Əli Mahmud:”Düşünürəm ki, ayrıca Milli Qəhrəmanlar Muzeyinin yaradılması çox əhəmiyyətli olardı”
Azərbaycanın ərazi bütövlüyü uğurunda şəhid olan hər bir Vətən övladının xatirəsini ehtiramla yad etməli, onları unudulmağa qoymamalıyıq. Biz o insanları xatirələrini əbədiləşdirməklə yaşadırıq. Onların xatirələrinin əbədiləşdirilməsi nəticəsində müasir gənclər onları tanıyır, döyüş yollarına bələd olurlar.
Azərbaycan torpaqlarının bütövlüyü uğrunda şəhid olan insanlar sırasında Milli Qəhrəman adına, eləcə də “Azərbaycan bayrağı” ordeninə layiq görülənlər də var. Təəssüf ki, bu gün Milli Qəhrəmanlarımızın çox böyük əksəriyyəti həyatda yoxdur. Onlara bu ad şəhid olduqdan sonra verilib.
Bu gün respublikamızda dövlət səviyyəsində Milli Qəhrəmanların xatirəsinin əbədiləşdirilməsi üçün çox böyük işlər görülüb və görülməkdə davam edir. Həm paytaxtda, həm də bölgələrdə onların adlarına küçələr, məktəblər verilib, muzeylərdə xatirə güşələri yaradılıb. Hazırda İstiqlal Muzeyində Milli Qəhrəmanlarla bağlı fondlar fəaliyyət göstərir. Ümumiyyətlə, muzey sistemində şəhidlərlə bağlı xeyli işlər görülüb. Muzeylərdə çalışan şəxslər bildirir ki, bu məkanları ziyarət edən turistlər, əcnəbi qonaqlar, xaricdən gələn rəsmilər şəhidlərlə bağlı guşələrlə xüsusi maraqlanır. Muzey əməkdaşları qeyd edir ki, turistlərin mədəniyyətimiz, arxeologiya və etnoqrafiyamız, tariximizlə yanaşı torpaqlarımızın bütövlüyü uğrunda canından keçən Vətən övladlarının döyüş yolu, həyatı ilə maraqlanması müsbət haldır.
Mütəxəssislər qeyd edir ki, dünyanın bir sıra ölkələrində, xüsusən də qardaş Türkiyədə şəhidlərlə bağlı ayrıca muzeylər fəaliyyət göstərir.
Azərbaycanda da Milli Qəhrəmanlar Muzeyinin yaradılmasına ciddi ehtiyac var. Tarixçilər hesab edir ki, Azərbaycanın ərazibütövlüyü yolunda canından keçən və göstərdikləri misilsiz şücaətə görə Milli Qəhrəman adına layiq görülən insanların xatirəsinin əbədiləşdirilməsi işini daha da genişləndirmək üçün Milli Qəhrəmanlar Muzeyinin yaradılması müsbət olardı.
Tarix elmləri doktoru, professor Anar İsgəndərov bizimlə söhbətində bildirdi ki, bir ziyalı, alim kimi ölkəmizdə belə bir muzeyin yaradılması təşəbbüsünü təqdir edir. A.İsgəndərovun sözlərinə görə, Milli Qəhrəmanlar muzeyi yaradılarsa, biz bununla çox şeyə nail ola bilərik:”Milli Qəhrəmanlar muzeyi yaradılarsa, mən buna çox müsbət baxıram. Çox arzu edərdim ki, ölkəmizdə belə bir muzey yaradılsın. Təşəbbüsün özü çox gözəldi və gərəklidir. Muzeylər həmişə xalqların tarixində böyük rol oynayıb. Çox arzu edərdim ki, Milli Qəhrəmanlar Muzeyi yaradılsın, soyqırım tariximizlə bağlı ayrıca Soyqırımlar Muzeyi olsun. Eləcə də Cumhuriyyətlə bağlı Cumhuriyyət Muzeyi açılsın. Bunların hər birinə böyük ehtiyacımız var. Milli Qəhrəmanlar Muzeyinin yaradılmasına bu gün böyük zərirət var. Azərbaycanın 20 faizdən artıq torpağı işğal altındadır. Bu muzeyin yaradılması torpaqlarımızın işğaldan azad edilməsi istiqamətində ən böyük təbliğat vasitəsi olardı. Azərbaycan gənci, Azərbaycan əsgəri, Azərbaycan kursantı muzeylə tanış olur və Vətənin azadlığı, ərazi bütövlüyü uğrunda şücaət göstərən qəhrəmanlarımızın həyat, döyüş yolunu öyrənir və nəticədə özü də qəhrəman olmaq istəyir, Vətən torpağının azadlığı uğurunda əlindən gələni edir. Bu mənada hər hansı bir muzeyin yaradılması həmin ölkənin vətəndaşları üçün çox önəmli bir hadisədir”.
A.İsgəndərov qeyd etdi ki, bu gün Azərbaycana dünyanın müxtəlif ölkələrindən turistlər və digər qonaqlar gəlir. Professorun sözlərinə görə, həmin turistləri, qonaqları həmin muzeyə gətirmək və torpaqlarımızın ərazi bütövlüyü uğrunda canından keçən Vətən oğullarının qəhrəmanlığı ilə tanış etmək vacib olardı. “Qoy Azərbaycanda Soyqırım muzeyi yaradılsın ki, xaricdən gələn qonaqlara öz torpağımızda özümüzə qarşı soyqırım həyata keçirildiyini göstərə bilək. Bu da ermənilərin bizə qarşı apardığı uydurma soyqırım təbliğatının qarşısının alınmasında müstəsna iş olardı. Milli Qəhrəmanlar Muzeyi açılarsa, xaricdən gələn turistlər, qonaqlar açıq şəkildə görə bilərlər ki, biz heç vaxt öz torpaqlarımızı qoyub qaçmamışıq, onu qorumaq uğrunda şəhid olan oğullarımız, qızlarımız var. Bu muzeyin yaradılması həm də dünyaya bir mesaj olardı ki, biz öz torpaqlarımızı erməni işğalında qoymayacağıq, onu azad edəcəyik. Bizim vətən uğrunda qəhəmanlıq göstərib şəhid olan insanlarımız var. Muzeyin yaradılması onların təbliğ edilməsinin ən müsbət formasıdır”-deyə A.İsgəndərov bildirdi.
Şair-publisist Əli Mahmud da hesab edir ki, Milli Qəhrəmanlar Muzeyinin yaradılmasının əhəmiyyəti böyükdür. Onun sözlərinə görə, bu həm qəhrəmanlarımızın gənc nəslə tanıdılmasına, həm də ölkəmizə turist axınının güclənməsinə səbəb olar. O qeyd edir ki, ölkəmizə turistlər ancaq istirahət etmək üçün gəlmir, onların xeyli bir qismi burada olarkən keçmiş və müasir tariximizlə maraqlanır, Dağlıq Qarabağ problemi haqqında daha ətraflı məlumat almaq istəyir. “Düşünürəm ki, ayrıca Milli Qəhrəmanlar Muzeyinin yaradılması çox əhəmiyyətli olardı. Çünki buna ehtiyac var. Ən azı Milli Qəhrəmanları təbliğ etmək baxımından bu çox gərəkli işdir. Doğrudur, bu gün ayrı-ayrı muzeylərdə Milli Qəhrəmanlara aid guşələr var, bəzi Milli Qəhrəmanların doğulduqları rayonlarda muzeyləri də açılıb. Bu çox müsbət haldır. Bununla belə, paytaxtda ayrıca Milli Qəhrəmanlar Muzeyinin yaradılmasına ehtiyac var. Bilirsiz ki, Azərbaycan turistlərin maraq göstərdiyi ölkələrdən biridir. Bəlkə də Cənubi Qafqazda ən çox turist elə Azərbaycana gəlir. Bu baxımdan, Milli Qəhrəmanlarımızı turistlərə də tanıtmalıyıq. Belə bir muzey yaranarsa, ölkəyə turist gətirən şirkətlər o turistləri Milli Qəhrəmanlar Muzeyinə də cəlb edə bilərlər”-deyə Ə.Mahmud bildirdi.
İradə SARIYEVA
