Müasir informasiya yayımında sözsüz ki, internetin rolu əvəzsizdir. Əksəriyyətimiz xalq ədəbiyyatı nümunələri, folklor örnəkləri ilə kitab vasitəsilə deyil, internet resurslarından istifadə edərək tanış oluruq. Ancaq bəzən internet resurslarında Azərbaycan şifahi xalq ədəbiyyatının müxtəlif nümunələri təhrif olunaraq təqdim edilir. Bəzən görürsən ki, eyni nağıl müxtəlif resurslarda fərqli formalarda təqdim edilir. Bu da sözsüz ki, o mətnlərin təhrif edilməsi ilə bağlıdır.
Bayatıların, aşıq şeirlərinin, nağılların, əfsanələrin, dastanların, atalar sözlərinin bəzi internet resurslarında təhrif edilməsi faktları folklorşünas alimləri də ciddi narahat edir.
Azərbaycan Milli Elmlər Akademiyasının Folklor İnstitutunun şöbə müdiri, filologiya elmləri namizədi, Əməkdar mədəniyyət işçisi Elxan Məmmədli mövzu ilə bağlı “Bakı-Xəbər”ə bildirdi ki, xalq ədəbiyyatı nümunələrinin təhrif edilməsi, onların dəyişdirilməsi yolverilməzdir. Folklor örnəklərinin xalqın tükənməz və toxunulmaz sərvəti olduğunu deyən E.Məmmədli ağız ədəbiyyatı nümunələrinə əl uzadanları qınadığını gizlətmədi: “Mən bir mütəxəssis kimi folklor nümunələrinin tam olaraq qorunmasının, təbliğ edilməsinin tərəfdarıyam. Bilirsiniz, hər kəsin öz səviyyəsi var və hər bir insan da öz səviyyəsinə, düşüncəsinə uyğun işlər görür. Bu gün informasiya cəmiyyətində yaşayırıq. İnternet resurslarından istifadə edib folklor örnəklərini geniş şəkildə təbliğ etməliyik. Ancaq bunu o şəkildə həyata keçirməliyik ki, o nümunələr təhrif edilməsin. Folklor örnəklərinin təhrif edilməsinə çox pis baxıram və bunu yolverilməz sayıram. Əgər kimsə hansısa bir nümunənin orijinal variantını dəqiqləşdirməkdə çətinlik çəkirsə, biz mütəxəssislərə müraciət etsinlər. Onlara kömək etməyə hər zaman hazırıq. Lakin kimlərinsə folklor nümunələrinə barmaqarası yanaşması, onları təhrif etməsi, sözlərini dəyişdirməsi qəbuledilən deyil”.
E.Məmmədlinin sözlərinə görə, folklor örnəklərimizi internetə yükləyən insanlar bu məsələdə həssas olmalı və təqdim etdikləri nümunələrin düzgünlüyünü təmin etməlidirlər. O hesab edir ki, bu cür mühüm işlə daha çox folklor sahəsinə bələd olan adamlar məşğul olarsa, təhriflərə də yol verilməz.
İradə SARIYEVA
