Aydın Xan Əbilov: “Düşünürəm ki, Vergilər Nazirliyi müğənnilərin vergiyə cəlb edilməsi üçün bütün lazımi tədbirləri həyata keçirməlidir” “Müğənnilərin vergi ödəməkdən yayınması, yaxud gəlirlərinin əsas hissəsini gizlətməsi adi hala çevrilib”
Gizlin deyil ki, son dövrlər müğənnilərin vergidən yayınma halları aktual problemə çevrilib. Hər gün toylarda, şou proqramlarda, xınayaxdı və nişan məclislərində olan və bu mərasimlərdə iştirak etmək üçün konkret qiymət qoyan müğənnilər əldə etdikləri gəlirdən vergi vermək istəmirlər. Dəfələrlə müğənnilərin kütləvi olaraq vergiyə cəlb edilməsi məsələsi gündəmə gətirilsə də, müğənnilərin böyük bir qismi vergi ödəməkdən boyun qaçırıblar. Məlum olduğu kimi, onların bir çoxu iddia edir ki, guya toylarda dost-tanışın xatirinə pulsuz oxuyurlar və bunun da nəticəsində heç bir gəlir əldə etmirlər.
Qeyd edək ki, müğənnilərin hamısı ərazi vergi idarələrində qeydiyyata alınıb və onların hər birinin adına VÖEN açılıb. Buna baxmayaraq, onların xeyli qismi hər 3 aydan bir əlaqədar qurumun ünvanına boş bəyannamə göndərir, bununla da kvartalda heç bir maddi gəlir əldə etmədiklərini göstərmək istəyirlər. Müğənnilər məşhurluqlarından, onlara olan ictimai münasibətdən sui-sitifadə edərək vergidən yayınırlar.
Ancaq deyəsən müğənnilər artıq vergidən yayına bilməyəcəklər. Belə ki, vergidən yayındıqları üçün onlara qarşı sərt tədbirlərin həyata keçirilməsi gözlənir.
Vergilər nazirinin müavini Sahib Ələkbərov “Trend”ə açıqlamasında bildirib ki, Azərbaycanda müğənnilər vergilərini kifayət dərəcədə ödəmirlər. S.Ələkbərovun sözlərinə görə, müğənnilərin vergi ödəməsi məsələsi həmişə gündəmdədir: “Onlar da digər vergi ödəyiciləri kimi vergilərini hesablayıb dövlət büdcəsinə ödəməlidirlər. Müğənnilər vergi ödəyirlər, amma kifayət dərəcədə yox. Bu sahədə həmişə narazılıqlar olur”.
Bununla bağlı hər hansı tədbirin görülməsinə gəlincə, nazir müavini bildirib ki, ümumiyyətlə, bu yaxınlarda uçot məsələsi ilə bağlı ciddi tədbirlərin aparılması nəzərdə tutulur: “Təbii ki, bu tədbirlər digər ödəyicilər kimi, müğənnilərə də şamil olunacaq, onlar da vergi ödəyicisidirlər”.
Müğənnilərin kütləvi olaraq vergidən yayınmasına münasibət bildirən kulturoloq Aydın Xan Əbilov bizimlə söhbətində vurğuladı ki, nazirlik belə müğənnilərə qarşı qanunvericilik çərçivəsində sərt davranmalıdır. Müğənnilərin kifayət qədər gəlir əldə etdiyini və əldə etdikləri qazancdan dövlət büdcəsinə vergi ödəmədiklərini deyən A.X.Əbilovun sözlərinə görə, hər bir müğənni qazancının təyin olunan məbləğini vergiyə ödəyərsə, sözügedən problem də öz həllini tapar. “Bildiyimiz kimi, müğənnilərin vergi ödəməkdən yayınması, yaxud gəlirlərinin əsas hissəni gizlətməsi adi hala çevrilib. Bu gün müğənnilərin əksəriyyəti az qala hər gün toya gedir, məclislərdə iştirak edirlər. Özü də hər bir müğənninin özünün toy qiymətləri var. Toya 5-10 min manat müqabilində gedən müğənnilər qazanclarının 80-90 faizini gizlədirlər. Halbuki, bu sahədə şəffaflıq olmalıdır. Vergidən yayınma bilirsiniz ki, cinayətdir. Bu iş cinayət xarakterli olduğundan, gərək müğənnilər bu yolu tutmasınlar. Əgər əlaqədar qurumlar tərəfindən araşdırmalar aparılarsa, müğənnilərin aylıq gəlirlərini tam olaraq hesablayıb üzə çıxara bilərlər. Yadınıza gəlirsə, əvvəllər müğənnilər, xüsusən də şou-biznesçilər birbaşa efirdən öz toy qiymətlərini elan edirdilər, ancaq bu gün, demək olar ki, heç bir müğənni toy qiymətlərini açıqlamır. Onlar bunu vergidən yayınmaq üçün edirlər. Ancaq sıravi bir vətəndaş kimi zəng vurub onları toyumuza dəvət etsək, məclisimizdə yarımsaatlıq, 1 saatlıq iştirak etmək üçün onlar qiymət deyəcəklər. Düşünürəm ki, Vergilər Nazirliyi müğənnilərin vergiyə cəlb edilməsi üçün bütün lazımi tədbirləri həyata keçirməlidir” - deyə bildirən A.X.Əbilov hesab edir ki, onlara qarşı hər hansı formada cərimə tətbiq edilərsə, onlar vaxtlı-vaxtında vergi ödəyərlər.
Türkiyə, Rusiya və digər ölkələrdə müğənnilərin dövlət büdcəsinə kifayət qədər vergi ödədiklərini qeyd edən müsahibimizin bildirdiyinə görə, hətta qardaş Türkiyədə müğənnilər dövlət büdcəsinə ödədikləri vergi ilə fəxr edirlər: “Türkiyənin adlı-sanlı müğənnilərinin, demək olar ki, hamısı öz gəlirlərindən kifayət qədər vergi ödəyir. Onlar disk satışından, konsertlərdən, proqramlardan, tədbirlərdən əldə etdikləri maddi gəlir müqabilində külli məbləğdə vergi ödəyir və bununla da fəxr edirlər. Bizdə isə əksinədir, çalışırlar ki, vergidən yayınalar. Başqa ölkələrdə müğənnilərin vergidən yayınması halına elə onların öz həmkarları mənfi yanaşırlar. Azərbaycanda isə hamısı çalışır ki, vergi ödəməsin, yaxud az məbləğdə ödəsinlər. Bu gün müğənnilər konsert də verir, diskləri də satılır, filmlərə də çəkilirlər, şou proqramlar da aparırlar, toy məclislərində də iştirak edirlər. Hətta onlar bölgələrdə, eləcə də xarici ölkələrdə keçirilən toy məclislərində iştirak edirlər. Bununla da “dost toyu idi pulsuz oxudum”, yaxud “toya çox aşağı qiymətə gedirəm və nə qazanıramsa, ondan da vergi ödəyirəm” bəhanəsini irəli sürürlər. Sirr deyil ki, hazırda müğənnilərin çoxu dəbdəbəli həyat tərzi yaşayır, evləri, villaları, maşınları, bağları var. Bunların çoxunu, təbii ki, toylara getməklə, el şənliklərində iştirak etməklə qazanırlar”. İradə SARIYEVA
