Xəbər verildiyi kimi, Qarabağ üzrə Regional Turizm İnkişaf Strategiyası hazırlanır. Bu barədə Dövlət Turizm Agentliyinin sədri Fuad Nağıyev bir neçə gün öncə media nümayəndələrinə açıqlamasında qeyd edib.
O bildirib ki, sahibkarlar azad olunmuş torpaqlarda otellər tikintisində maraqlı olmalı, bu sahəyə investisiya qoymalıdırlar: “Qarabağ üzrə Regional Turizm İnkişaf Strategiyası hazırlanır. Qarabağda turizmi birlikdə inkişaf etdirmək lazımdır. Qarabağda yeni otellər açılması ilə ora yüzlərlə turist üz tutacaq”.
“...burada ekoturizm fəaliyyəti yüksək sürətlə inkişaf edəcək”
Qarabağ üzrə Regional Turizm İnkişaf Strategiyasının əhəmiyyəti haqqında danışan Elçin Rüstəm bildirdi ki, Qarabağ ərazisinin relyefinə, təbii ehtiyatlarına və tarixi abidələrinə görə seçilir: “İşğaldan azad olunan ərazilər dünyada turizm bölgələri olaraq tanıdılmalıdır. Sovet dövründə ən çox üz tutulan məkan həmin bölgələr idi. Belə ki, Şuşada çoxlu sayda sanatoriya yerləşirdi. Bununla yanaşı, pioner düşərgələri də var idi. 80-ci illərdə isə Ağdamda turizmin potensialı inkişaf etdirilib. Şuşa şəhərində ilk istirahət evi 1936-cı ildə istifadəyə verilib. Şuşa şəhərində 1316 yerlik Şuşa Sanatoriya Kurort Birliyi, 130 yerlik "Şəfa" turist bazası və Ağdam rayonunun Gülablı kəndində 100 yerlik, Şelli kəndində 50 yerlik, Şahbulaqda isə 40 yerlik müalicə istirahət mərkəzləri fəaliyyət göstərib. Şuşa Sanatoriya-Kurort Birliyinin balansına 2 və 3 mərtəbəli 17 bina daxil idi”.
Həmsöhbətimiz onu da əlavə etdi ki, xalqımızın Qarabağa və ətraf rayonlara marağı həddindən artıq çoxdur. Bu isə daxili turizmin inkişafına səbəb olacaq. Təəssüf ki, ermənilər Azərbaycan ərazilərində etnik təmizləmə siyasəti həyata keçirəndə tarixi abidələri məhv ediblər: “Qarabağ turizminin inkişafı üçün yeni marşrutlar yaradılmalıdır. Dağlıq ərazi olduğundan, dağçılıq və alpinizm turizmi xüsusi qeyd edilməlidir. Bundan başqa, gəzintilər, aktiv və ekstremal turizmi inkişaf etdirmək olar. Qarabağda ekoturizm fəaliyyəti yüksək sürətlə inkişaf edəcək. Ekoturizm bu ərazilərin gələcəyidir, çünki buralar təbii ehtiyatlarla zəngindir. Bu ərazilərdə həm də müxtəlif növ ekstremal turizm, aqroturizm, yaşıl turizm, piyada gəzintilər, göbələk turları təşkil etmək olar".
Günel CƏLİLOVA
