ATƏT-in Minsk Qrupunun həmsədrləri İqor Popov (Rusiya Federasiyası), Stefan Viskonti (Fransa) və Endryu Şafer (ABŞ) iyunun 29-30-da Azərbaycan və Ermənistan XİN başçıları - Elmar Məmmədyarov və Zohrab Mnatsakanyanla videokonfrans formatında ayrı-ayrılıqda və birgə görüş keçiriblər.
Ermənistan tərəfi yenə də öz həyasızlığını nümayiş etdirib. Bu, Ermənistan Xarici İşlər Nazirliyinin yaydığı məlumatda açıq-aşkar özünü göstərib. Belə ki, Ermənistan Xarici İşlər naziri Z.Mnatsakanyan Azərbaycan tərəfindən səslənən döyüşkən ritorika və qeyri-konstruktiv bəyanatların yolverilməzliyini qeyd edib. O iddia edib ki, guya bunlar sülh prosesi mühitinə xələl yetirir və xalqların sülhə hazırlaşdırılması öhdəliyinin yerinə yetirilməsinə mane olur. Mnatsakanyan, həmçinin, “Artsax xalqı”nın hərtərəfli təhlükəsizliyinin, o cümlədən, azad və təhlükəsiz hərəkət etmək vasitəsilə ardıcıl surətdə təmin edilməsinin zəruriliyini vurğulayıb.
Göründüyü kimi, Mnatsakanyan utanmadan deyir ki, Azərbaycan danışıqlarda davakar və qeyri-konstruktiv mövqe sərgiləyir. Çox qəribdir ki, həmsədrlər bunu susqunluqla izləyirlər. Hansı ki, danışıqların nəyə görə müsbət nəticə verməməsinin əsl səbəbini həmsədrlər daha yaxşı bilirlər. Buna rəğmən, Ermənistanın bu cür absurd yanaşmasını susqunluqla izləyirlər.
“Təəssüflər olsun ki, indiki dünyanın geosiyasi reallıqları beynəlxalq hüququn işləməsinə imkan vermir”
Məsələyə münasibət bildirən politoloq Elşən Manafov ATƏT-in Minsk Qrupu həmsədrlərinin Mnatsakanyanın məlum mövqeyinə susqunluqla reaksiya verməsini bir sıra amillərlə əlaqələndirdi: “Həmsədrlərin Mnatsakanyanın son açıqlamasına belə susqun yanaşmaları, əslində, indiyə qədər ATƏT-in Qarabağ münaqişəsində sərgilədiyi mövqedən mahiyyət etibarilə fərqlənmir. İndiyə qədər Minsk Qrupu münaqişəyə ciddi yanaşmayıb. Həmsədrlərin mövqeləri üst-üstə düşmədiyindən, problemin həlli istiqamətində kifayət qədər ciddi və kardinal addımlar atılmayıb. Digər tərəfdən, çox təəssüflər olsun ki, müasir dünyamızda beynəlxalq hüquq normaları deyil, beynəlxalq güclərin mövqeləri əsas rol oynayır. Çox təəssüflər olsun ki, indiki dünyanın geosiyasi reallıqları beynəlxalq hüququn işləməsinə imkan vermir. Bu mənada hesab edirəm ki, həmsədr dövlətlərin ayrı- ayrılıqda Ermənistanla olan münasibətləri və xristian təəssübkeşliyi mövqeyindən çıxış etmələri susqunluğa yol açır. Yəni bu səbəbdən hər dəfə Ermənistanın həyasız bəyanatlarına belə susqun yanaşırlar. Digər tərəfdən, “məxməri inqilab”dan sonra Qərbdə belə bir fikir var idi ki, Paşinyan hakimiyyəti əvvəlki iqtidardan fərqli siyasət yürüdəcək. Ancaq Paşinyan Qarabağ məsələsində daha avantürist mövqe sərgiləyir. Mahiyyət etibarilə heç nə dəyişmədi. Bütün bunlara rəğmən, həmsədrlər yenə də Ermənistanın sərgilədiyi mövqeyə loyal yanaşırlar. Mnatsakanyanın son açıqlaması tamamilə pozucu xarakterlidir. Həmsədrlərin buna reaksiya verməməsi onu göstərir ki, onlar münaqişənin ədalətli həllində maraqlı deyillər”.
Nə qədər ki, ATƏT-in Minsk Qrupu münaqişənin tənzimlənməsi ilə bağlı ədalətli mövqe sərgiləmir, o vaxta qədər Ermənistan belə pozucu xarakterli açıqlamalar verməkdə davam edəcək.
Vidadi ORDAHALLI
