Erməni terror təşkilatları, xüsusən də qaniçən ASALA bütün Avropaya, eləcə də dünyanın digər qitələrinə xərçəng kimi yayılıb. ASALA-nın əsas işi Ermənistanın işğalçılıq mövqeyini kəskin tənqid edən, Azərbaycanın ədalətli mübarizəsinə dəstək verən ictimai-siyasi xadimləri, fikir adamlarını, media qurumlarını və onların əməkdaşlarını təhdid altında saxlamaq, onlara hədə-qorxu gəlmək, ölümlə hədələməkdir.
Bu gün ASALA-nın ciddi təhdid altında saxladığı ölkələrdən biri Fransadır. Bilirik ki, bir müddət əvvəl ASALA üzvü olan terrorçular Dağlıq Qarabağdan obyektiv reportaj hazırlayan Fransanın TF1 telekanalının jurnalisti Liseron Buduluna qarşı hədələyici addımlar atıb, ona qarşı terror edəcəklərini bildiriblər. TF1 kanalının əməkdaşının ardınca isə ASALA Fransa Milli Assambleyasının deputatı, Fransa-Azərbaycan dostluq qrupunun vitse-prezidenti Jerom Lamberi hədəfə alıb. Bu barədə Oxu.az-a Jerom Lamberi özü məlumat verib və bildirib ki, onu ASALA ilə hədələyiblər. “Təxminən 10 gün bundan əvvəl Fransanın “Fiqaro” qəzeti Azərbaycan Prezidenti İlham Əliyevin Azərbaycanla Ermənistan arasındakı Dağlıq Qarabağ münaqişəsi haqqında müsahibəsini dərc etmişdi. Mən də, öz növbəmdə, həmin məqaləni öz şərhlərimi bildirərək “Facebook" səhifəmdə paylaşmışdım və bildirmişdim ki, Fransanın mövqeyi beynəlxalq hüququ və BMT Təhlükəsizlik Şurasının müvafiq qətnamələrini qəti şəkildə dəstəkləməkdən ibarətdir”.
O, ölkə başçısı İlham Əliyevin müsahibəsini özünə məxsus “Facebook” səhifəsində dərc etdiyi üçün təzyiqlərlə üzləşib. 63 yaşlı fransız millət vəkili Fransa hökumətinin mövqeyini əks etdirən fikirlər ortaya qoysa da, ölüm təhdidi ilə qarşılaşdığını bildirib: “Qeyd etmişdim ki, İlham Əliyevin müsahibəsi azərbaycanlıların nöqteyi-nəzərini və hazırkı vəziyyətlə bağlı ən ideal fikri öyrənməyə imkan verir. Əlimizdə erməni tərəfindən də gələn bir sıra informasiyalar mövcuddur. “Facebook” üzərindən yazdığım bu mesaj bir çoxunu, xüsusilə erməni əsilli fransızları qıcıqlandırıb və onlar mənə təhqir və təhdid dolu mesajlar göndərib, məni ASALA kimi terror təşkilatları ilə hədələyiblər.
Mən bütün bu təhdidlərə cavabımı verib, parlamentdəki missiyamı yerinə yetirməyə və ölkəmin məsələ ilə bağlı mövqeyini müdafiə etməyə davam etdim. Ölkəmin mövqeyi Ermənistan silahlı qüvvələrinin Azərbaycanın 30 ildir işğal altında olan torpaqlarından çıxarılmasını tələb edən qətnamələri dəstəkləməkdir. Ölkəmin mövqeyi dəyişməzdir və mən bunu dəstəkləyirəm. Bu təhdidlər bizim mövqeyimizi dəyişməyəcək. Eyni zamanda, bu təhdidlər göstərir ki, bəzi ekstremist ermənilər sülh, ədalət və BMT TŞ qətnamələrinin icra olunması tərəfdarı deyillər”.
Jerom Lamber onu da bildirib ki, Fransanın TF1 telekanalının jurnalisti Liseron Budulun da Azərbaycanla bağlı reportajına görə təzyiqlə üzləşdiyini xatırladıb: “Mən, həmçinin, TF1 kanalının jurnalistinin Azərbaycan ərazisindən hazırladığı reportajın milliyyətçi ermənilər tərəfindən necə kəskin şəkildə tənqid olunduğunu da gördüm. Həmin jurnalist də təhdidlər alıb və TF1 kanalına da Ermənistanı dəstəkləyən fanatik milliyyətçilər tərəfindən etiraz olunub. Sözügedən vəziyyət dözülməzdir. Fransa kimi mətbuat və söz azadlığının qorunduğu bir ölkədə belə təhdidləri qəti şəkildə qınamalıyıq”.
J.Lamberinin də açıq şəkildə hədələnməsi onu göstərir ki, ASALA və digər erməni terror təşkilatları Fransanı tam olaraq ələ alıb və burada istədikləri terror hərəkətlərini hər an icra edə bilərlər. Necə ki, indiyə qədər ediblər.
“Bu həm də onun göstəricisidir ki, Fransa kimi Avropanın mərkəzi dövlətində erməni terror təşkilatları açıq şəkildə fəaliyyət göstərə bilirlər”
“Resurs” Analitik İnformasiya Mərkəzinin rəhbəri, politoloq Rasim Quliyevin fikrincə, dünyanın hansı ölkələrində ki, erməni lobbisi güclüdür, orada erməni terror təşkilatları da hər zaman aktivdirlər: “Dünyanın elə ölkələri var ki, orada ermənilərin sayı çoxdur və onlar həmin cəmiyyətlərdə dərin köklər salıblar. O ölkələrdə erməni terror təşkilatları aktiv fəaliyyət göstərir və zaman-zaman həmin ölkələrin dövlət, hökumət rəhbərlərini, deputatlarını, media qurumlarını təsir və təzyiq altında saxlayırlar. Belə demək mümkünsə, ASALA və digər erməni terror təşkilatları həmişə bu ölkələrdə terror edə bilərlər. Fransalı deputatın da erməni terror təşkilatı ASALA ilə təhdid edilməsi Fransada erməni terror təşkilatlarının artıq oturuşması, şaxələnməsi ilə bağlıdır. Bu, terror təşkilatlarının həmin ölkədə gücünün göstəricisidir. Digər tərəfdən də bu həm də onun göstəricisidir ki, Fransa kimi Avropanın mərkəzi dövlətində erməni terror təşkilatları açıq şəkildə fəaliyyət göstərə bilirlər və bu ölkə erməni terror şəbəkəsinin əlində aciz qalıb. Deputat sıradan bir adam deyil, o, rəsmi şəxsdir. Rəsmi şəxs olan deputat özü açıq şəkildə etiraf edirsə ki, Azərbaycan Prezidentinin “Fiqaro”ya müsahibəsini obyektiv şəkildə şərh etdiyinə görə ona açıq-gizlin təhdidlər edilir, ASALA terror təşkilatı ilə hədələnir, ona təzyiqlər göstərilir, bu həmin ölkədə erməni terror şəbəkəsinin böyük təhlükəsindən xəbər verir. Görün, bu ölkədə erməni terror şəbəkəsi nə qədər sıx şəkildə oturuşub ki, terrorçular heç nədən çəkinmədən deputata hədə-qorxu gəlir, onu terrorla hədələyirlər. Bu, Avropanın qədim mədəniyyət mərkəzlərindən biri olan Fransada erməni terror şəbəkəsinin nə qədər gücləndiyinin və dövlət adamlarını, deputatları belə hədəfə almaqdan çəkinmədiyinin göstəricisidir. Bu həm də həmin ölkədə mövcud olan demokratiyanın inkişafına mənfi təsir edən terror təşkilatlarının mövcudluğunun təsdiqidir. Yəni bu, Fransanın dövlət qurumlarına erməni terror təşkilatlarının hər zaman təsir və müdaxilə edə bilmək imkanında olmasının əyani göstərisi kimi qeyd edilə bilər”.
R.Quliyevin sözlərinə görə, Fransa dövlətinin Azərbaycana və Türkiyəyə məlum münasibətinin kökündə erməni terror təşkilatlarının təsiri az deyil. Ekspert hesab edir ki, bu ölkə Azərbaycana və Türkiyəyə qarşı obyektiv mövqe tutmaq istəyərsə, həmin vaxt erməni terror təşkilatlarının terror hədə-qorxusu, təhdidi ilə üzləşə bilər. “Çox təəssüflər olsun ki, bir çox halda Fransa dövlətinin və fransız xalqının milli dövlətçilik maraqları, mənafeləri bir kənarda qalır, erməni terror şəbəkəsinin, erməni lobbisinin təsiri altında Fransanın dövlət qurumları fəaliyyət göstərməyə məcbur olurlar. Baş verənlər də bunun nümunələrindən biridir. Bu gün Fransanın rəsmi şəxsləri, deputatları ASALA-nın və digər erməni terror təşkilatlarının hədəfində olduqlarını gizlətmirlərsə, bunu açıq etiraf edirlərsə, biz də Fransanın ATƏT-in Minsk Qrupunda həmsədr kimi fəaliyyətini gələcəkdə nəzərə almalıyıq. Açıq görsənir ki, Fransanın dövlət qurumlarına, parlamentinə, ayrı-ayrı rəsmi şəxslərinə erməni terror şəbəkəsinin təsiri böyükdür. Terror təşkilatlarının onlara təsir imkanları o qədər böyükdür ki, terrorçular onları açıq şəkildə təhdid edirlər” - deyə R.Quliyev vurğuladı.
İradə SARIYEVA
