Azərbaycan Rəssamlar İttifaqının Vəcihə Səmədova adına sərgi salonu qarşısında yenə də bir canlanma, bir qələbəlik var idi. Azərbaycanın görkəmli sənətkarları, o cümlədən də ölkənin digər zümrələrindən olan sənətsevərlər, dostlar-tanışlar bu gün buraya tanınmış gənc rəssam, eyni zamanda da istedadlı teatr rəssamı Elşən Sərxanoğlunun yaradıcılığı ilə tanış olmağa toplaşmışdılar…
Qonaqları salamlayan Azərbaycan Rəssamlar İttifaqının sədri, Xalq rəssamı Fərhad Xəlilov gənc rəssamın həyat və yaradıcılığı barədə ətraflı məlumat verdi. O, Rəssamlar İttifaqının fəaliyyətində görkəmli sənətkarlarla yanaşı, gənclərin də öz bacarıqlarını göstərmək üçün ittifaq tərəfindən xüsusi şərait yaradıldığından, onların sənətdə püxtələşməsi üçün təcrübəli sənətkarlar tərəfindən hər cür köməklik göstərilməsindən, o cümlədən də Elşən kimi gənclərin mümkün qədər tez-tez fərdi və yaxud kollektiv sərgilərinin təşkil edilməsinə yardımçı olmalarından xoş duyğularla bəhs edərək sözü görkəmli rəssam Tofiq Ağabəyova verdi. Qocaman sənətkar rəssamlığın çətin, lakin şərəfli bir peşə olduğunu xatırladaraq, Elşən Sərxanoğlunun bu çətinlikləri bacarıqla dəf edərək, özünə layiqli bir yol açdığını, eyni zamanda da məxsusi yeniliklərə imza atdığını fərəhlə Ardınca kürsüyə dəvət olunan sənətşünas-alim, Əməkdar incəsənət xadimi Ziyadxan Əliyev Elşən Sərxanoğlunun yaradıcılığını, demək olar ki, zərgər dəqiqliyi ilə incələdi… Onu da qeyd etdi ki, bu sərgi müəllifin sayca altıncı sərgisidir. Buna baxmayaraq, E.Sərxanoğlu öz pərəstişkarlarını hər dəfə yaxşı mənada təəccübləndirməyi bacarmışdır. Bugünkü sərgidə isə bu daha qabarıq şəkildə özünü büruzə verir. Sərgini maraqlı edən başlıca cəhətlərdən biri isə onun çoxsahəli yaradıcılığının, ümumən sənətin bir neçə janrı üzrə ərsəyə gətirdiyi əsərlərin bir araya gətirilib tamaşaçılara təqdim edilməsidir. Belə məzmunlu sərgiləri sovetlər dövründə ərsəyə gətirmək müşkül məsələ idi. O dövrdə bu cür kompozisiyalı sərginin təşkili Azərbaycanda yalnız görkəmli sənətkarımız - Xalq
rəssamı Mikayıl Abdullayevə nəsib olmuşdur… Şükürlər olsun ki, müstəqilliyimizin bu günündə belə məhdudiyyətlər artıq arxada qalmışdır. İndi hər kəs bacarığını istədiyi şəkildə təqdim etməkdə heç bir çətinlik yaşamır. Əlbəttə, yaradılan bu imkanlar Azərbaycanımızın bu günü və gələcəyi naminə çalışan gənclərimizin üzərinə böyük məsuliyyətlər də qoyur. Əminəm ki, onlar bu məsuliyyəti çox yaxşı dərk edirlər. Belə olmasaydı, təbii ki, indi burada Elşən Sərxanoğlunun bügünkü fərdi sərgisində təqdim etdiyi əsərlər - istər rəngkarlıq, istər qrafik, istər teatr tərtibatı, istər heykəltəraşlıq janrlarında və istərsə də mistik-psixoloji mövzularda işlədiyi işlər olsun, öz məzmunu, mahiyyəti, orijinallığı və özünəməxsusluğu ilə diqqəti cəlb edir. Bu da öz növbəsində sərginin rəngarəngliyinə yeni bir çalar qatır, onu daha da maraqlı edir. Mən də öz növbəmdə ona uğurlar diləyirəm…
Müəllimi xanım Tamella Məmmədova çıxış edərək, Elşən Sərxanoğlunun tələbəlik dövrünə diqqəti çəkdi. Onun yorulmaz çalışqanlığından, nizam-intizamından, ədəb-ərkanından ətraflı söz açdı və xüsusi olaraq vurğuladı ki, heç çəkinmədən deyərdim ki, onun bu ədəb-ərkanı bütün yaradıcılığına hopmuşdur.
Mən onunla qürur duyuram…
Əməkdar rəssam Hüseyn Haqverdiyev də çıxışında Elşənin hədsiz çalışqanlığından, zəhmətsevərliyindən söz açdı. Bildirdi ki, biz onunla qonşuyuq. Günün istənilən vaxtında bu insanı əlində fırça çalışan görmək mümkündür. Sanki, heç istirahət etmir. Ardınca da diqqəti onun sənətinə bərabər olan insanlığına, səmimiyyətinə diqqəti çəkdi…
Azərbaycan Teatr Xadimləri İttifaqı və Gənc Tamaşaçılar Teatrı kollektivi adından çıxış edən rejissor Bəhram Osmanov rəssamın teatrdakı fəaliyyətindən ətraflı söz açaraq Gənc Tamaşaçılar Teatrında çalışdığı beş il ərzində onlarla müxtəlif janrlı, müxtəlif məzmun və mahiyyətli tamaşalara yüksək səviyyəli tərtibatlar verməsindən, tamaşaların müvəffəqiyyət qazanmasında onun xüsusi istedad və əməyinin rolundan səmimiyyətlə bəhs etdi. Teatr rəssamlarının beynəlxalq sərgisində Elşən Sərxanoğlunun Azərbaycanımızı layiqincə təmsil etməsindən qürurla danışdı və ona daha böyük uğurlar arzuladı.
Sonda gənc rəssam Elşən Sərxanoğlu çıxış edərək, Azərbaycan Rəssamlar və Teatr Xadimləri İttifaqına, Gənc Tamaşaçılar Teatrının kollektivinə onu dəstəklədiklərinə və sərgiyə təşrif gətirən bütün iştirakçılara öz dərin ehtiram və təşəkkürünü bildirdi.
Yekunda Xalq rəssamı Fərhad Xəlilov sərgiyə gələnlərə ittifaq və bütün rəssamlar adından yayın bu ilk - isti günündə zəhmət çəkib tədbirə qoşulduqlarına görə xüsusi təşəkkürünü bildirib, onları salona - ekspozisiyanın seyrinə dəvət etdi.
***
Düşünürəm ki, yazının sonunda gənc rəssam Elşən Sərxanoğlunun yaradıcılıq fəaliyyətində əldə etdiyi nailiyyətlərə bir daha nəzər yetirmək, onun sənətinin obyektiv qiymətləndirilməsində daha ədalətli bir nəticə olardı…
Onun 2005-ci ildə Rusiyada, 2014-cü ildə Azərbaycan Rəssamlar İttifaqında, 2015-ci ildə Kalmıkiya Palmov adına İncəsənət Muzeyində, 2017-ci ildə teatr yaradıcılığına həsr olunmuş sərgi - Azərbaycanda, 2017-ci ildə Xocalı soyqırımına həsr olunmuş teatrlaşdırılmış “Bir əsərin təqdimatı” layihəsi - Azərbaycanda, 2018-ci ildə Azərbaycan Rəssamlar İttifaqında müvəffəqiyyətlə həyata keçirilən fərdi sərgiləri böyük uğurlar qazanmışdır.
2015-ci ildə “İlin ən yaxşı rəssam işi” layihəsində “Sima” mükafatına, 2017-ci ildə Azərbaycanda keçirilən “IV İslam Həmrəyliyi oyunları” çərçivəsində keçirilən müsabiqədə “Ən yaxşı rəngkarlıq əsərinə görə” mükafata (I yer), “Art-enerji-20” Azərbaycan Dövlət Neft Şirkətinin keçirdiyi rəsm müsabiqəsində “Ən yaxşı rəngkarlıq əsərinə görə” mükafata (II yer), Azərbaycan Mədəniyyət və Turizm Nazirliyi və Rəssamlar İttifaqının keçirdiyi Dövlət Müstəqilliyinə həsr olunmuş “Dirçəliş” rəsm müsabiqəsində “Ən yaxşı rəsm əsərinə görə” mükafata (II yer), həmçinin qeyd olunan Dövlət təşkilatlarının təkrarən keçirdikləri eyni və müxtəlifadlı müsabiqələrdə dəfələrlə iştirak etmiş və yüksək mükafatlara layiq görülmüşdür…
Əsərləri Azərbaycanın və dünyanın tanınmış muzeylərində, diplomatic nümayəndəliklərində, rəsmi idarə və müəssisələrdə, həmçinin sənətsevərlərin şəxsi kolleksiyalarında özlərinə əbədi məskən salmışdır.
Elşən Sərxanoğlu Bakı rəssamlıq məktəbini və Azərbaycan Dövlət Mədəniyyət və İncəsənət Universitetini bitirmiş, Azərbaycan Rəssamlar və Teatr Xadimləri İttifaqının üzvüdür…
Mən də öz növbəmdə rəssam Elşən Sərxanoğlunun bu nailiyyətlərini ürəkdən təbrik edir, ona yeni-yeni uğurlar arzulayıram…
Binnət Hümbətoğlu sənətşünas
