Asif Rüstəmli: “Zülfiyyə xanım bu gün sənətin elə bir zirvəsindədir ki...” Teymur Kərimli: “Zülfiyyə xanım elə bir zəngin “baqaj”la Anar yaradıcılığında bizim görmədiyimiz detalları, məqamları üzə çıxarıb ki, bu tapıntılar ona da, bizə də zövq verir” Qulu Məhərrəmli: “O, çoxşaxəli yaradıcılığa malikdir”
Kitab sözün gerçək mənasında tarixdən-tarixə yadigar qalan bir məfhumdur. O kitab bu gündən sabaha maneəsiz adlayıb gedə bilir ki, onun bitkin ideyası, ədəbi-bədii siqləti olsun.
Alimdən, elm adamından kitab qalar. Sənətşünaslıq üzrə fəlsəfə doktoru, tanınmış bədii qiraətçi, sənətşünas Zülfiyyə Eldarqızı bir alim kimi uzun illərdir elmin çətin yollarında yorulmadan irəliləyib. O, bir sənətkar kimi səhnə fəaliyyətini də yaddan çıxarmayıb. O, həm bir aktrisa, səhnə adamı, bədii qiraətçi, həm də bir alim ömrü yaşayıb.
İyunun 20-də sənətşünaslıq üzrə fəlsəfə doktoru, tanınmış bədii qiraətçi, aktrisa Zülfiyyə Eldarqızının Xalq yazıçısı Anarın kino yaradıcılığına, kinodramaturgiyasına həsr etdiyi “Qəm pəncərəsinin o üzündə” (monoqrafiya) və əməkdar jurnalist Hikmət Xudiyevin (Cəmilzadənin) Z.Eldarqızının səhnə fəaliyyətindən, ömür yolundan bəhs edən “Bütün gözəlliyi Tanrım o sərvinaza verib” kitablarının təqdimat mərasimi keçirildi.
Beynəlxalq Mətbuat Mərkəzində (BMM) düzənlənən təqdimat mərasimi ömrünün 20 ilini səhnəyə, sənətə və pedaqoji fəaliyyətə bəxş edən Z.Eldarqızının yaradıcılığına verilən böyük bir töhfə sayıla bilər. “Qəm pəncərəsinin o üzündə” və “Bütün gözəlliyi Tanrım o sərvinaza verib” kitablarının təqdimat mərasimində respublikanın tanınmış elm, mədəniyyət xadimləri, ictimai-siyasi sferada tanınan şəxsiyyətlər, qələm adamları iştirak edirdi.
Filologiya elmləri doktoru, professor, tanınmış ədəbiyyatşünas Asif Rüstəmli tədbiri açaraq bildirdi ki, Z.Eldarqızını uzun illərdir tanıyır. 20 il eyni ali məktəbdə çalışdıqlarını deyən A.Rüstəmli qeyd etdi ki, Z.Eldarqızı Azərbaycan Dövlət Mədəniyyət və İncəsənət Universitetinin səviyyəli, savadlı, tələbkar müəllimlərindən biri olub. A.Rüstəmli vurğuladı ki, hazırda Z.Eldarqızı pedaqoji fəaliyyətini davam etdirmir, o özünü çox yüksək səviyyədə səhnədə və bədii qiraət sənətində ifadə edir. “İyunun 20-si gözəl pedaqoq, səhnə danışığının mahir bilicisi, ustadı Z.Eldarqızının doğum günüdür. Mən onun neçə yaşının olduğunu deməyəcəyəm, əsas odur ki, bu gözəl gündə Zülfiyyə xanım dünyaya gəlib. O, öz sənəti, öz istedadı, öz təfəkkürü və öz sənəti ilə bu dünyanı gözəlləşdirib. Bu gün (dünən) Zülfiyyə xanımın Xalq yazıçısı Anarın kinodramaturgiyasına həsr etdiyi “Qəm pəncərəsinin o üzündə” kitabının və əməkdar jurnalist Hikmət Cəmilzadənin Z.Eldarqızının səhnə fəaliyyətinə həsr etdiyi “Bütün gözəlliyi Tanrım o sərvinaza verib” kitablarının təqdimat mərasiminə yığışmışıq. Hikmət müəllimin Zülfiyyə xanıma həsr etdiyi kitabı kitab-albom da adlandırmaq olar. Bu kitabda Z.Eldarqızının səhnə fəaliyyətinin müxtəlif məqamları gözəl şəkildə öz əksini tapıb. Nəşrdə zəmanəmizin çox adlı-sanlı ziyalılarının, fikir adamlarının ürək sözləri də yer alıb.
Zülfiyyə xanım bu gün sənətin elə bir zirvəsindədir ki, biz onu ustad bədii qiraətçi kimi, gözəl sənətkar olaraq tanıyırıq. Uzun illər onunla Azərbaycan Dövlət Mədəniyyət və İncəsənət Universitetində eyni kafedrada çiyin-çiyinə işləmişik. Mən bu illər ərzində onu həm bir alim, həm müəllim, həm də bir səhnə adamı kimi yaxından müşahidə edə bilmişəm. Zülfiyyə xanım çox gözəl müəllim idi. O öz tələbələrini çox sevir, onlarla nəfəs alırdı. Zülfiyyə xanımın dərsinə hazırlıqlı gəlməyən tələbə özü utanırdı ki, niyə dərsə hazırlıqsız gəlib”.
Z.Eldarqızının gözəl alim, təfəkkür sahibi olduğunu vurğulayan A.Rüstəmli qeyd etdi ki, bu özünü Anarın kino yaradıcılığına həsr etdiyi monoqrafiyada da göstərir. Z.Eldarqızının Anarın yaradıcılığına təsadüfən müraciət etmədiyini qeyd edən A.Rüstəmlinin sözlərinə görə, monoqrafiyada yazıçının kino yaradıcılığının əsas məqamlarının, “qəm pəncərə”sinin o üzündə, pərdə arxasında qalan məqamların araşdırlması, incələnməsi baxımından çox əhəmiyyətlidir.
Allahın Z.Eldarqızına bənzərsiz səs verdiyini və onun bu səsin gözəlliyi ilə ölməz bədii qiraət nümunələri təqdim etdiyini qeyd edən A.Rüstəmli bildirdi ki, aktrisa yazıları yüksək istedadla, özünəməxsus ustalıqla təqdim edir.
Sonra A.Rüstəmli sözü “Qəm pəncərəsinin o üzündə” monoqrafiyasının elmi redaktoru, AMEA-nın akademik katibi, akademik Teymur Kərimliyə verdi. Çıxışına Z.Eldarqızının doğum gününü təbrik etməklə başlayan T.Kərimli Z.Eldarqızı ilə yaradıcılıq əlaqələrindən məmnun olduğunu dedi: “Düz 18 il bundan öncə gənclik şəhəri Sumqayıtın 1 nömrəli doğum evində bir körpə öz iri ala gözlərini dünyaya heyrətlə açdı və bu heyrət indiyə qədər də davam edir, bizi heyrətləndirir, sevindirir. O, bu heyrəti səhnədə yaradır, qələmlə yaradır, bədii qiraətlə yaradır və bu gün o zirvədədir. Bu münasibətlə onu təbrik edirəm”.
T.Kərimli vurğuladı ki, Z.Eldarqızı bir kinoşünas, aktrisa, bədii qiraətçi kimi öz fəaliyyətini davam etdirir və gördüyü işlərlə insanlara zövq verir. “Zülfiyyə xanım elə bir zəngin “baqaj”la Anar yaradıcılığında bizim görmədiyimiz detalları, məqamları üzə çıxarıb ki, bu tapıntılar ona da, bizə də zövq verir. Bizim görmədiyimiz detalları o bizə göstərir” - deyə T.Kərimli arzuladı ki, bundan sonra da Z.Eldarqızı öz elmi və səhnə fəaliyyəti ilə onu izləyənləri sevindirsin.
T.Kərimlinin çıxışından sonra tədbirin rejissoru Kənan Musayevin Zülfiyyə Eldarqızının ifasında lentə aldığı klip təqdim edildi.
“Qəm pəncərəsinin o üzündə” kitabının rəyçilərindən biri olan professor Qulu Məhərrəmli də çıxışında Z.Eldarqızının yaradıcılığından ürəkdolusu danışdı. “Bir yox, iki kitabın təqdimatı əslində fövqəladə bir hadisədir. Bir kitabı sən yazmısan, o birini isə sənin haqqında yazırlar. Amma bu kitabları birləşdirən bir cəhət var ki, onların hər ikisi eyni adamla bağlıdır. Zülfiyyə xanım illərdir obyektivdədir, göz önündədir. Sən bu dünyaya göz açandan dərk edirsən, tədricən bu intellekti formalaşdırırsan, bir gün zaman gəlir həm də bildiklərini çatdırırsan. O, çoxşaxəli yaradıcılığa malikdir. Anar müəllim haqqında kitab yazmaq, onun kino yaradıcılığını tədqiq etmək elə də asan məsələ deyil, ancaq bunu müəllif bacarıb” - deyə Q.Məhərrəmli bildirdi.
Azərbaycan Yazıçılar Birliyinin (AYB) katibi, “525-ci qəzet”in baş redaktoru Rəşad Məcid çıxışında bildirdi ki, Z.Eldarqızının müəllifi olduğu kitab AYB sədri və AYB aparatı tərəfindən yüksək qarşılanıb. R.Məcid vurğuladı ki, Z.Eldarqızı bu monoqrafiyanı 2008-ci ildə elmi iş kimi müdafiə edib. Onun Anarın kino yaradıcılığına özünəməxsus şəkildə yanaşdığını deyən R.Məcidin sözlərinə görə, Z.Eldarqızı səhnə fəaliyyəti ilə yanaşı, elmi və pedaqoji fəaliyyətini davam etdirməlidir. Z.Eldarqızının Azərbaycanı dəfələrlə xarici ölkələrdə, xüsusən də Türkiyədə təmsil etdiyini deyən R.Məcidin bildirdiyinə görə, aktrisa fəaliyyətinə görə TÜRKSOY-un da mükafatlarına layiq görülüb.
Tədbirdə çıxış edən tanınmış kinoşünas, Əməkdar incəsənət xadimi Aydın Kazımzadə də Z.Eldarqızını çoxdan tanıdığını və elmi fəaliyyətinin şahidi olduğunu dedi. O, qeyd etdi ki, Z.Eldarqızı Azərbaycan Dövlət Mədəniyyət və İncəsənət Universitetində laborant kimi fəaliyyətə başlasa da, öz zəhmətkeşliyi sayəsində elmi və pedaqoji fəaliyyətlə də məşğul olub. “Zülfiyyə xanım elmi-pedaqoji fəaliyyətə mənim gözlərim qarşısında başlayıb. O, çox qoçaq, çalışqan, istedadlı bir insan kimi özünü göstərib. Məsuliyyəti, savadı ilə özünü kafedrada yüksək şəkildə təqdim edə bilib. Bir gün o mənə dedi ki, Anar müəllimin kino yaradıcılığı haqqında elmi iş götürmək istəyir. Mən də ona dedim ki, Anar müəllimin yaradıcılığı çox ağır və sanballıdır, sən ondan yazmağı bacaracaqsanmı, hazırsanmı bu işə? O mənə dedi ki, bu işin öhdəsindən layiqincə gələcək. Həqiqətən də söz verdiyi kimi də etdi. O, ortaya çox dəyərli bir əsər çıxardı. Çox təəssüf edirəm ki, Zülfiyyə xanım pedaqoji fəaliyyətdən tez ayrıldı, ancaq bu gün onun pedaqoq kimi işləməsinə böyük ehtiyac var” - deyə bildirən A.Kazımzadə vurğuladı ki, Z.Eldarqızı incəsənət sahəsində uğurlar qazanıb və bundan sonra da qazanacaq.
Tədbirdə çıxış edən Azərbaycan Mətbuat Şurasının İdarə Heyətinin üzvü, “Bakı-Xəbər” qəzetinin baş redaktoru Aydın Quliyev də Z.Eldarqızını illər boyu tanıdığını və onun bir ziyalı, şəxsiyyət, alim, sənətkar kimi yüksək keyfiyyətlərə malik olduğunu vurğuladı.
Təqdimat mərasimində, həmçinin, şair Vahid Əziz, Əməkdar incəsənət xadimi Baba Vəziroğlu, Z.Eldarqızının səhnə və sənət dostları çıxış edərək onu həm ad günü, həm də müəllifi olduğu və barəsində yazılan kitabların təqdim edilməsi münasibətilə təbrik etdilər.
“Bakı-Xəbər” qəzetinin kollektivi adından biz də ekspertimiz, dostumuz Zülfiyyə Eldarqızını təbrik edir, ona yeni-yeni yaradıcılıq uğurları arzu edirik.
İradə SARIYEVA
