Neftin qiymətinin aşağı düşməsi Azərbaycana təsir etməyib. "APA-Economics”in "Əl-Cəzirə”nin saytına istinadən verdiyi məlumata görə, bunu Azərbaycanın energetika naziri Natiq Əliyev bildirib.
Onun sözlərinə görə, hazırda iqtisadi baxımdan neftin qiymətindən qaynaqlanan bir çətinlik yaşanmır. Nazir bunu neft hasilatı xərclərinin aşağı olması ilə izah edib: "Biz böhran hiss etmirik. Çünki, Azərbaycan neftinin hasilat xərcləri ucuz başa gəlir. Amma ümumilikdə bizim gəlirlərimiz azalıb. Bir ildə neft satışından təxminən 20 mlrd. dollar əldə edirdik. Qiymət aşağı düşəndən sonra illik gəlirlərimiz 5-6 mlrd. dollar azalıb”, - deyə nazir vurğulayıb.
N. Əliyev əlavə edib ki, qısa müddət ərzində neftin qiymətinin artması gözlənilmir. Nazir hesab edir ki, İran və Qərb arasında münasibətlər kimi siyasi məsələlər də neftin qiymətinə zamanla təsir göstərəcək.
