlıq Qarabağı tam azad edəcəyinə saatlar qaldığını xatırladır. Nikol Paşınyan bununla Qarabağdakı mövcud müharibəni bir daha təhrif edərək, Putinə Rusiya Federasiyasının cənub sərhədlərinə “terrorçuların” nüfuz etməsini izah etməyə çalışır”.
Ekspertin sözlərinə görə, Paşinyan Rusiya prezidentini, həm də, hərbi əməliyyatların Ermənistan ərazisinə keçə biləcəyi haqqında sərsəmləmələrlə Qarabağdakı müharibəyə KTMT çərçivəsində cavab verməyin zəruriliyinə inandırmağa çalışır: “Bunun önlənməsi məqsədilə isə, ən optimal variant kimi, Dağlıq Qarbağa Rusiya sülhməramlılarının yeridilməsi üçün danışıqlara hazır olduğunu bildirir. İlham Əliyev məktubun daha sadə formada izahını erməni cəmiyyətinə çatdırıb. İzah edib ki, erməni xalqı məğlub olan Paşinyanın onların hissləri ilə oynamasına imkan verməməlidir. Erməni xalqı öz övladlarının niyə mənasız yerə öldürüldüyünün hesabını Paşinyandan tələb etməlidir. Bu məktubdan bir daha görünür ki, Paşinyan, nəyin bahasına olursa-olsun, xilas olmağa çalışır. Ancaq Rusiya Azərbaycan daxilində baş verən proseslərə qarışmayacağını bildirir”.
Sonda ekspert bildirdi ki, Ermənistan cəmiyyəti, məhz bu məktubu əsas tutaraq, Paşinyandan müharibəni dayandırmağı tələb etməlidir.
Məhəmmədəli QƏRİBLİ
