“Cəmiyyət əməlli-başlı silkələnməli, belə mənfi hallara, təzahürlərə ciddi müqavimət göstərməlidir”
Şou-biznes nümayəndələrinin bir qisminin adı insan alverində, qadınları cinsi istismara məruz qoyanlara yardımçı olmaqda hallandırılır. Hətta şou-biznesdə təmsil olunan bəzi şəxslərin insan alverinə görə məsuliyyətə cəlb edilməsinin şahidi oluruq. Hüquq-mühafizə orqanları tərəfindən saxlanan, məsuliyyətə cəlb edilən şou-biznesçiləri insan alverinə cəlb edən nədir?
İctimai Nəzarət Koalisiyasının baş katibi, yazıçı-kulturoloq Aydın Xan Əbilov “Bir məşhur kəlamda deyildiyi kimi, cinayətkarın nə peşəsi, nə milləti, nə irqi, nə də cinsi olur. Azərbaycanda bir sıra məsələlər var ki, onlar ciddi ictimai qınağa, təpkiyə məruz qalmalıdır. Onlardan biri şou-biznesdə tanınan insanların bu və ya digər dərəcədə müxtəlif cinayət hadisələrində adlarının hallandırılması ilə bağlıdır. Bu gün şou-biznes sahəsində təmsil olunan bəzi insanların insan alveri cinayətində adının hallandırılması, onların cinayət məsuliyyətinə cəlb edilməsi faktlarına rast gəlirik. Qeyd edilən sahədə bir çox insan “YouTube”də müğənni kimi tanınırlar. Onlar qazandıqları o pullar vasitəsilə telekanallara çıxır, müxtəlif konsertlərdə iştirak edir, “YouTube” və digər sosial şəbəkələrdə öz adlarını hallandırırlar. Məsələn, biz burada “YouTube” trendi olan Maral Tahirqızının adını çəkə bilərik. O, təbii ki, tək deyil, onun kimiləri şou-biznesdə çoxdur. Bu cür adamlar məşhurlaşandan sonra belə əməllərə qol qoyurlar. Bilirsiniz ki, bizim cəmiyyətdə bir çox şeylərə ironik yanaşılır. İnsanlar özləri də bilmədən bu cür insanları spam vasitəsilə smartfonlarda, sosial şəbəkələrdə trendə çevirirlər. Ondan sonra isə əlaqədar qurumlar bu cür insanlarla maraqlanırlar və məlum olur ki, onların “çirkli pulların yuyulması”nda əlləri var. Hətta bir çoxları narkotik satışı, qadın alveri, eyni zamanda, sələmçiliklə məşğul olurlar. Bu kimi faktlar var. Yəni həmin insanların hüquq-mühafizə orqanları tərəfindən həbs edilərək cinayət məsuliyyətinə cəlb edilməsi baş verir. Sözsüz ki, həmin insanların bu cinayəti törətməsində özlərinin, eləcə də onları alətə çevirən müəyyən qara qüvvələrin və cəmiyyətin günahı var. Cəmiyyət əməlli-başlı silkələnməli, belə mənfi hallara, təzahürlərə qarşı ciddi müqavimət göstərməlidir. Çünki narkotik maddə satanlar da bizim uşaqlarımızı zəhərləyir, insan alveri ilə məşğul olanlar qızlarımızın və oğullarımızın gələcəyini məhv edirlər”- deyə bildirdi. O hesab edir ki, insan alveri kimi mənfur bir sahə ilə məşğul olan şou-beznesçilər xərçəng xəstəliyindən də təhlükəlidirlər.
A.X.Əbilov hesab edir ki, adı qadın, insan alverində və narkoticarətdə hallandırılan şou-biznes adamları sənəti olmayanlardır, onlar sosial şəbəkələr vasitəsilə məşhurlaşan şəxslərdir. Cəmiyyətin belələrinə qarşı amansız olmalı olduğunu vurğulayan A.X.Əbilovun sözlərinə görə, belə insanların hər yerdə meydanı daraldılmalıdır: “Belə insanlar ictimai simalıqdan məhrum edilməlidirlər ki, onların əməlinə görə aldıqları cəzadan başqaları da dərs götürsün. Belə insanlar efirlərə buraxılmamalı, ictimai tədbirlərə dəvət edilməməlidirlər. Sənəti olmayan bir qrup insanın insan alveri kimi bəd əməllə məşğul olması faktına hüquq-mühafizə orqanları reaksiya verir, onları cinayət məsuliyyətinə cəlb edirlər. Hüquq-mühafizə orqanları öz işlərini görürlər, eyni zamanda, belə əməl sahiblərinə güclü ictimai qınaq göstərilməlidir”.
İradə SARIYEVA
