Məşhur rusiyalı tarixçi və politoloq Oleq Kuznetsov “Yandeks” (Yandex) internet bazasında “Qarabağ: Rusiyadan baxış” informasiya kanalı açıb. Onun sözlərinə görə, uzun illərdir müəyyən qara əllər sayəsində Qarabağ həqiqətləri dünyaya başqa bucaq altında çatdırılır: “İlk dəfə olaraq rusiyalı elm xadimi Qarabağla bağlı qərəzsiz faktlar və müzakirələrlə dolu olacaq bir resurs yaradır. Kanalın Azərbaycan həqiqətlərinin dünyaya çatdırılmasına dəstək olacağına inanıram”.
Kuznetsovun sözlərinə görə, o bu ideya üzərində uzun müddət işləyib: “Düzünü desəm, bunu ideya da adlandırmaq düz olmaz, çünki bu mənim içimdən gəlib. Uzun illərdir müəyyən qara əllər sayəsində Qarabağ həqiqətləri dünyaya başqa bucaq altında çatdırılır. Hətta Rusiyada bu münaqişə barəsində hərə bir söz danışır.
Mən uzun illərdir Qafqazla bağlıyam və indi insanlar soruşurlar ki, reallıqda bu regionda nə baş verir? Bu kanal vasitəsilə insanlar faklarla möhkəmləndirilən, dəlillərlə dolu həqiqəti görə biləcəklər”.
O da məlumdur ki, Qarabağ həqiqətlərinin Rusiyada geniş yayılmasına çox ehtiyac var. Çünki uzun illərdir ermənilər öz imkanlarından istifadə edərək Rusiya cəmiyyətini çaşdırmaqla məşğuldurlar. Qarabağla bağlı əsl həqiqətlərin yayılmasına yetərincə şərait yaradılmayıb. Bütövlükdə, belə kanalların açılması Qarabağ həqiqətlərinin Rusiya ictimaiyyətinə çatdırılmasında necə rol oynaya bilər?
“Biz bu şəraitdən mümkün olan qədər öz xeyrimizə istifadə etməliyik”
Məsələyə münasibət bildirən şərqşünas Seyid Camal Əzimbəylinin sözlərinə görə, belə kanalların sayı çox olarsa, o zaman Rusiya ictimaiyyəti Qarabağla bağlı həqiqətlərin əsl mahiyyətini biləcək: “Uzun illərdir bu məsələdə problemlər var. Bunun həm obyektiv, həm də subyektiv səbəbləri var. Obyektiv səbəb odur ki, Rusiya siyasi dairələri bir zamanlar Qarabağla bağlı həqiqətlərin yayılmasında maraqlı olmayıblar. Subyektiv səbəb odur ki, biz özümüz də bu istiqamətdə yetərincə iş aparmamışıq və yaxud da lazımi səviyyədə işi qura bilməmişik. Rusiya media vasitələrində çoxsaylı erməni əsilli şəxs fəaliyyət göstərir. Onlar hər fürsətdə Qarabağla bağlı yalan informasiyalar yayaraq ölkə ictimaiyyətini yanlış formada məlumatlandırırlar. Zaman-zaman biz bunun şahidi oluruq. Məsələ ondadır ki, erməni lobbisi Rusiyada çox yaxşı təşkilatlanıb. Ona görə də biz bu stereotiplərin dağıdılması ilə bağlı səylərimizi artırmalıyıq. İndiki zamanda bununla bağlı müəyyən fürsət var. Nəzərə almaq lazımdır ki, hazırda Rusiya-Ermənistan münasibətləri gərgindir. O üzdən, biz bu şəraitdən mümkün olan qədər öz xeyrimizə istifadə etməliyik. Oleq Kuznetsov Azərbaycanı müdafiə edən və Qarabağ məsələsində obyektiv mövqedən çıxış edən politoloqdur. Ümid edirəm ki, sözügedən kanal Qarabağ həqiqətlərinin Rusiya ictimaiyyətinə düzgün çatdırılmasında səmərəli rol oynayacaq”.
Bütün bu müsbət tendensiyalarla yanaşı, biz Qarabağ həqiqətlərinin Rusiya ictimaiyyətinə çatdırılması məsələsində çox işləməliyik.
Vidadi ORDAHALLI
