“O, istedadlı bir sənətkar kimi milli ədəbiyyatımıza xidmət edib və ədəbiyyatımızın nüfuzunu qaldırıb”
Bildiyimiz kimi, 1938-ci ildə Stalin repressiyasının qurbanlarından biri olan görkəmli Azərbaycan şairi Mikayıl Müşfiqin qalıqlarının tapılması barədə informasiyalar mətbuatın gündəmində yer alıb.
Artıq bu həssas məsələ Azərbaycan Prezidenti İlham Əliyevin də diqqətini çəkib və ölkə başçısı M.Müşfiqə aid olduğu bildirilən qalıqların DNT analizlərinin keçirilməsi, bu cəsədin şairə aid olub- olmamasının araşdırılması üçün müxtəlif dövlət qurumlarının təmsilçiliyi ilə işçi qrupu yaradıb. M.Müşfiqlə bağlı məsələ ölkə başçısı tərəfindən nəzarətə götürülüb.
Bu gün ölkəmizdə hər bir Müşfiqsevər işçi qrupunun aparacağı araşdırmaların nəticəsini intizarla gözləyir. Hazırda ölkənin ədəbi ictimaiyyətində ən çox müzakirə edələn məsələ M.Müşfiqlə bağlıdır.
“Mikayıl Müşfiq Azərbaycan ədəbiyyatı tarixində öz dəst-xətti olan sənətkardır, şairdir. Müşfiq ədəbiyyatımıza yeni üslub, yeni düşüncə, azad fikirlilik gətirib. Eyni zamanda, lirik hissləri azad şəkildə ifadə etmək bacarığı ilə Azərbaycan ədəbiyyatında istedadın nə olduğunu üzə çıxarıb. Müşfiqin yaşadığı dövr elə bir dövr idi ki, istedadı təqdim etmək asan deyildi. O, istedadlı bir sənətkar kimi milli ədəbiyyatımıza xidmət edib və ədəbiyyatımızın nüfuzunu qaldırıb. Ona görə də biz Müşfiqi bütün dövrlərdə oxumalı və öyrənməliyik. Hətta onun yaradıcılığında Sovet dönəmi ilə bağlı bəzi məqamlar var ki, bu nümunələrin özü də Müşfiqin istedadını üzə çıxaran ədəbi-bədii örnəklərdir. Bu səbəbdən də Azərbaycan ədəbiyyatını Mikayıl Müşfiqsiz təsəvvür etmək mümkün deyil. O, ədəbiyyatımızın ən xarakterik detallarını öz yaradıcılığında əks etdirib”. Bu fikirləri “Bakı-Xəbər”ə Mikayıl Müşfiqin Azərbaycan ədəbiyyatındakı mövqeyini, yerini şərh edərkən Azərbaycan Dövlət Pedaqoji Universitetinin filologiya fakültəsinin dekanı, professor, tanınmış alim Buludxan Xəlilov bildirib.
B.Xəlilovun sözlərinə görə, M.Müşfiq lirik düşüncəni, şeiriyyətin dilindəki poetik ifadələri, onun gücünü və mənanı ifadə etmək qabiliyyətini ədəbiyyatımızda tərənnüm edən görkəmli sənətkarlardan biridir. “Eyni zamanda da Müşfiq Azərbaycan dilinin imkanlarını təqdim etməyi bacaran şairlərimizdən biri olub. Yəni o, Azərbaycan dilinin imkanlarını elə təqdim edib ki, biz dilimizi həm də onun yaradıcılığı vasitəsilə sevirik. Ona görə də bütün dövrlərdə Müşfiqin yaradıcılığı oxunacaq və seviləcək” - deyə bildirən B.Xəlilovun sözlərinə görə, bizə əsasən M.Müşfiqin Nargin adasında qətlə yetirilərək Xəzər dənizinə atılması ilə bağlı məlumatlar məlum olub. O, hesab edir ki, bu məlumatlar, əslində, Sovet tarixşünaslığının yalanlarından biri kimi illər boyu beynimizə yeridilib. B.Xəlilov bildirdi ki, Müşfiqin izi ilə digər repressiya qurbanları haqqında da müfəssəl məlumatlar almaq imkanı yaranıb: “Biz bundan sonra repressiya olunmuş sənətkarların, ədiblərin taleyi ilə daha ciddi maraqlanmalıyıq. Prezidentin M.Müşfiqlə bağlı məsələyə diqqət göstərməsi bizdən repressiya olunmuşların taleyinə yenidən yanaşmamızı tələb edir. Onların çoxunun repressiya olunması şəraitinin tarixi kökləri yenidən araşdırılmalıdır. Heç şübhəsiz ki, maraqlı faktlar üzə çıxacaq. Cənab Prezidentin M.Müşfiqlə bağlı məsələnin araşdırılması üçün xüsusi işçi qrupu yaratması, bu həssas işi öz şəxsi nəzarətinə götürməsi ədəbiyyata, sənətə, sənətkara verilən qiymətin təzahürüdür. Bunun belə olması tam təbiidir. Müşfiq irsinə, şəxsiyyətinə göstərdiyi sayğıya və ehtirama görə Prezident İlham Əliyevə təşəkkürümü bildirirəm. O, həmişə ədəbiyyatımıza, mədəniyyətimizə, şəxsiyyətlərimizə, onların irsinə, yaradıcılığına hörmət və qayğı ilə yanaşıb”.
İradə SARIYEVA
