Aydın Xan Əbilov: “Dövlət tərəfindən mədəniyyət ocaqlarına göstərilən diqqət və qayğı bölgə əhalisinin mədəni səviyyəsinin inkişafına səbəb olur”
Azərbaycanın bölgələrinin sosial-mədəni həyatının inkişafı üçün dövlət tərəfindən regionlara xüsusi diqqət ayrılır. Son bir neçə ildə ölkəmizin müxtəlif bölgələrində yeni mədəniyyət ocaqlarının açılması, bir çoxunun əsaslı şəkildə təmir-bərpa edilməsi, yenidən qurulması istiqamətində böyük işlər görülüb. Respublikamızda yeni regional mədəniyyət idarələrinin yaradılması bu işlərin görülməsini daha da sürətləndirir.
Onu da bildirək ki, dövlət tərəfindən bölgələrdə həyata keçirilən və mədəni inkişafa təkan verən işlər davamlı olaraq həyata keçirilir.
Mədəniyyət Nazirliyinin 6 regional idarəsinə aid obyektlərdə dövlət xəttilə təmir işləri görüləcək. Şəmkir, Sabirabad, Bərdə, Kürdəmir rayon, həmçinin, Sumqayıt və Gəncə şəhər regional mədəniyyət idarələrinə aid obyektlərdə aparılacaq təmir işləri yerlərdəki mədəniyyət ocaqlarının yenidən qurulmasına şərait yaradacaq.
Ekspertlərin bildirdiyinə görə, vaxtilə yararsız vəziyyətdə olan mədəniyyət evləri, kitabxanalar, eləcə də digər mədəniyyət obyektlərinin böyük bir hissəsi artıq təmir edilərək yerli ictimaiyyətin ixtiyarına verilib. Ekspertlərin sözlərinə görə, Azərbaycan dövlətinin həyata keçirdiyi uğurlu mədəniyyət siyasəti nəticəsində yalnız paytaxtda, iri şəhərlərdə deyil, ucqarlarda belə mədəni infrastruktur yaradılıb.
Kulturoloq Aydın Xan Əbilov bizimlə söhbətində qeyd etdi ki, Azərbaycan dövləti bölgələrə xüsusi diqqət yetirir. Onun sözlərinə görə, bölgələrdə həyata keçirilən bütün mühüm layihələr dövlət tərəfindən həyata keçirilir. “Bölgələrin regional mədəniyyət idarələrinə aid obyektlərdə aparılacaq təmir işlərinin böyük mədəni əhəmiyyəti var. Bilirsiniz ki, indiyə qədər nəinki rayon mərkəzlərində, eləcə də qəsəbə və kəndlərdəki mədəniyyət obyektlərində təmir, yenidənqurma işləri aparılıb. Kitabxanalar, klublar, mədəniyyət evləri, teatrlar təmir edilib, bir neçə mədəniyyət ocağına isə bina tikilib. Dövlət mədəniyyət obyektlərinin təmirinə və tikintisinə böyük vəsait ayırır. İndiyə kimi bu sahəyə milyonlarla vəsait qoyulub. Sözsüz ki, bu da gözəl nəticələr verib. Dövlət siyasətinin tərkib hissəsi olan mədəniyyət siyasəti bu sahənin bütün qanadlarında uğurla həyata keçirilir. Hazırda bölgələrdə mədəniyyət mərkəzləri, mədəniyyət evləri abad, gözəl binalarda fəaliyyət göstərir, kitabxanalar bütün lazımi avadanlıqlarla, nəşrlərlə təmin edilib. Bu az iş deyil. Təmir işləri nəzərdə tutulan mədəniyyət obyektlərinin də tez bir zamanda təmir ediləcəyinə və ictimaiyyətin ixtiyarına veriləcəyinə inanıram. Bildiyim qədər, Mədəniyyət Nazirliyi regional mədəniyyət idarələrinə aid obyektlərdə təmir işləri aparılması ilə bağlı şirkətlər arasında tender elan edib. Dövlət tərəfindən mədəniyyət ocaqlarına göstərilən diqqət və qayğı bölgə əhalisinin mədəni səviyyəsinin inkişafına səbəb olur” - deyə bildirən A.X.Əbilovun sözlərinə görə, Azərbaycanın bölgələri xarici turistlərin daim üz tutduğu məkanlardandır. Bu baxımdan yerlərdəki mədəniyyət ocaqlarının daha yüksək standartlara uyğun qurulmasının vacib olduğunu vurğulayan müsahibimizin bildirdiyinə görə, bölgələrdə müasir tipli kitab evlərinin açılmasının da böyük əhəmiyyəti ola bilər.
O vurğuladı ki, dövlət tərəfindən bölgələrdəki ziyarətgahlar, abidələr, məscidlər də əsaslı şəkildə bərpa edilir. O hesab edir ki, bütün bunlar ölkəmizə turist axınının artmasına müsbət təsir edən amillərdəndir.
İradə SARIYEVA
