Dünyada baş verən hərbi münaqişələrdə həlak olanların xatirəsinə Azərbaycan Dövlət Akademik Filarmoniyasında xalq artisti Yalçın Adıgözəlovun rəhbərliyi altında Üzeyir Hacıbəyli adına Azərbaycan Dövlət Simfonik Orkestrinin konserti keşirilib.
Konsertdə 2004-cü ildə BBC-nin keçirdiyi sorğuya əsəsən dünya klassik repertuarının ən kədərli əsərlərindən biri kimi qübul edilmiş, Amerikanın 32-ci prezidenti Franklin Ruzveltin, 2001-ci il ABŞ-da 11 Sentyabr facəsi qurbanlarının, Şahzadə Diananın və s. dəfn mərasimlərində səsləndirilmiş amerikalı bəstəkar və musiqişünası Samuel Barberin "Simli alətlər üçün Adagio"su və XIX əsrin Alman bəstəkarı Rixard Strausun "Tod und verklarung" əsərləri ifa olundu.
Konsertin solisti Britaniya Krallığının Musiqi Kollecinin "Klassik vokal" üzrə bakalavr və magistr proqramlarını bitirmiş soprano səsinə malik Selcan Nəsibli idi. Azərbaycan səhnəsində ilk dəfə çıxış edən Selcan Nəsiblinin səhnə mədəniyyəti, mükəmməl ifası, ciddi performansı tamaşaçılarda xoş təəssüratlar yaratdı. Konsert sürəkli alqışlarla yekunlaşdı.
Gənc olmasına baxmayaraq səsi artıq Almaniyanın, İngiltərənin, Fransanın mötəbər səhnələrindən eşidilən Selcan Nəsibli bir çox Avropa ölkələrinin opkestrləri ilə çalışır. Londondakı “Guildhall” zalında Azərbaycanın xalq artisti, professor Yalçın Adıgözəlovun rəhbərliyi ilə London Kral Simfonik Orkestrinin ifasında “Xəzərin işıqları” (Caspian Lights) adlı Azərbaycan musiqisi konsertində, Londonun Kovent Qarden rayonundakı “St.Paul`s Church” kilsəsində müxtəlif illərdə keçirilmiş Xocalı soyqırımının ildönümünə həsr olunmuş xatirə konsertlərində, Azərbaycan Xalq Cümhuriyyətinin və Azərbaycan bəstəkarı Qara Qarayevin 100 illik yubileyi ilə bağlı klassik konsert proqramlarında, Azərbaycan Silahlı Qüvvələrinin yaradılmasının ildönümünə həsr olunmuş rəsmi qəbulda və xaricə ölkələrdə keçirilmiş digər tədbirlərdə Selcan Nəsiblinin səsi Avropa tamaşaçılarını, peşəkar musiqiçiləri riqqətə gətirmişdir.
Qürurverici haldır ki, Azərbaycanla bağlı xarici ölkələrdə keçirilən tədbirlərdə bu gənc xanım ölkəmizi ləyaqətlə təmsil edir. Onun Azərbaycan Dövlət Akademik Filarmoniyasında Üzeyir Hacıbəyli adına Azərbaycan Dövlət Simfonik Orkestrinin müşaiyyəti ilə konsertdə sosilst kimi çıxışı da bir daha deməyə əsas verir ki, Selcan Nəsibli gələcəkdə daha böyük uğurlara imza atacaq.
Selcan Nəsibli bu konsertə məsuliyyət hissi ilə hazırlaşdığını qeyd edərək bildirdi ki, "tam ali təhsil aldıqdan sonra bir çox ölkələrdə konsertlərdə çıxış etmişəm. Buna baxmayaraq Azərbaycan tamaşaçısının qarşısına çıxmaq üçün yetərincə təcrübəsinin olmayıb. Adətən həmişə konsertdən əvvəl özümdə adrenalin axını hiss etmişəm və həyəcanı özümdən uzaqlaşdırmışam. Xoşbəxtlikdən Bakıdakı ilk konsertimdə də bu hissləri yaşadım və ümid edirəm ki, tamaşaçı mənim necə narahat olduğumu hiss etmədi. Mən bir çox Avropa ölkələrinin opkestrləri ilə çalışdım. Amma vurğulamaq istəyirəm ki, Azərbaycan Dövlət Simfonik Orkestrindən xüsusi zövq aldım. Onlar əsl peşəkardırlar və onlarla eyni səhnəni bölüşdürmək mənim üçün böyük xoşbəxtlikdir".
Selcan Nəsibliyə - sabahımızın parlaq sənət ulduzuna uğurlar diləyirik.
Hikmət Xudiyev, əməkdar jurnalist
