Azərbaycanda ticarət və iaşə sahəsində çalışan sahibkarlardan tutulan sadələşdirilmiş vergi dərəcələri artırılır. Bu barədə parlamentə təqdim olunan Vergi Məcəlləsində təklif edilən dəyişikliklərdə nəzərdə tutulur.
Məcəllənin 220-ci madəsinə ediləcək dəyişikliyə görə, ticarət sahəsində çalışan iş adamlarından sadələşdirilmiş vergi dərəcəsi 6%-ə, iaşə sahəsində isə 8%-ə qaldırılacaq. Özü də bu dərəcələr ölkənin bütün ərazisində - həm Bakıda, həm də regionlarda tətbiq olunacaq. Parlament tərəfindən qəbul ediləcəyi təqdirdə yeni vergi dərəcələri 2016-cı il yanvarın 1-dən tətbiq ediləcək.
Xatırladaq ki, hazırda bu sahələrdə sadələşdirilmiş vergi dərəcələri Bakıda 4%, regionlarda isə 2%-dir. Sadələşdirilmiş vergini illik dövriyyəsi 120 min manatı keçməyən hüquqi və fiziki şəxslər ödəyir.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, sadələşdirilmiş verginin dərəcəsi artırılmazdan öncə onun dövriyyəsi artırılmalıdır: "Dövriyyə artırılandan sonra sadələşdirilmiş verginin dərəcələri artırıla bilər. Belə olan halda, bunun iqtisadiyyata müsbət təsiri ola bilər. Dövriyyə artırılmadan sadələşdirilmiş verginin dərəcələrinin artırılması arzuolunan deyil. Sadələşdirilmiş vergi üzrə dərəcənin artırılması sahibkarlıq fəaliyyətinə mənfi təsir göstərər. Bir sıra ölkələrin təcrübəsi göstərir ki, sadələşdirilmiş verginin dərəcələri artırılanda bu amillər nəzərə alınmalıdır".
V.Bayramov onu da əlavə etdi ki, sadələşdirilmiş vergi dərəcəsinin bölgələrlə müqayisədə paytaxtda çox olması məhz Bakının vergi yükünün artıq olmasına gətirib çıxarıb. Belə olan halda sözsüz ki, Bakı ilə regionların vergi yükü arasındakı kəskin fərqlərin azaldılması və müəyyən balansın formalaşmasına ehtiyac var: "Amma yaxın dövrlər üçün bu sahədə balans yaratmaq təbii ki, mümkün deyil. Yəni problemi qısa zamanda həll etmək mümkünsüzdür. Biznes vergi yükünün əsasən Bakının payına düşməsi, praktik olaraq, paytaxtın daha çox vergi ödəməsinə gətirib çıxarıb. Ölkə üzrə bütün biznesin 90 faizi məhz Bakı ərazisində cəmlənib. Bu fərqi aradan qaldırmaq üçün bir sıra addımlar atılmalıdır. İndiki məqamda birmənalı şəkildə çalışmaq lazımdır ki, biznesin paytaxtdan regionlara transfer edilməsinə nail olmaq mümkün olsun. Bu istiqamətdə atılmalı olan əsas addımlar regionlarda biznesin liberallaşdırılmasının davam etdirilməsi və daha liberal biznesə malik olmaqdan ibarətdir".
Günel CƏLİLOVA
