Prezident İlham Əliyevin iradəsi ilə çoxpartiyalı sistemin inkişafı, ümumi maraqlar naminə partiyalararası dialoqun genişləndirilməsi və bu sahədə münasibətlərin sağlam zəmində qurulmasına yönələn ardıcıl tədbirlər görülür, o cümlədən son aylarda 4 siyasi partiya Ədliyyə Nazirliyində dövlət qeydiyyatından keçib. Bu barədə Ədliyyə Nazirliyinin Mətbuat xidmətindən məlumat verilib.
Bildirilib ki, görülən işlər çərçivəsində Milli Vəhdət Partiyası, Azərbaycan Milli Demokrat Partiyası və Ağ Partiyanın (əvvəlki Vahid Azərbaycan Partiyası) nazirliyə təqdim olunan təsis və digər sənədlərinə edilmiş dəyişikliklərin qanunvericiliyə uyğunluğu öyrənilib və qeydiyyata alınıb. Bununla bağlı partiyalara dövlət reyestrindən çıxarışlar verilib.
Qeyd olunur ki, Ədliyyə Nazirliyi 3 siyasi partiyanın təsis və digər sənədlərinə edilən dəyişiklikləri dövlət qeydiyyatından keçirib.
Məlumat üçün bildirək ki, Milli Vəhdət Partiyası 08.05.2002-ci il, Azərbaycan Milli Demokrat Partiyası 24.12.2008-ci il, Vahid Azərbaycan Partiyası isə 13.01.1993-cü ildə dövlət qeydiyyatına alınıb.
Azərbaycanda qeydiyyatdan keçən sonuncu siyasi partiya Milli Dirçəliş Hərəkatı Partiyası olub. Bu partiya 31 may 2011-ci ildə dövlət qeydiyyatına alınıb. 9 illik fasilədən sonra bu il Azərbaycanda daha 4 siyasi partiya – Yeni Zaman Partiyası, Azad Demokratlar Partiyası, Cümhuriyyət Xalq Partiyası və Müstəqil Xalq Partiyası dövlət qeydiyyatına alınıb. Beləliklə, hazırda Azərbaycanda dövlət qeydiyyatına alınan siyasi partiyaların sayı 59-a yüksəlib.
Son qeydiyyata alınan partiyalarla bağlı apardığımız araşdırmadan məlum oldu ki, hər üç partiyanın dövlət qeydiyyatı olub, lakin onların yenidən qeydiyyata alınması prosesi həyata keçirilib. Yenidən qeydiyyata alınan Milli Vəhdət Partiyasının sədri tanınmış jurnalist, “Olaylar” qəzetinin Baş redaktoru Yunus Oğuzdur. O, “Bakı-Xəbər”ə açıqlamasında son qeydiyyata alınan partiyalardan birinin onun rəhbərlik etdiyi siyasi təsisat olduğunu təsdiqlədi.
Milli Demokrat Partiyası isə vaxtilə sabiq daxili işlər naziri İsgəndər Həmidovun rəhbəri olduğu müxalifyönümlü partiyadır. Hazırda həmin partiyaya Tufan Kərimli rəhbərlik edir. O, “Bakı-Xəbər”ə açıqlamasında bildirdi ki, onların partiyası uzun müddət qeydiyyatsız fəaliyyət göstərib və 2008-ci ildə dövlət qeydiyyatına alınıb:“Bizə zəng edib dedilər ki, sonuncu qurultayın sənədlərini təqdim edək, biz də etdik. Sonra məlumat verildi ki, partiyamızı yenidən qeydiyyata alıblar. Bunun bizim siyasi mübarizəmizə heç bir təsiri olmayacaq, yenə də müxalif mövqeyimizdə qalacağıq”.
Qeydiyyata alınan Ağ Partiya sədrinin birinci müavini Əhəd Məmmədli “Bakı-Xəbər”ə açıqlamasında bildirdi ki, 4 il Vahid Azərbaycan Partiyası kimi rəsmi fəaliyyət göstəriblər:“Sadəcə olaraq, biz qurultayın sənədlərində olan ad, partiya sədri və nizamnamədə edilən dəyişikliklərin Ədliyyə Nazirliyinin reyestr xidmətindən keçirilməsinə çalışırdıq. Nəhayət, bu yaxınlarda biz əlaqə saxladıq və sənədlərin necə hazırlanması ilə bağlı bəzi məsləhətləşmələrimiz oldu. Biz də sənədləri hazırlayıb təqdim etdik və nəhayət, 4 ildən sonra partiyanın ad dəyişikliyi qeydə alındı. Bu qərar tam olaraq partiyanın qeydiyyatı deyil, sadəcə olaraq partiyanın adı dəyişib. Bundan sonra rəsmi olaraq Ağ Partiya olaraq fəaliyyət göstərəcəyik”.
Əhəd Məmmədli daha sonra bildirdi ki, bu addımı müsbət dəyərləndirirlər:“Ümidvarıq ki, bundan sonra siyasi partiyaların fəaliyyətinə yaxşı şərait yaradılacaq. Azərbaycanda siyasət peşəkarlaşacaq. Bu olmalıdır ki, hər bir həvəskar adam siyasətlə məşğul olmasın. Bunun üçün bütün siyasət partiyaların üzərində qurulmalıdır, proporsional seçki sistemi bərpa edilməlidir, dövlət tərəfindən partiyaların maliyyələşməsi həyata keçirilməlidir”.
Görünən budur ki, hakimiyyət siyasi münasibətlər sisteminin yenilənməsi üçün ciddi addımlar atır. Xüsusilə də müxalif mövqeli partiyalara göstərilən diqqət onu deməyə əsas verir ki, qarşıda bizi sağlam siyasi mübarizə meydanı gözləyir.
Məhəmmədəli QƏRİBLİ
