Fransa Prezidenti Emmanuel Makron Ermənistan Baş naziri Nikol Paşinyana məktub yazıb. Ermənistan KİV-nin yaydığı məlumata görə, məktubda koronavirusla bağlı yaranmış situasiyadan narahatlığını bildirən Makron İrəvana 50-80 milyon avro məbləğində yardım edə biləcəklərini dilə gətirib. Bundan başqa, yaxın günlərdə Ermənistana Fransadan yeni könüllü həkimlər briqadası yollanacaq.
Makron Paşinyana göndərdiyi məktubda pandemiyanın iki ölkə arasındakı əməkdaşlıq üçün unikal səbəbə çevrildiyini bildirib. Daha sonra Makronun məktubunda deyilir: “Cənab Baş nazir, əziz Nikol, bu yaxınlarda Sizin koronavirus xəstəliyindən sağaldığınızı eşitdim. Sizin və ailənizin artıq sağlam olduğu üçün çox şadam. Bu gün Fransanın da, Ermənistanın da qarşısında səhiyyə, iqtisadiyyat və sosial planda böyük çağırışlar durur. Böhran bizi güzəştə getməyə məcbur etməməlidir. Əksinə, pandemiya ona və nəticələrinə qarşı mübarizədə iki ölkə arasındakı əməkdaşlıq üçün unikal səbəbə çevrilməlidir. Bu kontekstdə Sizi Fransanın həmrəyliyinə və Ermənistana konkret yardım göstərməyə hazır olmasına inandırmaq istəyirəm. Həm Avropa İttifaqının misilsiz maliyyə dəstəyinə töfhəsi kontekstində, həm də ikitərəfli dəstək kontekstində Fransa Sizin yanınızdadır. Yaxın günlərdə Fransa yenidən Ermənistana yeni könüllü həkimlər briqadasını göndərəcək və onlar artıq öz erməni həmkarlarına COVID-19-la mübarizədə kömək etmiş yoldaşlarını əvəzləyəcəklər. Bu böhran iki ölkənin iqtisadiyyatı üçün də sınaqdır. Ermənistanda fəaliyyət göstərən Fransa İnkişaf Agentliyi vasitəsilə Fransa Ermənistanın dövlət siyasətinə 50-80 milyon avro məbləğində kredit təqdim etmək məsələsinə baxmağa hazırdır. Bu məbləğ ölkənizin bu il qarşılaşacağı əlavə büdcə maliyyələşdirilməsi ehtiyaclarını qismən təmin etmək imkanı verəcək”.
Məlum olduğu kimi, Ermənistanda daxili siyasi vəziyyət çox gərgindir. Paşinyan hakimiyyətinin apardığı siyasi repressiyalar, pandemiya ilə bağlı ağır vəziyyət gərginliyi artırır. Bütün bunlarla yanaşı, Rusiya ilə də mövcud hakimiyyətin münasibətləri pisdir. Məhz belə bir vəziyyətdə Fransa Prezidentinin göstərdiyi bu lütfkarlığın arxasında nə dayanır?
“Bu, müxalifəti qıran, Ermənistan cəmiyyətinin daxilini qarışdıran Baş nazirə...”
Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, indiki məqamda sözügedən məktub Paşinyana siyasi dəstək məqsədi güdür: “Bundan əvvəl Avropa Komissiyasının rəhbəri Paşinyana məktub yazdı. Guya Paşinyan Avropa günü münasibətilə Avroittifaqın rəhbərliyini təbrik edib, indi onlar da bu münasibətə cavab verirlər. Məlumata görə, Paşinyan Fransadan gizli formada yardım istəyib. Müəyyən dairələr Ermənistan cəmiyyətində belə rəy yaratmaq istəyirlər ki, Paşinyana xaricdən dəstək var. Paşinyan hakimiyyətə gələn kimi strateji tədqiqat mərkəzi yaratdı. Onun bütün işlərini o mərkəz idarə edir. Ermənistan əhalisi Avropa İttifaqının İrəvan səfirliyi qarşısında etiraz piketi keçirib bəyan edir ki, Paşinyan ölkədə siyasi repressiyalar aparır. Ancaq Avroittifaqın rəhbəri Paşinyana məktub yazır ki, ölkədəki islahatlar yüksək səviyyədədir. Bax, belə hallar mövcuddur. Makronun Paşinyana məktubu ona siyasi dəstək mənası daşıyır. Belə baxanda bənzər məktubları Makron digər dövlət başçılarına da göndərir. Ona görə də bu, Paşinyana siyasi dəstək məktubudur. Yəni bu, müxalifəti qıran, Ermənistan cəmiyyətinin daxilini qarışdıran Baş nazirə dəstəyin göstəricisidir. Onu da qeyd edim ki, Aİ Ermənistana 96 milyon avro yardım vəd edib, amma ortada heç nə yoxdur”.
Belə görünür ki, Qərb ciddi problemlərlə üz-üzə qalan Paşinyana öz maraqları naminə dəstək verir. Makronun məlum məktubu da bundan irəli gəlir.
Vidadi ORDAHALLI
