Avropa Şurasının insan haqları üzrə komissarı Dunya Miyatoviç yenidən Azərbaycanı hədəf alıb. O, bəyan edib ki, Azərbaycan hakimiyyəti pandemiyadan azadlıqları boğmaq üçün istifadə edir. Guya Azərbaycan bu məcburiyyətdən bəhanə kimi istifadə edərək, ifadə və toplaşma azadlığına basqılar həyata keçirir.
Komissar COVID-19 pandemiyası ilə əlaqədar bir çox Avropa Şurası ökəsinin insan həyatını qorumaq naminə ölçülər götürdüyünü, ictimai toplantılara, hərəkət azadlıqlarına müvəqqəti məhdudiyyətlər tətbiq etdiyini qeyd edib: “Təəssüf ki, Azərbaycan da daxil olmaqla, bəzi hökumətlər bu məcburiyyətdən bəhanə kimi istifadə edərək, ifadə və toplaşma azadlığına basqılar həyata keçirirlər. COVID-19 məhdudiyyətləri azadlıqların dayandırılmasına xidmət etməməlidir. Böhran vaxtında hüquqlara tətbiq edilən məhdudiyyətlər qanunçuluq prinsiplərinə, ehtiyaca və proporsionallığa riayət etməlidir”.
Miyatoviç Azərbaycana bununla əlaqədar xəbərdarlıq etdiyini də qeyd edib: “Bu yaxınlarda Daxili İşlər nazirinə göndərilən məktubda mən nümayişlərin dağıdılması və bu kontekstdə toplaşma azadlığına qoyulan məhdudiyyətlər, ələlxüsus hüquq-mühafizə orqanları tərəfindən nümayişçilərə qarşı ifrat güc tətbiqi ilə bağlı narahatlıqları qaldırmışam”.
Belə görünür ki, bəlli təşkilatlar koronavirusu bəhanə edərək Azərbaycanı qaralamaqda qərarlıdırlar. Belə olmasaydı, dəfələrlə sözügedən məsələ gündəmə gətirilməzdi. Məqsədləri nəyin bahasına olursa-olsun, Azərbaycan barəsində mənfi rəy yaratmaqdır.
“Miyatoviçin səsləndirdiyi fikirlər reallığı əks etdirmir və obyektivlikdən uzaqdır”
Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədlinin sözlərinə görə, Azərbaycanı sevməyən müəyyən qüvvələr fürsət gözləyirlər ki, ölkənin imicinə kölgə salsınlar: “Müəyyən beynəlxalq təşkilatlar var ki, onların işi ancaq Azərbaycanı qaralamaqdır. Fürsət düşən kimi, öz qərəzli mövqelərini sərgiləyirlər. Bu günlərdə bir sıra beynəlxalq qurumların Azərbaycanla bağlı qərəzli münasibətini gördük. Bir daha aydın oldu ki, sözügedən qurumların məqsədi yalnız Azərbaycanı hədəf almaqdır. Bunların başında gələn ATƏT-in Demokratik Təsisatlar və İnsan Haqları Bürosudur. Eyni zamanda, Avropa Şurasının insan haqları üzrə komissarı Dunya Miyatoviç sözügedən məsələdə xüsusi fəallıq göstərir. Avropa təsisatlarında media və insan haqları üzrə komissarlar dəyişsə də, sözgedən qurumların Azərbaycana qərəzli münasibəti dəyişmir. Komissarlar əvvəlki qaydada adi bir məsələni kontekstdən çıxarıb böyüdürlər. Onun əsasında Azərbaycanda vahiməli bir durumun olmasını iddia edirlər. Bir növ, bu, onların qərəzli xarakterindən doğan yanaşmadır. Azərbaycanda pandemiya ilə uğurlu mübarizə gedir. Bununla bağlı müəyyən məhdudiyyətlərin tətbiq edilməsi o demək deyil ki, azadlıqlar boğulur, yaxud media basqı altındadır. O üzdən, D.Miyatoviçin səsləndirdiyi fikirlər reallığı əks etdirmir və obyektivlikdən uzaqdır”.
Vidadi ORDAHALLI
