Avtomobil bazarında "ağır, sabit vəziyyət" bitmir

Tarix: 29.09.2015 / 02:42
Bölmə: İqtisadiyyat

Ölkənin avtomobil bazarında son vəziyyət burada aktivliyin hələ də kifayət qədər aşağı olduğunu göstərir. Xüsusən də təkrar satışa çıxarılan maşınlarla bağlı durumu satıcılar kritik hal kimi dəyərləndirir. Bank kreditlərinin verilməsində şərtlərin sərtləşdirilməsi, potensial alıcıların daha çox gözləmə mövqeyinə keçməsi də vəziyyətə təsirsiz ötüşmür. Hazırda daha çox süstlük, yuxarıda qeyd olunduğu kimi, təkrar satışa çıxarılan maşınlarla bağlı müşahidə olunur.

Halbuki, işlənmiş avtomobil bazarında qiymətlər ucuzlaşıb. Bununla belə, maşın alanların sayında artım müşahidə edilmir. Əvvəllər ay ərzində 5 maşın sata bilən alverçilər indi bir maşın satanda sevinir. Mütəxəssislər bu vəziyyətin hələ bir neçə ay da davam edəcəyini bildirir. Bu vəziyyətdə Azərbaycana işlənmiş maşınların gətirilməsi də azalır. Xatırladaq ki, ölkəmizə belə maşınlar əsasən qonşu Gürcüstandan idxal olunur. 2015-ci ilin yanvar-avqust aylarında isə Gürcüstandan Azərbaycana 2844 minik avtomobili ixrac olunub ki, bu da ötən ilin müvafiq dövrünün göstəricisindən 4,8 dəfə azdır.

Gürcüstan Milli Statistika Xidmətinin 2015-ci ilin ilk 8 ayının yekunları üzrə xarici ticarət haqqında hesabatına əsasən, qeyd edilən dövrdə Gürcüstandan Azərbaycana ümumi dəyəri 51,24 milyon dollar olan avtomobillər ixrac edilib. Ötən ilin analoji dövrü ilə müqayisədə Gürcüstandan ixrac olunan minik avtomobillərinin həcmi dəyər baxımından 3,55 dəfə, say nisbətində isə 10 min ədəddən çox azalıb. Müqayisə üçün bildirək ki, 2014-cü ilin yanvar-avqust aylarında Gürcüstandan Azərbaycana 182,13 milyon dollar həcmində 14 min avtomobil ixrac edilib. Ölkəyə avtomobil idxalının azalması həm də 2014-cü il aprel ayının 1-dən Azərbaycanda tətbiqinə başlanan "Avro-4" ekoloji standartına keçidlə izah edilir. "Avro-4"ün tətbiqi Gürcüstandan Azərbaycana idxal olunan nəqliyyat vasitələrinin böyük hissəsini təşkil edən köhnə avtomobillərin ölkəyə gətirilməsini məhdudlaşdırır.

"Avro-4"lə yanaşı, kredit şərtləri də maşın bazında vəziyyətə təsir edən əsas faktorlardan biridir. Mərkəzi Bankın avtomobil krediti götürənlərə tətbiq etdiyi qaydalardan sonra alıcılar avtomobili daha çox nağd almaq məcburiyyətindədir. Bu hal isə bazardakı kreditlə satılan avtomobillərin satışına ciddi təsir edir. Bundan başqa, müştərilərə kredit verərkən onların yalnız banklara olan borcu deyil, digər öhdəlikləri də nəzərə alınır., Araşdırmalara görə, son bir ilədək ölkədə verilən istehlak kreditlərinin böyük bir hissəsi avtomobil kreditlərinin payına düşüb. Elə qaytarılmayan kredit borclarının da təqribən 40 faizə qədəri avtomobillərə verilən vəsaitlərdir. Lakin artıq bu sahədə vəziyyət dəyişir.

Avtomobil bazarı üzrə ekspertlər bir məqama da diqqət yetirir ki, manatın devalvasiyası fonunda maşınların dollarla satılması qiymət artımına gətirib çıxarıb. Ekspertlər hazırda bazarda durğunluq olduğunu, müştərilərin qiymətlərin aşağı düşəcəyini gözlədiklərini bildirir. Bundan başqa, manatın ucuzlaşması avtomobillərin qiymətləri ilə yanaşı, onların ehtiyat hissələrinin və təmir xərclərinin artmasına da təsir göstərir. Bütün bunlar avtomobil satışında durğunluqla müşayiət olunur. İqtisadçı ekspert Rəşad Həsənov isə qeyd edir ki, hazırda yaşanan durğunluq artıq avtomobilləri xeyli ucuzlaşdıra bilər: "Avtomobil bazarında 2014-cü ilin sonlarından etibarən durğunluq yaşanır. Ucuzlaşma daha çox təkrar bazarda müşahidə olunur. Bununla belə, artıq son bir ayda biz yeni avtomobillərin də qiymətlərində ucuzlaşma müşahidə edirik. Düşünürəm ki, bundan sonra da ucuzlaşma davam edəcək. Avtobazarın daralması və eyni zamanda idxalın azalması tendensiyası davam edəcək. İlin sonuna qədər və hətta 2016-ci ildə avtomobil bazarında durğunluq daha da dərinləşəcək. Alıcılıq səviyyəsi ilə bərabər qiymətlər də aşağı düşəcək. Təxminən avtomobil bazarındakı qiymətlər növbəti aylarda 20 faiz ucuzlaşacaq". Bu həddə ucuzlaşmadan sonra maşın bazarında aktivliyin yenidən arta biləcəyi istisna olunmur. Amma əvvəlki fəallığın yaxın iki il ərzində bərpası inandırıcı sayılmır.

Tahir TAĞIYEV

DİGƏR XƏBƏRLƏR

Tarix: 26.10.2026 / 21:46

Naxçıvanın büdcəsi 13 milyon kəsildi - maraqlı səbəblərdən danışılır...

Tarix: 26.10.2026 / 11:50

Kimlərin pensiyalarına əlavələr ediləcək? - AÇIQLANDI...

Tarix: 23.10.2026 / 16:05

Azərbaycanda islam maliyyəçiliyi nə deməkdir?..

Tarix: 23.10.2026 / 10:37

Sosial ödənişlərin artırılması üçün altıncı sosial islahat paketi hazırlanır...

Tarix: 23.10.2026 / 09:57

Gələn il şəhər və rayonlara dotasiya ayrılmayacaq - xərclərini öz gəlirləri hesabına ödəyəcəklər...

Tarix: 23.10.2026 / 09:26

Gələn ilin büdcəsi layihəsi Milli Məclisdə - gəlirlər və xərclər açıqlandı...

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Tarix: 22.10.2026 / 19:30

Azərbaycanda şirin su ilə bağlı vəziyyət pisləşir - ümid Xəzərə qalıb…

Tarix: 22.10.2026 / 10:36

Sabahdan vint, bolt və qaykaların ixrac tarifi 20 DƏFƏ ARTIRILIR...

Tarix: 21.10.2026 / 17:06

Azərbaycan daha bir rekord vurdu - "tranzitlərin rekordu"...

Tarix: 21.10.2026 / 16:50

Neft Fondumuzun çox valyuta qazanmasına mane olan tək səbəb var...

Tarix: 21.10.2026 / 13:35

Azərbaycanda yeni bank yaradıla bilər - Aİ-dən TƏKLİF...

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Tarix: 22.10.2026 / 19:30

Azərbaycanda şirin su ilə bağlı vəziyyət pisləşir - ümid Xəzərə qalıb…

Tarix: 22.10.2026 / 16:56

15 temmuz “FETÖ darbesində” bircə nəfər siyasətçi-deputatın adı çıxmadı...

Milli kimliyə bağlı gənclər uğurlu gələcəyin əsas təminatçılarıdır...