Erməni mediası yenidən Rusiyanı hədəfə alıb. Ermənistanın “Metsamor” AES-in modernləşdirilməsi üçün Rusiya kreditinin bir hissəsindən imtina etməsi ilə bağlı məsələyə toxunan yerli mətbuat yazır ki, Ermənistanın suverenliyinə zidd tələblər olduqda, İrəvan Rusiyaya “yox” deməyi bacarmalıdır:
“Rusiya Ermənistandakı “məxməri inqilab”dan sonra İrəvanla münasibətləri suverenlik əsasında qurmağa başlayan oyun qaydalarını qəbul etmir. Kreml Ermənistanı öz təhlükəsizliyinə təhdid kimi baxır. Bütün hallarda, biz ölkəmizi Rusiyanın təhdidlərindən qorumalıyıq”.
Bununla belə, məqalə müəllifi Rusiyanın Ermənistanın suverenliyinə “genetik toxunulmazlığı”nı, o cümlədən, “Qazprom”un qazın qiymətini aşağı salmaqdan imtina etməsində görür. Və yaxın gələcəkdə Ermənistanın Rusiyanı birtərəfli güzəştlər etməyə məcbur edə biləcəyini ehtimal edir. Ümidlə onu da yazırlar ki, qaz məsələsinin həllində eyni fraqmentin şahidi olacaqları istisna olunmur: “Ermənistan əmin olmalıdır ki, Rusiya Türkiyəni deyil, Ermənistanı regional tərəfdaş kimi qəbul edir. Moskva üçün problem Ermənistanın Qərbə doğru getməsi deyil, suveren Ermənistanın “yox” deyə bilməsidir”.
Göründüyü kimi, erməni mediasında anti-Rusiya isterikası yenidən qabarır. Ermənistanı elə təqdim edirlər ki, guya bu dövlət həqiqətən də müstəqildir və bu baxımdan ortaya iradə qoymaq qüdrətinə sahibdir. Bu isə, heç şübhəsiz, gülünc təsir bağışlayır. Ona görə ki, reallıq bunun əksini deyir. Belə olan halda, erməni mediasında silsilə şəklində aparılan anti-Rusiya kampaniyası nə deməkdir?
“Hesab edirlər ki, Moskva onların nazı ilə oynamağa məcburdur”
Sözügedən məsələyə aydınlıq gətirən politoloq Elşən Manafov bununla bağlı bir sıra məqamlara toxundu. Onun fikrincə, anti-Riusiya kampaniyasını Paşinyana yaxın media həyata keçirir: “Son vaxtlar Ermənistan-Rusiya münasibətlərində nəzərəçarpacaq dərəcədə gərginlik var. Düzdür, Baş nazir Nikol Paşinyan iyunun 24-də Moskvada keçiriləcək qələbə paradına dəvət olunub, amma sözügedən görüş rəsmi deyil. İşgüzar bir səfərdir. Bundan əvvəl Avrasiya İqtisadi Birliyinin İrəvanda keçirilən tədbiri ilə bağlı Putinin ora məlum səfərindən sonra iki ölkə arasında böhran daha da dərinləşdi. Böhranın dərinləşməsinə səbəb olan bir neçə amil var. Bu, əsasən, Paşinyanın Rusiyadan asılı olmamaq istəyindən irəli gəlir. Putin sabiq prezident Robert Köçəryanın həbsdən azad edilməsi ilə bağlı səy göstərdi, amma Paşinyan onun bu istəyini nəzərə almadı. Üstəlik, bu günlərdə Paşinyanın təzyiqi ilə güc strukturlarında Rusiyaya yaxın olan şəxslər istefa verdi. “Metsamor” AES-in modernləşdirilməsi üçün Rusiya kreditinin bir hissəsindən imtina edilməsi də bunun tərkib hissəsidir. “Qazprom”un qazın qiyməti ilə bağlı güzəştə getməməsi də Paşinyan hakimiyyətini qıcıqlandırır. Bir şeyi nəzərə almaq lazımdır ki, Paşinyan Qərbin maliyyə dəstəyilə hakimiyyətə gəlib. Onu hakimiyyətə gətirən məlum dairələr istəyirlər ki, Ermənistan Rusiyanın təsir dairəsindən çıxsın. Gürcüstanın ardınca Cənubi Qafqazda daha bir ölkəni Qərbin təsir sferasına salmaq istəyirlər. Ancaq bu mümkün görünmür. Çünki Gürcüstandan fərqli olaraq, Ermənistan kifayət qədər Rusiyadan asılıdır. Sadəcə, Paşinyan yaranmış vəziyyətdən istifadə edərək Rusiyanı şantaj edir. Hesab edirlər ki, Moskva onların nazı ilə oynamağa məcburdur. Bəlli erməni mediasında aparılan anti-Rusiya kampaniyası həm də bununla əlaqədardır”.
Vidadi ORDAHALLI
