Aydın Xan Əbilov: “Yayın istisində insanları Bakıya, Xəzərin sahilinə toplayan “Jara”nın musiqimizin tanıdılmasında ayrıca rolu var” Gülüm Qiyasova: “Hesab edirəm ki, “Jara” Beynəlxalq Musiqi Festivalı Azərbaycan musiqisinin, musiqi mədəniyyətinin təbliğinə xidmət edir”
Ənənəvi olaraq hər yay paytaxtımızda, Xəzər dənizinin sahilində keçirilən “Jara” Beynəlxalq Musiqi Festivalı özünəməxsus bir musiqi bayramıdır. Bildiyimiz kimi, son illər Azərbaycanın ən müxtəlif yerlərində musiqinin müxtəlif janrları ilə bağlı beynəlxalq musiqi festivalları keçirilir. Bu festivalların hər biri Azərbaycan musiqisinin beynəlxalq musiqi aləminə inteqrasiya etməsinə, təbliğinə xidmət edir.
“Jara” Beynəlxalq Musiqi Festivalına gəlincə, qeyd etmək lazımdır ki, bu festival digər festivallardan fərqli olaraq daha böyük coşqu ilə qeyd edilir. Bu baxımdan ki, burada əsas tamaşaçı kontingenti gənclər olur və onlar da bu festival çərçivəsində həm əylənirlər, həm də orada səslənən ifalardan böyük zövq alırlar.
Bu festivalın əhəmiyyətindən danışan musiqişünaslar hesab edirlər ki, gənclərə əsl yay həyəcanı və zövqü yaşadan festivalın Bakıda, Xəzərin sahilində keçirilməsi həm şəhərimizin, həm də musiqimizin tanıdılmasına, təbliğinə xidmət edir.
Kulturoloq Aydın Xan Əbilov hesab edir ki, “Jara” Beynəlxalq Musiqi Festivalı kreativ ruh aşılayan bir musiqi törənidir. Kulturoloq hesab edir ki, bu festivalda Rusiyanın və digər ölkələrin tanınmış şou-biznes ulduzlarının, sənətçilərinin qonaq və iştirakçı qismində təmsil olunması müsbət haldır. O qeyd edir ki, istənilən beynəlxalq festival ölkəmizə müsbət dividendlər gətirir. Azərbaycanın tarixən multikultural, tolerant, mədəni müxtəlifliyə dözümlü yanaşan bir dövlət olduğunu deyən kulturoloq hesab edir ki, bu festival həm də xalqları, mədəniyyətləri birləşdirir. “Jara” Beynəlxalq Musiqi Festivalında xarici musiqiçilərlə yanaşı, Azərbaycan musiqiçilərinin də iştirak etdiyini vurğulayan A.X.Əbilovun sözlərinə görə, bu da bizim musiqiçilərin xarici ölkələrdə tanınmasına şərait yaradır: “Azərbaycan müasir dünyanın əsas beyin, mədəniyyət, multikulturalizm mərkəzlərindən birinə çevrilib. Ölkəmiz mədəniyyətlərin qovuşduğu bir məkan kimi bütün dünyanın diqqətindədir. Bu gün Azərbaycanda bir sıra beynəlxalq əhəmiyyətli tədbirlər keçirilir. Özü də bu tədbirlərin hər biri uğurla başlayıb, uğurla başa çatır. Deyim ki, respublikamızın müxtəlif yerlərində keçirilən beynəlxalq əhəmiyyətli musiqi festivalları da böyük uğurlarla müşayiət edilir. “Jara” Beynəlxalq Musiqi Festivalına gəlincə, bu festivalın da Azərbaycanın musiqi mədəniyyətinin tanıdılmasında, dünyada təbliğ edilməsində rolu var. “Jara” festivalına dünyanın çox yerindən tanınmış səhnə ulduzları qatılır, onlar bizim musiqi mühiti ilə də tanış olurlar. Onlar burada qonaqpərvərlik, səmimiyyət, gözəl musiqi mühiti, sabitlik, əminamanlıq görürlər. Azərbaycan başqa xalqların mədəniyyətinə dəyər verməsəydi, burada belə möhtəşəm festivallar keçirilə bilıməzdi. “Jara” Beynəlxalq Musiqi Festivalı gənclərə, sənət adamlarına başqa bir ovqat yaşadır. Yayın istisində insanları Bakıya, Xəzərin sahilinə toplayan “Jara”nın musiqimizin tanıdılmasında ayrıca rolu var. Bu olduqca əhəmiyyətli bir tədbirdir”.
A.X.Əbilov bildirdi ki, bu festivalın hər yay keçirilməsi artıq ənənə halını alıb. O qeyd edir ki, ümumiyyətlə, Azərbaycanda keçirilən bütün beynəlxalq festivallar ənənəvi olaraq keçirilir. “Azərbaycanda bütün beynəlxalq festivallar, o cümlədən də “Jara” ənənəvi olaraq keçirilir. Bura gələn qonaqlar, iştirakçılar Azərbaycan musiqisi ilə də tanış olmaq imkanları əldə edirlər. Əlbəttə, bu festivala və digər festivallara dövlətin böyük dəstək verməsi də müsbət haldır” - deyə A.X.Əbilov bildirdi.
Musiqiçi Gülüm Qiyasova da bizimlə söhbətində “Jara” Beynəlxalq Musiqi Festivalının Azərbaycanın musiqi mədəniyyətinin, çağdaş estrada sənətinin təbliğində rol oynadığını qeyd etdi: “Artıq neçə ildir Azərbaycanın Xalq artisti Emin Ağalarovun təşəbbüsü ilə Bakıda belə bir festivalın keçirilməsinə münasibətim müsbətdir. Çünki ”Jara” beynəlxalq musiqi festivalıdır və mühüm incəsənət hadisəsidir. Musiqi və incəsənət insanları birləşdirir, mədəniyyətləri dostlaşdırır. Hesab edirəm ki, “Jara” Beynəlxalq Musiqi Festivalı Azərbaycan musiqisinin, musiqi mədəniyyətinin təbliğinə xidmət edir. Bildiyiniz kimi, “Jara” Beynəlxalq Musiqi Festivalının təntənəli açılış mərasimi baş tutdu və artıq festival başlayıb. Festivala paytaxt sakinləri ilə yanaşı, şəhərimizə gələn turistlər, xarici qonaqlar da qatılıb. Böyük coşqu ilə davam edən festival Azərbaycan musiqisinin hazırkı mənzərəsində çox parlaq nümunələrdən biri kimi görsənir” - deyə G.Qiyasova bildirdi.
İradə SARIYEVA
