Dünyada koronavirusa yoluxma və ölümlə bağlı ən təhlükəli ölkələrin adları açıqlanıb. Belə ki, dünyanın COVID-19-un qeydə alındığı 213 ölkə və bölgəsində təhlükəli infeksiyadan ölənlərin sayı 439 085 nəfərə çatıb. Bu barədə “Report” ayrı-ayrı ölkələrin koronavirusla bağlı statistikasına istinadən xəbər verir.
Son məlumatlara görə, dünyada koronavirusa yoluxanların ümumi sayı 8 113 679 nəfərə çatıb. Hazırda 3 460 993 nəfər aktiv koronavirus xəstəsidir. Pandemiya ərzində təhlükəli virusdan, ümumilikdə, 4 213 601 nəfər sağalıb.
Dünyada koronavirusa ən çox yoluxma ABŞ-da qeydə alınıb. Birləşmiş Ştatlarda təhlükəli infeksiyaya 2 182 950 yoluxma qeydə alınıb, koronavirusdan 118 283 nəfər ölüb.
COVID-19-a yoluxma üzrə siyahıda ikinci yerdə Braziliya qərarlaşıb. Cənubi Amerika ölkəsində 891 556 insan virusa yoluxub. Bununla yanaşı, 44 118 insan koronavirusdan vəfat edib.
Qaonşu Rusiya da koronavirusa yoluxanların sayı üzrə ilk üçlükdə qərarlaşıb. Şimal qonşumuzda COVID-19-a 537 210 yoluxma təsdiqlənib, 7 091 insan pandemiyanın qurbanı olub.
Cənubi Asiya ölkəsi Hindistanda 343 026 insan cari ilin ən təhlükəli virusuna yoluxub, 9 915 nəfər virusdan dünyasını dəyişib.
Böyük Britaniya Qərbi Avropanın koronavirusdan ən çox əziyyət çəkən ölkəsidir. Birləşmiş Krallıqda 296 857 nəfər COVID-19-a yoluxub, 41 736 insan ölüb. Qərbi Avropanın digər ölkəsi İspaniyada yoluxma sayı 291 189, pandemiya qurbanlarının sayı isə 27 136 nəfər təşkil edir.
Siyahıda 7-ci yerdə virusa 237 290 yoluxma sayı ilə İtaliya qərarlaşıb. Qərbi Avropanın bu ölkəsində 34 371 nəfər virusdan ölüb.
Peru dünyada koronavirusa yoluxma hallarının sayına görə 8-ci yerdədir. Amerika ölkəsində 232 992 nəfər COVID-19 daşıyıcısı kimi qeydiyyata alınıb.
Cənub qonşumuz İran dünyada koronavirusa ən çox yoluxma hallarının sayına görə 9-cu yerdədir. Bu ölkədə infeksiyaya 189 876 nəfər yoluxub, 8 950 insan ölüb.
Almaniya dünyada koronavirus xəstələrinin sayına görə 10-cu yerdədir. Qərbi Avropa ölkəsində COVID-19-a 188 044 nəfər yoluxub, 8 885 insan pandemiyanın qurbanı olub.
Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Ümumdünya Səhiyyə Təşkilatı fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.
Çox qəribədir ki, bu gün pandemiyanın geniş yayıldığı, ölüm və yoluxanların sayının günü-gündən artdığı Ermənistan bu siyahıdan kənarda qalıb. Halbuki, Ermənistan bu siyahıda ön yerlərdən birini tutmalı idi. Bilirik ki, bu ölkədə vəziyyət o qədər kritikdir ki, Rusiya mətbuatı oranı “koronavirus cəhənnəmi” adlandırıb. Rusiya mətbuatında Ermənistanda koronavirusun yaratdığı ciddi fəsadlarla və bu bəlanın bütün dünyanı təhdid etdiyi ilə bağlı nəşr edilən geniş reportaj-araşdırma fikrimizcə, daha çox diqqəti cəlb etməli idi. Siyahıda adları çəkilən dövlətlərin hər birinin ərazisi, əhalisi Ermənistanın ərazisindən də, əhalisinin sayından da qat-qat çoxdur. Həmin ölkələrin hər birinin milyonlarla vətəndaşı var, Ermənistanın vətəndaşlarının sayı isə heç 3 milyon nəfəri ötmür. Bu halda, Ermənistanın koronavirusa yoluxma və ölümlə bağlı ən təhlükəli ölkələrin adlarının yer aldığı siyahıda olmaması təəccüb və təəssüf doğurur.
Bu gün Allah ümidinə qalan və qonşularına, eləcə də bütün dünyaya bəla saçan Ermənistanla bağlı beynəlxalq qurumların rəy bildirməsi gözləniləndir. Hazırda bütün Qafqazın “koronavirus cəhənnəmi” sayılan Ermənistan bu siyahıdan necə çıxarılıb, yaxud niyə salınmayıb?
Rauf Zeyni: “Ermənistanın təhlükəli dövlət kimi o siyahıya düşməməsi üçün erməni lobbisi də gecə-gündüz çalışır”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə bildirdi ki, koronavirusla “hayvirus”un heç bir fərqi yoxdur, “hayvirus” bizim başımızın bəlasına çevrilib. “200 ildir “hayvirus”a qarşı mübarizə aparırıq, indi də koronavirusa qarşı mübarizəmizi davam etdiririk. Əlbəttə, dünyada elə ölkələr var ki, onlar koronavirusun yayılma miqyasına və ölüm hallarına görə təhlükəli ölkələr siyahısındadırlar. Təəssüflər olsun ki, həm ÜST tərəfindən, həm də sosial şəbəkələrdə yayılan bir çox material insanlar arasında bir çaşqınlıq yaratdı. Bəzi tanınmış alimlər, professorlar, mütəxəssislər bildirirdilər ki, koronavirus yoxdur, bu, beynəlxalq güclərin bir oyunudur. Bu, çox təhlükəli informasiya idi. Təəssüf ki, bizim də bəzi vətəndaşlarımız məhz sosial şəbəkələrdəki yayılanlara inanır, bu problemlər də ondan qaynaqlanır. Biz bu virusun yayılmasından insanların özünü qoruması üçün məcburi maarifləndirmə işlərini daha yüksək səviyyədə davam etdirməliyik. O ki, qaldı mənfur qonşularımızın bu siyahıda yer almamasına, bilirik ki, onlar dünya informasiya şəbəkəsində mövcud olan lobbiçilik fəaliyyətləri ilə müəyyən bir müddətdə istər işğal, istər müharibə, istər terror, istər soyqırım, istərsə də koronavirusla bağlı öz məlumatlarını gizlədə bilirlər. Onlar bu kimi məsələlərdə “usta”dırlar. Bu gün həm də dünyanın başı özünə qarışıb və Ermənistan onları maraqlandırmır. Ermənilər də fürsətdən istifadə edərək, informasiyaları gizlədə bilirlər. Dediyiniz kimi, Rusiya mediası Ermənistanı “koronavirus cəhənnəmi” adlandırıb və eyni zamanda, Paşinyan da elan edib ki, cəhənnəmin ortasındadırlar. Amma buna baxmayaraq, nə üçün dünyanın tanınmış informasiya agentlikləri Ermənistandakı real vəziyyəti əks etdirmirlər? Bunun da səbəbi ikili standartla bağlıdır. Həm xristian ölkəsi olaraq, həm də xaricdəki erməni lobbisi tərəfindən qorunan bir ölkə kimi informasiya dəhlizlərindən maneəsiz keçə bilir və bununla da informasiyalarını gizlədirlər, saxtakarlığa əl atıb saxta imic yarada bilirlər. Ermənistanın təhlükəli dövlət kimi o siyahıya düşməməsi üçün erməni lobbisi də gecə-gündüz çalışır. Bu baxımdan, düşünürəm ki, Ermənistanla əlaqədar hələ gerçəkliklər dünya informasiya şəbəkələrinə sızmayıb. Ancaq orada bir koronavirus - “hayvirus” partlayışı olsa, bu, region ölkələri üçün də böyük təhlükədir”.
R.Zeyni qeyd etdi ki, Azərbaycanın informasiya agentlikləri Ermənistanda mövcud olan təhlükə ilə bağlı mütəmadi olaraq dünya ictimaiyyətinə informasiyalar çatdırmalıdırlar.
Azər Həsrət: “Belə rəqəmlər varkən, Ermənistanın qeyd olunan siyahıdan kənarda qalması artıq kimlərinsə bura süni müdaxiləsindən xəbər verir”
Siyasi şərhçi Azər Həsrət də bizimlə söhbətində qeyd etdi ki, Ermənistanda hazırkı durum həqiqətən də fəlakət həddindədir: “Statistikada yer almasa da, Ermənistan virusun geniş yayıldığı ən təhlükəli ölkələrin sırasındadır. Bu ölkənin əhalisinin sayı 3 milyona yaxındır. Artıq bu günə olan məlumata görə, 17 min 489 nəfərdə koronavirusa yoluxma qeydə alınıb, həmin adamlardan 293 nəfəri dünyasını dəyişib. Təbii ki, bu rəqəm bu qədər az əhalisi olan ölkə üçün dəhşətlidir. İndi isə biz rəsmi faktlara əsaslanaraq Ermənistanda nə qədər insanın virusa yoluxduğuna və öldüyünə baxaq. Hər 1 milyon nəfərə 5 min 902 nəfər yoluxma, hər 1 milyon nəfərə isə 99 ölüm halı düşür. Ermənistanda hazırda koronavirusa yoluxma və bu virusdan ölmə halları fəlakət həddindədir. Bu siyahını tərtib edənlərin niyə Ermənistanı bu siyahıya salmadığının səbəbini bilmirik. Amma başqa ölkələrlə müqayisə edib göstəririk ki, Ermənistan həqiqətən də bu siyahıda adı olmamasına baxmayaraq, fəlakət həddindədir, dəhşətli bir vəziyyətdədir. Məsələn, Rusiyada Ermənistandan iki dəfəyə yaxın az yoluxma və iki dəfədən az ölüm qeydə alınıb. Bugünkü məlumata görə, Rusiyada hər bir milyon nəfərə yoluxma halı 3738 nəfər düşür. Ermənistanda isə 6 minə yaxındır. Yaxud Rusiyada son məlumata görə, hər bir milyon nəfərə 50 nəfər ölüm halı düşür. Ermənistanda isə bu rəqəm 99 nəfərdir. Görürsünüzmü, fərq nə qədərdir? Yaxud haqqında çox danışılan İtaliyanı götürək. Həmin ölkədə ümumi əhalinin nisbətinə böləndə hər bir milyon əhaliyə 3924 yoluxma düşür. Qonşu İranda isə hər bir milyon insan 2262 yoluxma var. Almaniyada hər bir milyon nəfərə 2245 yoluxma düşür. Müvafiq olaraq Almaniyada hər bir milyon nəfərə 106, İranda isə 107 ölüm hadisəsi qeydə alınıb. Qardaş Türkiyədə isə vəziyyət Ermənistanla müqayisədə çox yaxşıdır. Hər bir milyon nəfərə 2133 yoluxma, 57 ölüm hadisəsi qeydə alınıb. Göründüyü kimi, yoluxma halı Ermənistandan 3, ölüm halları isə 2 dəfə azdır. Yəni belə rəqəmlər varkən, Ermənistanın qeyd olunan siyahıdan kənarda qalması artıq kimlərinsə bura süni müdaxiləsindən xəbər verir. Bu siyahıya Ermənistanın əlavə edilməsi yaxşı hal olardı. Yeri gəlmişkən, Azərbaycanda da vəziyyət oxucular üçün maraqlı olar deyə, rəqəmlər söyləmək istəyirəm. Azərbaycanda hər bir milyon nəfərə 1019 yoluxma və 12 ölüm hadisəsi düşür. Yəni bu, Ermənistanla heç bir dərəcədə müqayisə ediləcək rəqəmlər deyil”.
Azərbaycanda koronavirus pandemiyası ilə bağlı kifayət qədər tədbir görüldüyünü nəzərə çatdıran A.Həsrət bildirdi ki, Azərbaycanın o siyahıya düşməsi mümkün deyil. A.Həsrət qeyd etdi ki, Azərbaycanda 400 minə yaxın test həyata keçirilib, bu, az rəqəm deyil. “Bu o deməkdir ki, hər milyon nəfərimizə 38-40 minə qədər test düşür. Ermənistanda isə cəmi 85 min 500 test keçirilib, onun da hər milyonuna 28 min 875 test düşür. Yəni Ermənistanda 85 min testdən sonra 17 min 489 yoluxma aşkarlanıb. Azərbaycan qədər 400 min test keçirmiş olsaydı, Ermənistanda yoluxma hallarının sayı yəqin ki, 80-100 minə qədər gəlib çıxacaqdı. Bu baxımdan, siyahı tərtib edilərkən Ermənistana yanaşmada subyektivliyə yol verilib. Amma, bütövlükdə, biz Ermənistan da daxil olmaqla, bütün bəşəriyyətin bu bəladan qurtulmasını arzu edirik” - deyə A.Həsrət qeyd etdi.
İradə SARIYEVA
