Azərbaycanda dəmir yolu və dəniz yükdaşımalar üzrə tariflər yüklərin özündən, eləcə də onların kateqoriyasından asılı olacaq. Bunu jurnalistlərə baş nazirin müavini Abid Şərifov Bakıda keçirilən Aviasiya və Hava Məkanından İstifadə üzrə Dövlətlərarası Şuranın 35-ci sessiyasının iclası çərçivəsində deyib. Onun sözlərinə görə, yükdaşımalar üzrə vahid tariflərdən söhbət gedə bilməz, çünki müəyyən yükün daşınmasının onun kateqoriyasından asılı olaraq öz tarifi olmalıdır: "Kim isə 5-10 ton, başqası isə 50 ton daşıya bilər, təbii ki, onların tarifləri arasında fərq olmalıdır".
A.Şərifov qeyd edib ki, yükdaşıma üzrə "vahid pəncərə" prinsipinin tətbiqi bu sahədə işi xeyli asanlaşdıracaq: "Son 2 ildə Azərbaycan vasitəsilə yükdaşımaların həcmi azalıb, Tranzit Yükdaşımalar üzrə Koordinasiya Şurasının yaradılması onun həcmini artırmağa imkan verəcək".
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, tariflər yüksək olduğu üçün xarici tranzit şirkətlər Azərbaycandan kənar yüklərin daşınmasında maraqlı idilər: "Tətbiq edilən yeni qaydalar imkan verəcək ki, tariflərə güzəşt tətbiq olunsun. Tariflərin azaldılması beynəlxalq yükdaşımanın həcminin artmasına səbəb ola biləcək. Eyni zamanda, dövlət büdcəsinə daxil olan vəsaitin həcmi artacaq".
İqtisadçının fikrincə, yeni tariflərin tətbiq olunması dövlət büdcəsinin gəlirlərinin formalaşmasında vacibdir: "Xüsusilə qeyd edim ki, bu olay qeyri-neft sektorunun şaxələnməsinə səbəb olacaq. Eyni zamanda, nəqliyyat sektorunun və xarici yükdaşımanın ölkə iqtisadiyyatında inkişafına təkan verəcək".
İqtisadçı-ekspert Nicat Hacızadə qəzetimizə açıqlamasında bildirdi ki, əvvəllər tariflərin yüksək olması yükdaşıma sahəsində çalışanlara müəyyən problemlər yaradırdı: "Yükdaşıma sahəsində tarifin yüksək olmasına görə ticarətçilər öz mallarını bəzən xarici ölkələrə göndərə bilmirdilər. Amma "vahid pəncərə" sistemi ilə tarifin tətbiq olunması tacirlərə imkan verəcək ki, onlar öz mallarını əcnəbi ölkələrə rahat və mənfəətli şəkildə göndərə bilsinlər".
İqtisadçının sözlərinə görə, Azərbaycanda tranzit yükdaşımalar üzrə koordinasiya şurasının yaradılması və formalaşması gələcəkdə imkan verəcək ki, yükdaşıma sahəsindən gələn gəlir artsın: "Yükdaşıma sahəsindən gələn gəlir dövlət büdcəsinin inkişafına səbəb olacaq".
Günel CƏLİLOVA
