Mədəniyyət Nazirliyinin və Azərbaycan Aşıqlar Birliyinin birgə təşkilatçılğı ilə Rəşid Behbudov adına Mahnı Teatrında görkəmli ustad aşıq, böyük sənətkar Murad Niyazlının 85 illik yubileyi qeyd edildi. Uzun illərdir aramızda olmayan ustad aşıq Murad Niyazlı Azərbaycan aşıq sənətinin elə simalarındandır ki, onun xidmətlərini sadalamaqla qurtarmaz. Ustad sənətkar hələ sağlığında aşıq sənətinin klassikləri səviyyəsinə ucala bilmişdi.
Yubiley gecəsini Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı açaraq böyük sənətkarın aşıq sənətinin inkişafına verdiyi töhfələrdən danışdı. M.Qasımlı bildirdi ki, 1933-cü ildə Göyçə mahalının Aşağı Şorca kəndində Niyazlılar tayfasında anadan olan sənətkarın atası 1941-ci ildə Böyük Vətən Müharibəsinə könüllü gedənlər sırasında olub və onun müharibəyə getməsi ailəsinin dolanışığına pis təsir edib. Sənətkarın anası Tamam xanım 1948-ci ildə Göyçə mahalından köçərək uşaqlarını da götürüb Şəmkirin Dəllər Cəyir kəndindəki qohumlarının yanında məskunlaşıb.
Aşıq Murad Niyazlı Şəmkirdə yaşayarkən, 1949-cu ildən əvvəlcə aşıq Əsədə, ordu sıralarından qayıtdıqdan sonra isə, 1954-1959-cu illərdə aşıq Əsədin qardaşı aşıq Məhəmməd Rzayevə qulluq edib. Murad Niyazlının sənətkartək püxtələşməsində və sənət meydanında özünü təsdiqləməsində Morullu aşıq Teymurun böyük əməyi olub.
Aşıq Murad Niyazlı “Türk oğluyam, türkəm oğul” deyə hayqıran böyük sənətkar kimi bütün Türk dünyasında məşhur idi. 1990-cı ildə Türkiyədə keçirilən folklor festivalının qalibi kimi tanınan Murad Niyazlı 1960-cı illərdən Şəmkir rayon mədəniyyət şöbəsinin nəzdində fəaliyyət göstərən aşıqlar ansamblına rəhbərlik edib. İdris Həmzəyev, Oqtay Hüseynov və digər şəyirdləri olub.
M.Niyazlı 2005-ci il yanvarın 4-də Şəmkir rayonunun Dəllər Cəyir kəndində vəfat edib və kənddəki qəbiristanlıqda dəfn olunub.
Aşıq M.Niyazlı ancaq ifaçı və dastançı aşıq olmayıb, o həm də yaradıcı aşıq kimi özünə böyük şöhrət qazanıb. Aşıq şeirinin bütün şəkillərində şeirlər yazan sənətkar “Muxtar bəy” və başqa dastanların yaradıcısı kimi tanınıb.
Bu gün aşıqların və xanəndələrin repertuarında özünə böyük yer tutan “Gilənar” mahnısının müəllifi də aşıq M.Niyazlıdır.
Aşıq M.Niyazlı aşıq sənəti haqqında çox qiymətli fikirlər söyləyən, bu sənətin inkişafına var gücü ilə çalışan ustadlardan olub. Ustadın “Harda türk var, mən ordanam” sözləri artıq kitablarından birinin adına çevrilib.
Ustadın “Ağır ellər ozanıyam” kitabı və ifalarından ibarət eyni adlı disk yubiley gecəsində təqdim edildi.
Aşıq M.Niyazlının 85 illik yubiley gecəsində Əməkdar mədəniyyət işçisi Gülarə Azaflının rəhbərlik etdiyi “Çeşmə” qrupunun, ustadın şəyirdi aşıq Oqtayın ifasında “Gilənar”, aşıq Qələndər Zeynalov və aşıq Altay Məmmədlinin ifasında “Mirzəcanı”, Əməkdar mədəniyyət işçisi aşıq Solmaz Kosayevanın ifasında “Cəlili” havaları təqdim edildi. Gecədə, həmçinin, aşıq Telli Borçalı və aşıq Gülarə Azaflı “Naxçıvangülü”, aşıq Nəbi Nağıyev və aşıq Nazim Quliyev “Göyçəgülü”, solo saz ifaçısı Firudin Hüseynov “Ruhani”, aşıq İlham Aslanbəyli “Şahsarayı”, aşıq Nargilə Mehdiyeva və aşıq Ramin Qarayev “Təbrizi”, aşıq Bəhmən Göyçəli və aşıq Firudin İsgəndərov “Ağır şərili”, aşıq Avdı Musayev və aşıq Qabil Faxralı “Dubeyti”, aşıq İsa Qaraxanlı “Hüseyni”, aşıq Məharət Habiloğlu, aşıq Xavər Zəngilanlı və aşıq Elçin Rəşidoğlu “Orta şəşəngi” havalarını təqdim etdilər.
İradə SARIYEVA
