Dünya iqtisadiyyatı davam edən koronavirus pandemiyası səbəbindən hələ də ciddi çətinliklər yaşayır.
Pandemiya ilə əlaqədar olaraq əksər ölkədə büdcə kəsiri müşahidə edilir. Məsələ ondadır ki, iqtisadi fəallığın aşağı düşməsi səbəbindən bir sıra ölkələrdə büdcə öhdəliklərinin yerinə yetirilməsində ciddi problemlər yaşanır. Nəzərdə tutulan yığımların icrasında çətinliklər müşahidə edilir. Bu səbəbdən büdcəsində kəsir yaranan ölkələrin sayı artıb.
Ancaq bütün çətinliklərə rəğmən, bu ilin 11 ayında Azərbaycanda büdcədə profisit yaranıb. Belə ki, yanvar-noyabr aylarında dövlət büdcəsinin gəlirləri 22 milyard 241,1 milyon manat, xərcləri isə 22 milyard 162,7 milyon manat təşkil edib. Yəni 2020-ci ilin yanvar-noyabr aylarında dövlət büdcəsinə 22 milyard 241,1 milyon manat vəsait daxil olub. Nəticədə büdcənin icrasında 78,4 milyon manatlıq profisit yaranıb. Büdcəyə daxil olan gəlirlərin həcmi ötən ilin eyni dövrü ilə müqayisədə 5,2 faiz artıb. Müqayisə üçün qeyd edək ki, 2019-cu ilin yanvar-noyabr ayları ərzində dövlət büdcəsinin gəlirləri 21 milyard 132,2 milyon manat təşkil edib. Göründüyü kimi, həm ümumi gəlirlərin həcmi artıb, həm də büdcədə 78,4 milyon manatlıq profisit yaranıb.
“İri vergi ödəyicilərinin, transmilli şirkətlərin fəaliyyətində hər hansı durğunluq yaranmadı”
Məsələyə münasibət bildirən iqtisadçı-ekspert Fuad İbrahimovun sözlərinə görə, Azərbaycanın ehtiyatlı və düşünülmüş iqtisadi siyasəti sayəsində büdcədə profisit yaranıb: “Pandemiya başlayandan bəri Azərbaycan hökuməti və iqtisadiyyatı buna hazırlaşmışdı. Yəni bir sıra qabaqlayıcı tədbirlər görüldü. Bununla bağlı büdcə xərclərində qənaətcil yanaşmalardan istifadə edildi. Böyük vəsait tələb edən layihələrin icrası təxirə salındı. Yalnız sosial xarakterli xərclər ixtisar edilmədi. Əksinə, bununla bağlı xərclər artırıldı. Bununla yanaşı, iri vergi ödəyicilərinin, transmilli şirkətlərin fəaliyyətində hər hansı durğunluq yaranmadı. Bütün bu göstəricilərin hamısı şübhəsiz ki, bizim bugünki büdcəmizin vəziyyətinə müsbət təsir edir. Hesab edirəm ki, bütün bunlar Azərbaycan iqtisadiyyatının xeyrinədir. Birmənalı şəkildə qeyd edilməlidir ki, dövlətin və iqtisadiyyatın idarə olunmasında pandemiyaya hazırlıq səviyyəmiz qənaətbəxş vəziyyətdə idi. Bax, bütün bunların nəticəsidir ki, statistik məlumatlarda müsbət göstəricilər öz əksini tapıb”.
Ekspertin fikrincə, müsbət tendensiya ilin sonuna qədər davam edəcək.
Vidadi ORDAHALLI
