Gülüm Qiyasova: “Üzeyir Hacıbəyov irsinin, onun banisi olduğu peşəkar Azərbaycan musiqisinin yaşamasında, təbliğ olunmasında, eləcə də musiqi mədəniyyətimizin müasir inkişafında dövlət qayğısının müstəsna rolu var” Zemfira Qafarova: “Azərbaycan dövləti milli musiqi mədəniyyətimizin inkişafına böyük töhfələr verir”
Ənənəvi olaraq 18 sentyabr Azərbaycanda Milli Musiqi Günü kimi qeyd edilir. Azərbaycan professional musiqisinin banisi dahi Üzeyir Hacıbəyovun doğum gününün respublikamızın hər yerində bayram əhvalı ilə qeyd edilməsi sözsüz ki, təqdirəlayiqdir. Onu da vurğulayaq ki, Milli Musiqi Gününün təsis edilməsi və onun bayrama çevrilməsi dövlətimizin mədəni dəyərlərimizə, eləcə də Üzeyir Hacıbəyov irsinə qayğısının nəticəsində mümkün olub.
Azərbaycan dövlətinin musiqi mədəniyyətimizin inkişafına, bu mədəniyyəti yaradanlara verdiyi dəyərin yüksək olduğunu deyən musiqişünasların sözlərinə görə, Azərbaycan azsaylı dövlətlərdəndir ki, bu sahəyə böyük əhəmiyyət verir.
Milli Musiqi Gününün 10 ildir belə yüksək səviyyədə keçirilməsini müsbət dəyərləndirən musiqiçi Gülüm Qiyasovanın sözlərinə görə, dövlət qayğısı olmasaydı, belə bir möhtəşəm tədbirin keçirilməsi mümkün olmazdı. O hesab edir ki, Azərbaycan dövləti, eləcə də Heydər Əliyev Fondu milli musiqimizin ölkədə və dünyada təbliğ olunmasına yaxından köməklik göstərir. Bu gün Azərbaycan professional musiqisinin dünyanın bir çox ölkəsində səsləndirilməsi bu dəstəyin bariz nümunəsidir: “Azərbaycanda maddi-mədəni irsin bütün sferalarına dövlət tərəfindən böyük qayğı göstərilir. Azərbaycanın zəngin musiqi irsi var və bu irsin də yaşaması, təbliğ edilməsi, gənclər arasında yayılması dövlətin qayğısı ilə həyata keçirilir. Başqa ölkələrdə dövlət musiqi mədəniyyətinə bu qədər diqqət ayırmır. Bu kimi məsələlərin inkişafına əsasən müxtəlif şirkətlər sponsorluq edirlər. Bizdə isə əksinə, dövlət musiqi mədəniyyətinin bir himayəçisi rolunu oynayır. Bu isə çox müsbət haldır. Üzeyir Hacıbəyov irsinin, onun banisi olduğu peşəkar Azərbaycan musiqisinin yaşamasında, təbliğ olunmasında, eləcə də musiqi mədəniyyətimizin müasir inkişafında dövlət qayğısının müstəsna rolu var.
Bilirsiniz, son 10-15 ildə nə qədər musiqiçi dövlət tərəfindən mənzillə, təqaüdlə təmin olunub, onlara fəxri adlar verilib, gənc musiqiçilər dövlət tərəfindən ödüllənib, onların fəaliyyəti üçün hər cür şərait yaradılıb. Bu gün xarici ölkələrdə Azərbaycanın gənc musiqiçiləri konsertlər verir, bəstəkarlarımızın əsərləri ən böyük konsert salonlarında səsləndirilir”.
Ü.Hacıbəyov adına Bakı Musiqi Akademiyasının professoru, Azərbaycan Bəstəkarlar İttifaqının katibi Zemfira Qafarova “Bakı-Xəbər”ə açıqlamasında bildirdi ki, həmişə dövlət səviyyəsində Üzeyir Hacıbəyov irsinə və bütövlükdə Azərbaycan musiqi mədəniyyətinə böyük dəyər verilib. Z.Qafarovanın sözlərinə görə, dövlət qayğısı musiqinin inkişafına və peşəkar musiqiçilərin fəaliyyətinə çox müsbət təsir göstərir: “Əvvəlcə onu deyim ki, 18 sentyabr musiqi tariximizdə çox önəmli bir hadisədir. Dahi bəstəkar Üzeyir Hacıbəyovun doğum günü böyük təntənə ilə keçirilir və bu tarix Milli Musiqi Günü kimi qeyd edilir. Bu günün tarixi əhəmiyyəti böyükdür. Əvvəllər biz yalnız Üzeyir Hacıbəyovun doğum gününü keçirirdiksə, artıq 10 ildir bu günü respublika miqyaslı bir bayram kimi qeyd edirik. Bu bayramda Üzeyir bəyin musiqiləri səsləndirilir, onun yetirmələrinin ifaları təqdim edilir. Hətta xaricdən gələn musiqiçilərin də əsərləri Milli Musiqi Günü çərçivəsində keçirilən festival zamanı ifa edilir. Azərbaycan bəstəkarlarının əsərlərinin xarici ölkələrdə səsləndirilməsi, ifaçılarımızın xaricdə konsertlər verməsi dövlət qayğısının nəticəsidir. İllər əvvəl xaricdə Azərbaycan musiqisini Müslüm Maqomayev və Rəşid Behbudova görə tanıyırdılarsa, indi digər ifaçılarımıza görə də tanıyırlar. Üzeyir Hacıbəyov çox tükənməz irs qoyub və bu irs Azərbaycan musiqi mədəniyyətinin formalaşmasına böyük təsir göstərib. Azərbaycan dövləti milli musiqi mədəniyyətimizin inkişafına böyük töhfələr verir. Dövlət qayğısı sayəsində müasir professional musiqimizdə saysız uğurlarımız var. Azərbaycanın peşəkar musiqiçiləri, bəstəkarları, sənətkarları dövlət tərəfindən mükafatlara layiq görülür, onların həyat şəraitinin yaxşılaşması üçün addımlar atılır. Dövlət Azərbaycan musiqi mədəniyyətinə böyük diqqət və qayğı göstərir. Bu sahədə görülən işlər o qədər çoxdur ki, onu bir-bir saymaq çətindir”.
İradə SARIYEVA
