Ermənistanın işğalçı siyasətinin ifşa edilməsində Azərbaycanın atdığı addımlar öz effektiv nəticələrini verməkdədir. Artıq himayədarları da erməniləri müdafiə etməkdə aciz qalıb. Rəsmi İrəvanın son addımı - zəbt edilmiş ərazilərə Ermənistandan daha bir yol çəkmək niyyəti Avropa İttifaqı tərəfindən də haqlı narazılıqla qarşılanıb.
Məsələ burasındadır ki, Ermənistandan Azərbaycanın işğal altındakı ərazilərinə üçüncü avtomagistralın çəkilişinə hazırlıq gedir. Bununla bağlı məsələ hələ ötən il gündəmə gətirilib. Bu yaxınlarda isə Dağlıq Qarabağdakı qondarma rejimin yeni “prezidenti” Araik Arutyunyan Azərbaycanın Arazboyu ərazilərini Ermənistanın Gorus rayonu ilə birləşdirmək üçün yeni avtomagistralın çəkilməsinə hazırlıq getdiyini deyib.
Bundan əvvəl Ermənistanı Qarabağla Gorus-Laçın-Şuşa-Xankəndi və Vardenis-Kəlbəcər-Ağdərə magistralları birləşdirirdi. İkinci yolu Ermənistan bir neçə il əvvəl istifadəyə verib. Üçüncü və artıq Arazboyu Cəbrayıl, Füzuli, Zəngilan rayonlarını Ermənistanla birləşdirəcək yolun çəkilməsində düşmən ölkənin məqsədi isə həmin ərazilərdə qanunsuz məskunlaşmanı genişləndirmək, münbit kənd təsərrüfatı torpaqlarını istismar etməkdir.
Təbii ki, Azərbaycan buna göz yuma bilməz. Ölkəmiz Ermənistanın bədnam niyyətini reallaşdırmasına imkan verməmək üçün beynəlxalq qanunvericiliyin ona verdiyi üstünlüklərdən və bütün diplomatik vasitələrdən istifadə edir. Ölkəmizin bu siyasəti artıq öz bəhrəsini verməkdədir. Belə ki, iyunun 10-da Avropa Parlamentinin Azərbaycan, Gürcüstan və Ermənistan üzrə Parlament Əməkdaşlıq Komitəsinin həmsədri Mariya Kalyurand, Azərbaycan üzrə məruzəçisi Jelena Zavko, Ermənistan üzrə məruzəçisi Trayan Basesku Ermənistanla Azərbaycanın işğal altında olan Dağlıq Qarabağ bölgəsi arasında əlaqə yaradacaq magistral yolun tikintisi ilə bağlı birgə bəyanat yayıb.
Bəyanatda bu qərarın Azərbaycanın müvafiq orqanları ilə razılaşdırılmadan verildiyi və bunun beynəlxalq hüququn pozulması olduğu qeyd edilir.
Maraqlıdır ki, Ermənistanın çəkmək istədiyi yol Azərbaycanın İranla həmsərhəd olan işğal altındakı ərazilərini əhatə edir. İran bununla bağlı necə bir davranış nümayiş etdirməlidir?
Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu “Bakı-Xəbər”ə açıqlamasında bildirdi ki, İranın Ermənistana və ermənilərə hədsiz inamı Ermənistanın imkanlarını genişləndirir:“Elə məsələlər var ki, orada ölkələrin münasibəti konkret olmalıdır. Ermənilərin Qarabağdan Ermənistana üçüncü yolu çəkmək istəmələri beynəlxalq hüquqa göstərilən hörmətsizliyin yeni nümunəsidir. Dünya birliyi onların hərəkətlərində belə davranışları ilk dəfə deyil ki, görür. Üçüncü yolla bağlı məsələdə ermənilər olduqca ciddi diplomatik dərs aldılar. Avropa Parlamenti konkret olaraq həmin addımı pislədi. Bu bütün Avropa ölkələrinin adından verilən bəyanat idi. Həmin qurum və digər nüfuzlu təsisatlar qondarma qurumda keçirilən son seçkiləri də pisləyən mövqe ortaya qoymuşdu. İranın bu cür məsələlərə susqun qalması maraqlı görünür. İranın qondarma qurumdakı seçkilərlə bağlı verdiyi bəyanat da məzmun baxımından qaneedici deyildi. Bəli, doğru qeyd edirsiniz ki, həmin yol onunla həməsrhəd olan əraziləri əhatə edir. Bu, Avropadan əvvəl İranı narahat etməlidir. Çünki onun birbaşa sərhədlərində
təhlükəsizlik üçün təhdid yaranır. Desək ki, İranın buna gücü çatmır, inandırıcı görünməz. Çünki bu ölkə özü ilə həmsərhəd və hətta sərhədlərindən xeyli aralı yerlərdə bəzən açıq müharibəyə girişir. Bunu da təhlükəsizliyinə olan təhdidlə əlaqələndirir. Belə olan halda sözügedən məsələdə İranın susqunluğu bəzən razılıq əlaməti kimi də qeyd edilə bilər. Bugünlərdə İranda bizim soydaşlarımız Ermənistan səfirliyinin önündə aksiya keçirdilər. Açıq formada Ermənistanın İsraildə səfirlik açmasına etiraz edildi. Aksiya iştirakçıları Ermənistan bayrağını yandırıblar.
Etirazlara rəsmi İrəvanın tezliklə İsraildə Ermənistan səfirliyi açmaq bəyanatı səbəb olub. İran vətəndaşları bəyan ediblər ki, İran hər zaman Ermənistanın ən ağır günündə qonşu ölkə kimi yanında olub, lakin İrəvanın İranın düşməni olan İsraildə səfirlik açması iki ölkə arasındakı münasibətlərə xələl gətirir və bu xəyanətdir. İranın rəsmiləri az qalırlar ki, Ermənistan səfirliyində keşik çəksinlər. Hər gün bir nazir gedib, müxtəlif vədlərlə onların könlünü alır. Ermənistana belə həssaslığın kökündə duran səbəblər İrana imkan vermir ki, Qarabağdan çəkilən və onun sərhədlərindən keçən üçüncü yola açıq etirazını bildirsin”.
Məhəmmədəli QƏRİBLİ
