“Bu il kənd təsərrüfatı sahəsində çalışan sahibkarlara Sahibkarlığın İnkişafı Fondundan kreditlərin ayrılması nəzərdə tutulur. Xüsusilə hesab edirəm ki, indiki şəraitdə kənd təsərrüfatı emalı sahəsinə daha çox diqqət yetirilməlidir. Çünki biz əlavə dəyər zənciri yaratmalıyıq və çalışmalıyıq ki, həm daxili bazara, həm xarici bazarlara daha çox hazır məhsul təqdim edək”.
Bu sözləri Prezident İlham Əliyev 2020-ci ilin birinci rübünün sosial-iqtisadi yekunlarına həsr olunan videokonfrans şəklində keçirilmiş müşavirədə söyləyib.
Dövlət başçısı onu da qeyd edib ki, bu, yeni iş yerlərinin yaradılmasına da gətirib çıxaracaq: “Əlbəttə ki, kiçik sahibkarlar da yaddan çıxmamalıdır”.
O da məlumdur ki, Azərbaycanda iqtisadiyyatın qeyri-neft sektorunda böyük çəkiyə malik olan sahələrdən biri də kənd təsərrüfatıdır. Aqrar sektora dövlət tərəfindən qoyulan investisiyalar ilbəil artır. Yeni texnikalar alınır, dövlət tərəfindən subsidiyalar ayrılır, aqro xidmət sahələri yaradılır, güzəştli şərtlərlə gübrə, yanacaq verilir. Sahibkarlara güzəştli şərtlərlə verilən kreditlər hesabına yeni aqrar istehsal sahələri yaranır. Bunun nəticəsində ölkəmizdə aqrar sektorda məhsul istehsalının artması yeni emal müəssisələrinin yaradılması tələbatını ortaya qoyur. Emal sahəsini inkişaf etdirsək, bu həm gəlirləri artıracaq, həm də məşğulluğun təmin olunmasına müsbət təsir edəcək.
Maraqlıdır, indiki şəraitdə kənd təsərrüfatı sahəsində emal sektorunun inkişafı ilə bağlı hansı vacib işlər görülməlidir?
“Bir sıra hallarda mövsüm vaxtı fermerlər məhsulu sata bilmir, emal sənayesi qurulsa, belə problem olmayacaq”
Məsələyə münasibət bildirən aqrar sahə üzrə ekspert Nicat Nəsirlinin sözlərinə görə, bununla bağlı bir sıra işlər görülməlidir: “Burada söhbət sənaye komplekslərinin yaradılmasından gedir. Bu gün pambıqçılığın, meyvəçiliyin sənaye tərəfi var. Ancaq bu sahə daha da inkişaf etdirilməlidir. Məhsulların ilkin və dərin emalı təşkil olunmalıdır. Koronavirusla bağlı maska zavodu tikildi, amma bunun üçün xammal olmadı. Lazım olan xammal Türkiyədən gətirildi. Ona görə də ölkədə pambıqçılıq inkişaf edirsə, onun emalı da inkişaf etməlidir. Təkcə məhsulu xammal şəklində satmaq sərfəli deyil. Bundan çoxsaylı məhsul əldə etmək mümkündür. Bu zaman nəinki yerli tələbatı daxili istehsal hesabına ödəmək olar, hətta hazır məhsulu xaricə ixrac da edə bilərik. Bu gün inkişaf etmiş ölkələr məhsul emalına xüsusi önəm verirlər. Bununla belə, meyvə-tərəvəz emalını dərinləşdirmək olar. Bir sıra hallarda mövsüm vaxtı fermerlər məhsulu sata bilmir, emal sənayesi qurulsa, belə problem olmayacaq. Üstəlik, əlavə dəyər zənciri yaranacaq. Qeyri-mövsümlərdə tələbatı yerli istehsal hesabına ödəmək mümkün olacaq. Ona görə də müşavirədə Prezident çox vacib məsələyə toxundu. Emal sənayesi kənd təsərrüfatının axsayan tərəfidir. Hesab edirəm ki, burada torpaqdan süfrəyə bir zəncir həlqəsi qurulmalıdır. Burda sənaye qurulmalıdır və bununla yanaşı, insanların istehlak mədəniyyəti olmalıdır. Məsələ ondadır ki, bizim xalqımız konserv məhsullarına o qədər də önəm vermir. Ona görə də bunun bazarı olmalıdır ki, emal sənayesi inkişaf etsin. Bazar yoxdursa, o zaman istehsal olunan məhsul xarici rəqabətə davam gətirməyəcək. Bu sahədə kompleks işlər görülməlidir”.
Vidadi ORDAHALLI
