Təcavüzkar Ermənistan da ərazi bütövlüyü prinsipinin üstün gücü ilə razılaşdı - qondarma “DQR”-ə hansı “ərazi bütövlüyü”...
Azərbaycanın işğal altında olan ərazilərində müvəqqəti yaradılan qondarma separatçı rejimin adından növbəti gülməli bəyanat yayılıb. Saxta qorumun “XİN”-i bildirir ki, “Artsax”ın “ərazi bütövlüyünə zərbə vurulub və güya onların ərazisinin bir hissəsi hələ də Azərbaycanın “işğalı” altındadır.
Saxta bəyanatda bildirilir ki, 1992-ci ildə Azərbaycan silahlı qüvvələri rayonu “işğal” edib və ora külli miqdarda ziyan vurub. Sonda tələb olunur ki, separatçı qurumun ərazi bütövlüyü tam təmin olunmalıdır. Söhbət hansı “ərazi bütövlüyündən” gedə bilər?
Politoloq Aqşin Əliyev qəzetimizə açıqlamasında bildirdi ki, separatçılardan bundan artıq nəsə gözləmək olmaz:“Onların yadına bu tarix Azərbaycan qoşunlarının 1992-ci ildə keçmiş Mardakerti, indiki Ağdərəni separatçılardan təmizləməsi ilə bağlı düşüb. Həmin hadisə iyulun əvvəlində olduğu üçün bu xatırlamanı ediblər. Dünyanın heç bir ölkəsi tərəfindən tanınmayan, hətta Ermənistanın özünün belə tanımağa cürət etmədiyi bir separatçı qurumun adından səslənən fikirlərin heç bir ciddi təsir gücü ola bilməz. Buna heç geniş münasibət bildirməyə də lüzum görmürəm. Bilirsiniz ki, hazırda barəsində söhbət gedən ərazilər tarixən Azərbaycan torpağı olub. Biz SSRİ-nin tərkibində olanda da həmin rayon Dağlıq Qarabağ Muxtar Vilayətinin bir subyekti kimi Azərbaycanın ərazi vahidinə aid olub. Bizim işğal altında olan digər rayonlarımız kimi Ağdərə də hazırda ermənilərin işğalı altındadır. Bu məsələdə söhbət bir ərazi bütövlüyündən gedə bilər ki, o da Azərbaycandır. Hazırkı situasiyada yalnız Azərbaycanın ərazi bütövlüyü pozulub. Biz onu bərpa edəcəyik. Ağdərənin bir hissəsinin hazırda bizim əlimizdə olması erməniləri ciddi narahat edir. Amma narahat olmasınlar, biz hazırda öz ərazimizə nəzarət edirik. Narahaetdici məqam odur ki, onlar bizim bir neçə rayonumuzu işğal altında saxlayır. Bütün danışıqlar prosesində Azərbaycan bir addım da olsun ərazi bütövlüyü məsələsində güzəştin edilməyəcəyini vurğulayır. Biz tezliklə nəinki Ağdərəni, eləcə də bütün işğal altında olan rayonlarımızı düşmən işğalından azad edib, öz ərazi bütövlüyümüzü təmin edəcəyik. Ermənilərin belə təxribat xarakterli məlumatı dövriyyəyə buraxmaları təsadüfi deyil. Bununla gərgin olan daxili vəziyyəti nəzarətdə saxlamaq istəyirlər. Saxta vətənpərvərlik təbliğatı ilə əhalinin başını qatırlar ki, əlavə tələblər edilməsin. Artıq vəziyyətin gərgin olduğunu ermənilər dərk edir. Qeyri-konstruktivlik etmək üçün manevr imkanları da qalmayıb. Hətta nüfuzlu təşkilatlar belə dalbadal münaqişənin Azərbaycanın ərazi bütövlüyü çərçivəsində həllinin mümkünlüyünü deyirlərsə, saxta qurumun hansı “ərazi bütövlüyündən” danışamağa haqqı ola bilər? Bütün bunlar yalan və saxta erməni təbliağatının tərkib elementidir”.
Artıq danışmağa mövzuları olmayan ermənilər indi də Azərbaycanın ərazi hüdudlarında özlərinə saxta “ərazi bütövlüyü” axtarışına çıxıblar. Çox gülməli mənzərədi.
Məhəmmədəli QƏRİBLİ
