Fuad İbrahimli: “Ticarət evlərinin yaradılması imkan verəcək ki, qeyri-neft sektorunda fəaliyyət göstərən sahibkarlar xarici ölkələrin bazarlarına çıxış imkanlarını artırsınlar”
Azərbaycan Respublikası Prezidentinin müvafiq tapşırığına əsasən, Azərbaycanda istehsal edilən məhsulların ixracının təşviqi və genişləndirilməsi, “Made in Azerbaijan” brendinin xarici ölkələrdə tanıdılması, satışının təşkili və əlaqələndirilməsi məqsədilə xarici ölkələrdə ticarət evlərinin açılması prosesi davam etdirilir.
Ticarət evlərinin yaradılması həm təbliğat üçün, həm də ixrac imkanlarımızın genişləndirilməsi baxımından önəmlidir. Artıq bir sıra ölkələrdə “Azərbaycan Ticarət evi” yaradılıb. Məlumat üçün bildirək ki, ilk olaraq bu, Rusiyada yaradılıb. Daha sonra bir sıra ölkələrdə yaradıldı. Növbəti Ticarət evi isə bu günlərdə Çinin Lucou şəhərində açılıb.
Çində yeni açılan “Azərbaycan Ticarət evi” də iqtisadi-ticari əməkdaşlığımızda yeni mərhələ olmaqla yanaşı, Azərbaycan məhsullarının Çin alıcılarına tanıdılması baxımından əhəmiyyətli rol oynayacaq.
Qeyd edək ki, əhali sayına görə Çin ilk sıradadır. Məlumatlara əsasən, 5,5 milyon əhalisi olan Lucou şəhəri aid olduğu Siçuan, habelə Yunnan və Quycou vilayətlərinin, Çinin ən böyük bələdiyyəsi olan Çunçin şəhərinin arasında yerləşməklə, əhəmiyyətli nəqliyyat-ticarət qovşağı hesab olunur. Belə bir ərazidə “Azərbaycan Ticarət evi”nin açılması ekspertlər tərəfindən müsbət dəyərləndirilir.
İqtisadçı-ekspert Fuad İbrahimli “Bakı-Xəbər”ə açıqlamasında qeyd etdi ki, ticarət evləri ölkəmizin ticarət potensialının artırılması, birgə əməkdaşlığın gücləndirilməsi, həm də ölkəyə xarici investisiyanın cəlbi baxımından müsbət təsirlərə malik olacaq bir addımdır: “Azərbaycanda çox böyük ixrac potensialı var. Məhsullarımızın ixrac olunması üçün ilk öncə onlar təbliğ olunmalı, reklam edilməli, bazarlarda daha rahat şəkildə satılmalıdır. Bu mənada, ölkəmizin xarici ölkələrdə fəaliyyət göstərən səfirlik və konsulluqlarında ticarət nümayəndəliklərinin yaradılması işi çox vacib xarakter daşımaqdadır. Bir sıra məhsullarımız kənarda çox məşhurdur. Lakin bir var ki, bu məhsulları istehsal edən tərəf sözügedən bazara çıxmaq üçün bütün məsələləri, necə deyərlər, təkbaşına həll etsin, bir də var, hökumətdən asılı olan məsələlər bəri başdan həll olunmuş sayılsın. Bu mənada xarici ölkələrdə “Azərbaycan Ticarət evi”nin açılması vacibdir”.
Həmsöhbətimizin sözlərinə görə, əhali sayına görə üstünlük təşkil edən Çində “Azərbaycan Ticarət evi”nin açılması təqdirəlayiqdir: “Zənnimcə, belə bir məkan Çinin tək bir şəhərində deyil, bir neçə ərazisində açılmalıdır”.
İqtisadçı onu da əlavə etdi ki, ticarət evlərinin yaradılması imkan verəcək ki, qeyri-neft sektorunda fəaliyyət göstərən sahibkarlar xarici ölkələrin bazarlarına çıxış imkanlarını artırsınlar. Bu həm bazarlarla bağlı məlumatların əldə olunması, həm də yerli ixracatçılarla Azərbaycan ixracatçılarının informasiya mübadiləsinə imkan verəcək. Belə addımlar qeyri-neft sektorunda istehsal olunan məhsulların həcminin artımına səbəb olacaq.
Günel CƏLİLOVA
