Adətən, Milli Şurada təmsil olunanlar Azərbaycanda həyata keçirilən islahatlara, görülən işlərə qara yaxmaqla məşğuldurlar. İndiyə qədər görülən bütün işlərə bunlar ya kölgə salıblar, ya da ümumiyyətlə, əldə olunan istənilən nailiyyəti inkar ediblər. Bunu Vətən müharibəsi zamanı və ondan sonrakı dövrdə bir daha gördük.
Məlum olduğu kimi, yanvarın 5-dən Azərbaycanda benzinin və dizel yanacağının qiyməti artırılıb. İndi də Milli Şura təmsilçiləri belə bir iddia ortaya atıblar ki, yanacağın qiyməti artdığına görə guya ən çox bahalaşmaya məruz qalan sahələrdən biri də kənd təsərrüfatı məhsulları olacaq. Bunu onunla əsaslandırırlar ki, kənd təsərrüfatı istehsalında dizel yanacağı daha çox istifadə olunur. Ancaq nəzərə almaq lazımdır ki, sözügedən məhsullar təkcə avtomobillə daşınmır. Digər nəqliyyat vasitələri ilə də daşınır və üstəlik, daşıma xərcləri maya dəyərinə o qədər də çox təsir etmir. Həmçinin, kənd təsərrüfatı məhsullarının istehsalı ilə bağlı fermerlərə subsidiyalar verilir. Belə olan halda, radikalların “arqumenti” nə dərəcədə əsaslıdır?
“Fermerlər yanacağın qiymətinin artması ilə əlaqədar olaraq yaranan fərqi subsidiya vasitəsilə kompensasiya edəcəklər”
Məsələyə münasibət bildirən millət vəkili Vüqar Bayramovun sözlərinə görə, deyilənlər reallığı əks etdirmir: “Çünki benzin və dizel yanacağının qiyməti artandan sonra hökumət tərəfindən dəstək paketləri hazırlanır. Yaxın vaxtlarda həmin paketlər icra olunacaq. Dizel yanacağının qiymətinin artması ilə əlaqədar onun aqrar sektora təsirinin minimumlaşdırılması üçün hökumət tərəfindən subsidiyanın məbləği artırılacaq. 2020-ci illə müqayisədə bu il fermerlərə veriləcək subsidiyanın məbləğinin artacağı gözlənir. Nəticədə fermerlər yanacağın qiymətinin artması ilə əlaqədar olaraq yaranan fərqi subsidiya vasitəsilə kompensasiya edəcəklər. Bu da fermerlərə xərcləri optimallaşdırmağa imkan verəcək. Subsidiya məbləğinin artırılmasında məqsəd ondan ibarətdir ki, aqrar məhsulların qiymətində artımın qarşısı alınsın. Çünki yaranmış fərq dövlət tərəfindən kompensasiya olunduğuna görə bu, qiymətlərin artması üçün ciddi bir zəmin yaratmır. Eyni zamanda, hökumət dizel yanacağının qiymətinin artmasının digər sektorlara təsirini də qiymətləndirir. İctimai nəqliyyat və digər bu kimi sahələrə dəstək paketinin hazırlanması gündəmdədir. Beləliklə, dövlət yanacağın qiymətinin artmasının iqtisadi təsirlərini kompensasiya etməklə çəkilən xərcləri minimumlaşdırmağa çalışır”.
Millət vəkili hesab edir ki, bütün bunlar kənd təsərrüfatı məhsullarının qiymətində ciddi artımlara imkan verməyəcək.
Vidadi ORDAHALLI
